VOV4.Jarai- Ling tơhan wai pơgang guai tơring čar Kon Tum gum hrŏm hăng ling tơhan wai pơgang guai tơring čar Tây Ninh phrâo pơphun pơklaih ba glăi dêh čar amon Y Liên, mơnuih arăng plư ba nao sĭ pơ dêh čar Kur hăng tơlơi ƀuăn mă bruă djôl prăk apah lu. Hơdôm bruă bơdjơ̆ nao amon Y Liên brơi ƀuh, hơmâo lu tơlơi plư pleč hăng ƀing hlăk ai čơđai, ƀing mơnuih aka ƀu thâo phe pho, aka ƀu găn rơgao amăng tơlơi hơdip hăng ƀu rang kơđiăng.

Tơdơi kơ rơbêh dua hrơi hơmâo anom bruă wai pơgang guai lŏn ia ĕp ƀuh ba glăi mơng dêh čar Kur, amon Y Liên glăk ƀơƀrư̆ hơđong amăng pran jua. Čơkă ƀing gơmơi amăng tơ̆i ƀơi plơi Kei Joi, să giăm guai Đăk Xú, tơring glông Ngọc Hồi, tơring čar Kon Tum, ƀing mơnuih amăng sang anŏ, biă mă ñu ơi yă, amĭ ama hăng ƀing adơi đeh kơ amon Y Liên lêng kơ pơdah pran hok mơ-ak. Ayong A Van, ama Y Liên brơi thâo:

“Kâo hok mơ-ak biă mă, ăt ol hơdol amăng pran jua, hia ƀu thâo, klao ƀu truh. Hăng hơmâo tơhan wai pơgang guai pơ alum pran jua, anăm hning rơngŏt dong tah”.

Ba truh kơ bruă amon Y Liên, 16 thun, djuai ania Sêdang, dŏ ƀơi să giăm guai Đăk Xú, tơring glông Ngọc Hồi, tơring čar Kon Tum arăng plư ba nao sĭ pơ dêh čar Kur lĕ yua ñu pô aka ƀu thâo phe pho. Akŏ thun 2022, Y Liên yua hră chứng minh nhân dân kơ sa čô mơnuih amăng sang anŏ kiăng kơ pơhlôm ñu truh thun mă bruă laih anun ñu kiăo tui arăng nao pơ tơring čar Bình Dương ngă kông nhơn.

Tơlơi hok mơ-ak mơng Y Liên hăng sang anŏ

Amăng hơdôm hrơi blan nao mă bruă, Liên juăt sa čô đah rơkơi pơanăn amăng amăng facebook lĕ Lê Ngọc Nhất. Nhất plư Liên nao pơ dêh čar Kur mă bruă hăng prăk apah 20 klăk sa blan, mă bruă brơi kông ti Khač hăng ƀuăn tơdah kiăng pơdơi bruă Nhất amra duh prăk ba Liên glăi pơ dêh čar Việt Nam.

Lơ 18/4/2022, Y Liên hrŏm hăng 5 čô mơnuih pơkŏn hơmâo 2 čô đah kơmơi, 3 čô đah rơkơi aka ƀu thâo tong ten anăn, ƀing gơñu ăt aka ƀu juăt ôh hơmâo arăng ba nao pơ dêh čar Kur tui jơlan găn nao rai hơgŏm ƀơi guai tơring čar Long An. Lơ̆m nao truh pơ dêh čar Kur rĭm čô mơnuih arăng jao bruă phara yua anun ƀu dưi pơbưp dong tah hăng Nhất ăt hơdŏp hĭ abih mrô telephôn, anăn facebook, yua anun ƀing gơñu ƀu dưi iâu glăi pô anai. Lơ̆m glăk bral rơngal yua kơ thâo arăng plư, Y Liên brơi thâo ñu arăng kơtư̆ juă lơ̆m mă bruă amăng hơdôm kông ti Khač ƀơi dêh čar Kur.

“Hmư̆ arăng lăi tơdah ƀu thâo mă bruă arăng amra sĭ brơi pô pơkŏn, dưm amăng kơthung ba nao glŏm lui amăng ia rơsĭ, laih dong brơi hơba ƀong. Arăng brơi dŏ kơnong amăng kông ti, bruă gah rơngiao ƀu brơi ngă ôh. Đa anih mă bruă mơng 8 mông mơguah truh 12 mông mlăm. Đa hơmâo anih mă bruă mơng 10 mông mơguah truh 11 mông mơmŏt mlăm. Đa mă bruă mơng 11 mông mơmŏt mlăm truh 11 mông yang hrơi".

Glăi mă bruă amăng sang anŏ lĕ tơlơi čang rơmang lơ̆m Y Liên arăng pơgô̆ mă bruă pơ dêh čar Kur

Yua mă bruă ƀu djơ̆ hăng arăng kiăng, mơng blan 4 truh blan 7/2022, Y Liên arăng sĭ brơi 6 boh kông ti hăng rĭm wŏt sĭ tui anun prăk đĭ tui mơng 1.800 đôlar Mi truh 3.500 đôlar Mi. Anai lĕ mrô prăk kông ti tal 6 rơkâo duh glăi tơdah kiăng pơwŏt glăi pơ dêh čar Việt Nam. Tơlơi ngă hŭi rơhyưt hloh lĕ 6 boh kông ti mơ̆ Y Liên mă bruă ƀơi dêh čar Kur lêng rơkâo hrup mơtăm, anun lĕ rơkâo mơnuih mă bruă hơmâo app kiăng kơ ĕp gơyut gơyâo, plư ngă pơgô̆ kiăng kơ duh prăk hăng plư̆ ƀing mơnuih pơkŏn nao mă bruă pơ dêh čar Kur.

“Ƀing gơmơi ĕp tuai, ngă hiưm pă kiăng hơmâo mơnuih khăp. Lơ̆m pơkhăp laih, arăng amra đăo gơnang. Laih anun kâo amra rơkâo mơ-it prăk ƀing gơñu amra ngă tui. Lơ̆m hơmâo mơnuih đăo gơnang, ƀing gơmơi rơkâo mơ-it prăk, mah 100 klăk prăk ăt tŭ mơn. Tơdah ƀu hơmâo prăk ƀing gơmơi amra rơkâo hyu čan. Tơdah ƀu dưi hyu čan dong ta ƀing gơmơi amra ĕp mơnuih pơkŏn dong. Arăng rơkâo ƀing gơmơi ĕp mơnuih khăp kiăng kơ plư nao mă bruă prăk apah lu. Ƀing gơmơi ĕp mơnuih ƀơi Việt Nam nao mă bruă pơ dêh čar Kur, tơdah hơmâo mơnuih arăng amra apah mơng 300 đôlar Mi truh pơ 500 đôlar Mi sa čô mơnuih”.

Anai lĕ sa čô dra djuai ania Sêdang phrâo 16 thun, aka ƀu juăt bruă, bral rơngal lơ̆m arăng jao hyu plư prăk hăng ĕp mơnuih, lơ 17/7/2022, Y Liên rơkâo mă măi telephôn sa čô mơnuih ƀon sang Việt Nam iâu glăi pơ sang anŏ djru. Mơng pel ĕp, Anom bruă tơhan wai pơgang guai Đăk Xú thâo kơ bruă Y Liên yua anun lăi pơthâo kơ Anom bruă git gai tơhan wai pơgang guai tơring čar Kon Tum.

Ling tơhan wai pơgang guai Đăk Xú nao čuă jơmư, pơ alum pran jua Y Liên hăng sang anŏ

Hăng pran gir run kiăng kơ ba glăi Y Liên, hluai tui hơdôm bruă pel ĕp, anom bruă pơgăn sĭ dŏp ma túy hăng sĭ dŏ mơnuih, Anom bruă git gai tơhan wai pơgang guai tơring čar Kon Tum gum hrŏm hăng tơhan wai pơgang guai tơring čar Tây Ninh ĕp ƀuh hăng ba Y Liên glăi pơ Việt Nam amăng lơ 20/8/2022. Lơ̆m ĕp ƀuh Y Liên glăk mă bruă amăng sa boh kông ti ƀơi jơlan mrô 702, Bãi Si Hai, tơring čar Sihanouk, Kur ataih mơng amăng jang jar kmar Mộc Bài, tơring čar Tây Ninh giăm 470 km gah dơnung. Lăi pơthâo kơ bruă pơklaih ba glăi Y Liên, thiếu tá Bùi Công Huân, Tơhan pơgăn sĭ mơdrô ma túy hăng sĭ dŏ mơnuih, anom bruă wai pơgang guai tơring čar Kon Tum brơi thâo:

“Bruă pơklaih hăng ba glăi Y Liên lĕ tơnap tap biă mă. Lơ̆m iâu telephôn nao kông ti ñu glăk mă bruă, kông ti anai ƀu brơi yua măi telephôn, yua anun kiăng thâo ñu glăk dŏ pơpă glêh tơnap biă mă. Lơ̆m nao mă bruă pơ dêh čar Kur, ñu arăng juăt kơtư̆ juă lu wŏt, mă bruă mơng 12 truh 18 mông amăng ha hrơi. Rơngiao kơ mông ƀong huă, bruă hơjăn. Ƀing mơnuih wai lăng ƀơi anai lêng kơ djă phao yua anun ñu ƀu dưi tơbiă gah rơngiao, yua ƀu thâo ñu dŏ pơpă yua anun tơnap lơ̆m hyu ĕp”.

Tơdơi kơ rơbêh 2 hrơi pơklaih ba glăi tơl sang anŏ ƀơi plơi Kei Joi, să giăm guai Đăk Xú, tơring glông Ngọc Hồi, tơring čar Kon Tum, Y Liên glăk ƀơƀrư̆ hơđong amăng pran jua. Hơmâo ling tơhan pơ alum pran jua kah hăng hơmâo ơi yă, amĭ ama, adơi đeh đăo gơnang, ñu ruai glăi abih hrơi mông arăng plư sĭ nao mă bruă amăng 6 boh kông ti Khač ƀơi dêh čar Kur. Tơlơi Y Liên kiăng kơ lĕ bơni ling tơhan wai pơgang guai hăng čang rơmang ƀu hơmâo hlơi dong tah plư nao mă bruă pơ dêh čar Kur kar hăng Y Liên.

Khoa Điềm: Čih

Siu Đoan: Pơblang