Kiăng pơhlom brơi tơlơi dưi, anŏ klă kơ mơnuih hơmâo lŏn kơnuk kơna mă pơhrui, pơhlom brơi anih dŏ, tơlơi hơdip mơda hăng bơwih ƀong huă, Tơlơi phiăn Lŏn tơnah (čih pơkra glăi) pơkă laih, mơnuih hơmâo lŏn sang đang hmua mơ̆ kơnuk kơna pơhrui glăi, jing hơmâo duh glăi hăng lŏn tơnah hrup hăng lŏn hơđăp mơn, lŏn pơkŏn ƀudah duh hăng prăk. Kơ bruă anai, ơi Đặng Đức Hiệp (tơring čar Lâm Đồng) lăi, kiăng sem lăng tong ten bruă mă pơhrui lŏn hlao mơtăm, ƀu hơmâo ba glăi dong tah hăng hơdôm kơčăo bruă phara hơjăn.

Tơlơi hơmâo mơ̆ng bruă pơkra bôxit ƀơi kual lŏn prong biă mă či Lâm Đồng, bơdjơ̆ nao lu sang anŏ, ƀing khua lăi, bruă mă bôxit lĕ kiăng klơi mă hăng ngŏ đôč, ƀu hơmâo sui ôh, laih anun dưi ba glăi lŏn. Tơdah ta mă pơhrui hlao mơtăm, tui anun ngă tơnap biă kơ bruă duh prăk kăk, čuk pơkra ala lŏn, wơ̆t hăng pơdong plơi phrâo. Mơ̆ng tơlơi anai, ơi Đặng Đức Hiệp rơkâo đĭ: “Ƀing ta ăt kiăng sem lăng bruă mă pơhrui lŏn pơkă hơdôm thun ƀudah Kơnuk kơna apah mă lŏn mơnuih ƀon sang đah mơ̆ng pơhlom bruă klơi mă gơnam amăng gŭ lŏn. Tui anun jing plai mơn rơngiă lu đơi prăk kơnuk kơna, bruă duh lŏn hai huăi tơnap lơi, bruă pơdong plơi phrâo hai hnun mơn; pơhrŏ ƀiă prăk klơi mă gơnam amăng gŭ lŏn, mơ̆ng anun gơnam pơkra rai ăt dưi pơhno hăng kual pơkŏn mơn. Bruă anai kiăng sem lăng pơhrua tui amăng tơlơi phiăn, ngă gêh găl kơ bruă klơi mă gơnam yom amăng gŭ lŏn, biă ñu lĕ klơi mă boxit ƀơi Lâm Đồng”.

Lăp đing nao bruă wai lăng hăng mă yua klă lŏn tơnah, ơi Bùi Xuân Thống (khua pơ ala mơ̆ng ƀon prong Đồng Nai) tŭ ư hăng tơlơi rơkâo pơplih glăi, kah phara djuai lŏn, laih dong kiăng ngă rơđah tơlơi pơkă lŏn glai rưng, kiăng plai ƀiă anŏ pleh ploh mrô jŭ yap plah wah anom bruă lŏn tơnah hăng anombruă glai rưng. Kơ tơlơi dưi hăng bruă kiăng ngă mơ̆ng pô yua lŏn, pô khua anai kiăng rơkâo pơhrua tui tơlơi pơkă pơgang ba pô hơmâo jao mă yua lŏn, pô pơgôp prăk ngă bruă hăng lŏn sang đang hmua hăng dram gơnam hơmâo ƀơi lŏn anun, hơmâo mă yua djơ̆ lăp amăng hrơi mông dŏ hrơi pơkă yua lŏn. Hăng bruă apah prăk yua lŏn či klơi mă gơnam amăng gŭ lŏn pioh man pơdong sang, man pơkra jơlan, pô pơ ala Bùi Xuân Thống pơgôp hiăp tui anai: “Mơ̆ng tơlơi hơmâo sit ƀơi Đồng Nai, hơdôm kual kiăng mă yua gơnam amăng gŭ lŏn kah hăng pơtâo, čuah, či man pơkra ring bruă akŏ phun, lơ̆m anun bruă mă yua lŏn hơmâo tom hăng lŏn pla phun sui thun, lŏn pla djuai phun rim thun pơkŏn dong. Yua hnun, rơkâo ƀu djơ̆ pơkă thun blan mă yua hăng glai rưng pla mă đôč ôh, kiăng sem lăng abih bang djŏp djuai lŏn tơnah lăp djơ̆, amăng anun hơmâo phun pla sui thun, lŏn pla phun rim thun pơkŏn dong, kiăng hơmâo anŏ gêh găl, djơ̆ hăng tơlơi phiăn lơ̆m mă yua lŏn tơnah”.