20 boh să hơmâo ruah mă amăng mrô 51 boh să tơnap tap mơ̆ng tơring čar Dak Lăk. amăng anun, 14 boh să hơmâo mơ̆ng 7 hơnong pơkă tơnap kơtang hloh, hơmâo lu anŏ tơnap kơ anih anom, sang bruă, jơlan nao rai, bruă ngă hmua pla pơjing, hăng hơdôm tơlơi kiăng hơmâo biă mă. Bruă anai kiăng truh pơ thun 2030, rim boh să hơmâo aset biă ñu sa hơbô̆ bruă bơwih ƀong mơtah ƀudah bơwih ƀong pơdar nao rai, dưi ngă lok nao lok rai, sa ruăi pơtruh pơkra gơnam, ba sĭ; pơlir bruă đĭ kyar bơwih ƀong hăng djă pioh gru grua, pơplih klă tui anih hơdip.

Prăk kiăng ngă bruă him lăng 5.000 klai, hơmâo năng ai 3.000 klai iâu pơthưr mơ̆ng plơi pla ƀon lan hăng abih bang mơnuih gum djru, năng ai 2.000 klai prăk mơ̆ng tơring čar brơi nao. Bruă brơi nao prăk kiăo tui anŏ hơmâo mơ̆ng prăk tơring čar brơi wơ̆t hăng prăk pơčruh mơ̆ng pơkŏn djơ̆ tui tơlơi phiăn.

Ƀơi mông jơnum, ƀing khua hơdôm gơnong bruă hăng ƀing khua pơ ala mơ̆ng sang să rơkâo kiăng tañ pok pơhai ngă tui. Ơi Nguyễn Duy Tính, Khua jơnum min mơnuih ƀon sang să Phú Mỡ, tơring čar Dak Lăk rơkâo kiăng tañ hơmâo hră pơtô mă yua amăng bruă hơget thơ hlâo, prăk kăk hơmâo ngă amăng bruă hơget, đah mơ̆ng tañ prăp rơmet mơ̆ng akŏ thun 2027 mơtăm:“Pơƀut man pơkra anih anom, jơlan nao rai, kah hăng hơdôm ring bruă brơi ia yua hơdjă kơ hơdôm boh plơi mơnuih djuai ania ƀiă. Pơƀut pơdong anih dŏ phrâo kơ mơnuih ƀon sang djuai ania ƀiă đah mơ̆ng hơmâo anih dŏ rơhaih ƀiă. Prăp rơmet gơnam yua kơ sang hră, biă ñu lĕ sang hră đom lăm kơnuk kơna čem rông”.

Lơ̆m anun, Gơnong bruă Djuai ania hăng Tơlơi đăo tơring čar Dak Lăk rơkâo hơdôm boh să ruah mă bruă djơ̆ hăng anŏ či kiăng, pơtrut tui anŏ gêh găl bruă ngă hmua pla pơjing, pơkra gơnam gru đưm hăng čơkă tuai čuă ngui kiăo tui gru grua hiam mơ̆ng rim boh plơi. Rim hơbô̆ bruă khŏm hơmâo hơdră bong kjăp dưi ngă na nao tơdơi kơ djru brơi.

Klah čun glăi mông jơnum, ơi Y Nhuân Byă, Kơ-iăng khua jơnum min mơnuih ƀon sang tơring čar Dak Lăk, kiăng hơdôm gơnong bruă hăng ƀon lan pơsit rơđah bruă mă, bruă dưi ngă rim thun, gum prăp rơmet mơnuih mă bruă, anăm ngă bruă bơrơkua ôh. Ƀơi anăp, pơƀut prăp rơmet djŏp mơta či ngă bruă amăng thun 2027, kiăng man pơkra hlâo hơdôm ring bruă kiăng yua hloh:“Pơphun ngă bruă anai pơlir hăng đĭ kyar bơwih ƀong, pơjing lu hơbô̆ bruă či ngă, biă ñu pơđĭ prăk pơhrui, pơplih tơlơi hơdip mơnuih ƀon sang. Tui anun, mrô sang anŏ rin ăt jing sa amăng hơdôm hơnong pơkă yom biă mơn. 20 boh să hơmâo ruah lĕ kiăng sem lăng tong ten anŏ hơget kiăng biă mă, laih anun hơmâo tơlơi rơkâo đĭ lăp djơ̆”./.