Ƀing khua mua lăng črăn tơlơi phiăn Hình Sự (čih pơkra glăi) tong ten, rơđah rơđông hăng bruă čih pơkra tơlơi phiăn phrâo laih dong bruă pok prong hơdră djru ba, djru khăp pap mơng kơnuk kơna. Tui anun, mơnuih ngă soh tơdah duh prăk pơsir pơkra glăi anŏ ngă soh amra sem lăng kiăng ngă tơdu ƀă tơlơi ngă soh gơñu, mơng anun pơsur pran glăm ba. Bơdjơ̆ nao tơlơi pơkă phak brơi pơdjai, ƀing khua mua bơtŭ ư lui hĭ brơi pơdjai ƀing ngă soh hăng 4 tơlơi ngă soh ngă rung răng amăng dêh čar anun lĕ tơlơi soh ngă rung răng, kơdong glăi ană mơnuih, ƀing blah wang kơdong glăi dêh čar hăng ƀing ngă pirăt kiăng kơdong glăi gong gai ƀon lan.

Ƀing khua mua rơkâo aka ƀu lui hĭ kơđi pơdjai mơnuih ngă soh hăng ƀing sĭ dŏp ma túy lu anih ƀudah ƀing pô ngă akŏ. Hơdôm tơlơi pơgôp hiăp amăng mông jơnum ăt bơtŭ ư hăng bruă črăn tơlơi phiăn hơmâo pơkra glăi hơdôm bruă ngă soh amăng plang internet tui bruă ngă soh, mơng prap lui, pơphun ngă, yua pơgăn mơng bruă prap lui amra pơgăn hĭ anŏ sat răm brơi mơnuih ƀôn sang hlâo kơ ƀing gơñu mơ-it prăk brơi ƀing plư pleč.