Tơdơi kơ 4 thun ngă tui, hrŏm hăng boh tơhnal dưi ngă laih, bruă ngă tui tơlơi phiăn anai ƀơi Lâm Đồng ăt dŏ lu tơlơi kơƀah. Bruă hyu pơtô lăi, mă hiăp pơgôp, pel ĕp, krăp lăng hăng pơsir tơlơi rơkâo đĭ aka ƀu ngă re se ôh; bruă mă mơ̆ng khul pel ĕp yua mơnuih ƀôn sang ruah đĭ, khul mơnuih krăp lăng tuh pơ alin kơ bruă plơi pla aka ƀu bơkơnar ôh. Lăp đing nao lĕ, tơlơi gum hrŏm mơ̆ng mơnuih ƀôn sang amăng bruă anai dŏ kơƀah, lơ̆m anun tơlơi phiăn amăng tơlơi ngă soh glăi pơhaih rơđah, ngă gun bruă krăp lăng ƀudah ƀu ngă tui tơlơi rơkâo tơdơi kơ krăp lăng aka ƀu rơđah rơđong ôh.
Tơnap tap hloh ƀuh rơđah ƀơi hơdôm boh plơi pla tơdơi kơ mơmut glăi hĭ, wơ̆t ƀôn ƀut amăng plơi prong hai. Yua mrô sang anŏ, akŏ mơnuih lu tui, pơphun jak iâu jơnum hăng mă hiăp pơgôp ƀơi anăp, khom kiăng hơmâo lu mông ƀiă, mơnuih ngă bruă hăng hơdră pơphun khom gêh găl.

Ơi Nguyễn Văn Dũng, Kơ-iăng khua Jơnum min mơnuih ƀôn sang să Hiệp Thạnh, tơring čar Lâm Đồng brơi thâo:
“Să gơmơi tơdơi kơ pơmut glăi hrŏ hĭ 50%, dŏ glăi 9 boh plơi đôč. Mah hnun, mrô mơnuih ƀôn sang jing lu tui năng ai truh 54.000 čô, mrô plơi pla ƀiă biă mă ñu 800 boh akŏ sang, yua kơ anun pơphun jơnum mă hiăp pơgôp ƀudah lăi pơthâo boh yom phun tơlơi jơnum hăng ƀơi anăp mơnuih ƀôn sang tơnap biă mă. Bruă plĕ hră ruah khua plơi phrâo anai, să gơmơi pok pơhai ngă djơ̆ tơlơi phiăn hăng tui tơlơi pơtrun mơ̆ng tơring čar, jing pơphun bruă ruah khua, mơnuih ƀôn sang pô yơh pơsit. Boh yom phun blung a lĕ jơnum mă hiăp pơgôp đĭ mơ̆ng mơnuih ƀôn sang mơtam. Samơ̆ ƀu djop ôh. Plơi pla hơmâo năng ai 1000 boh sang anŏ, čih hră jak iâu nao jơnum, kơnong 100 boh sang anŏ đôč ƀuh ƀô̆ mơta”.
Tui hăng tơlơi hơmâo sit nik anai brơi ƀuh, ngă tui tơlơi phiăn pơkă tơlơi dưi ngă khua pô kơ mơnuih ƀôn sang ƀu kơnong pơphun mă jơnum djơ̆ tơlơi pơkă đôč ôh, dŏ pơhlom brơi djop anŏ gêh găl kơ mơnuih ƀôn sang ngă hrŏm, djru pơgôp hiăp hăng pơsit hơdôm tơlơi kiăng amăng tơlơi dưi mơ̆ng ƀing gơñu. Lơ̆m jơlan hơdră pơphun dŏ lu tơlơi aka ƀu găl hăng mrô mơnuih, akŏ sang hăng plơi prong tơdơi kơ pơmut glăi, bruă pơđĭ tui tơlơi dưi ngă khua pô mơ̆ng mơnuih ƀôn sang gun hĭ.
Mơ̆ng bruă hơmâo sit nik anun, tơring čar Lâm Đồng rơkâo đĭ čih pơkra glăi, pơhrua nao dơ̆ng hơdôm tơlơi phiăn pơkă kiăng pơhlom tŭ ư sa hnơ̆ng ngă tui tơlơi dưi ngă khua pô amăng sang bruă mơdrô; čih pơkra plang ia rơgơi ba yua amăng măi komputer hơmâo không pơjing brơi hlâo, rơnoh pơkă sa hnơ̆ng djơ̆ lăp, hơdră ngă tui akŏ klôn hăng mrô rơnoh tong ten pioh kơ djop plơi pla, sang bruă pơyŭ ngă tui, dưi pơtruh nao rai hăng gơnong dlông. Tơring čar ăt rơkâo hăng Ding jum bruă čar čih pơkra hơdrôm hră pơtô ba hăng pok anih pơtô hrăm brơi mơnuih apăn bruă, khua mua ngă tui bruă anai.