Kual Dap Kơdư hơmâo ayuh hyiăng, lơ̆n mơnai hăng glai kyâo mơnong hơdip lu mơta jing anŏ gêh găl pioh kơsem min, pơđĭ tui bruă pla lu mơta pơjeh phun jrao akha kyâo, amăng anun hơmâo lu djuai phun pla jrao akha kyâo pla amăng gŭ đang kyâo glai gêh găl biă mă. Anih anom lơ̆n mơnai tơdơi kơ pơmut tơring čar ăt pok prong tui lơ̆n glai či pla phun jrao akha kyâo hăng bruă pơkra ming laih anun anih anom sĭ mơdrô prong tui soh. Rơngiao kơ phun sâm Ngọc Linh hăng phun Hồng Đăng Sâm hơmâo pơsit laih, lu tơring car plơi pla amăng kual Dap Kơdư kiăng ĕp hăng ruah mă dơ̆ng phun jrao akha kyâo yom pioh pla, phun pla djơ̆ găl hơmâo rơnoh bơwih ƀong huă hăng pơgang pioh lơ̆n glai laih anun pơphun pla tui anŏ či kiăng blơi mơ̆ng anom sĭ mơdrô. Kiăng pơtrut pơsur bơwih ƀong huă hăng bruă pla phun jrao akha kyâo, djru ba pơjeh pla, hơdră pla hăng wai lăng laih anun ĕp anih blơi pơhrui; laih dơ̆ng pơtong rơđah anŏ tŭ yua, tơlơi gơgrong ba amăng mơnuih ƀôn sang, plơi pla, pô wai lăng glai hăng sang bruă mơdrô.

Yă Nguyễn Thị Thu Hà, Khua kơčăo bruă mơ̆ng sang bruă mơdrô prong Group Trường Sinh lăi lĕ, phun jrao akha kyâo ƀơi kual Dap Kơdư hơmâo hơdôm anih pla prong biă mă samơ̆ aka ƀu hơmâo lu mơta ôh hăng dŏ glăi ƀơi bruă mă kơnong pla ba sĭ phun akha hăng hla ñu đôč. Sang bruă mơdrô kiăng biă mă akŏ pơjing anih pla prong hloh hăng pla lu pơjeh, djuai, hrŏm hăng bruă pơkra ming pơjing rai gơnam sĭ mơdrô ia jrao akha kyâo:

“Ƀing gơmơi amra ƀu dŏ glăi ƀơi bruă pla pơjing đôč ôh, khom pơdong sang măi pơkra ming pơjing rai gơnam sĭ mơdrô dưi djă pioh sui thun kah hăng ia jrao pơjrao duăm ruă, phun jrao akha kyâo dưi pơkra rai jing ia jrao ƀudah gơnam pơgang tơlơi suaih pral dưi ba yua hăng lu mơta gơnam yua pơkŏn pơgang tơlơi suaih pral mơnuih mơnam. Ƀu kơnong jing gơnam pơkra ming pioh mơñum đôč ôh, ƀing gơmơi amra ngă rai dưi ba yua pơkra ming gơnam ngă pơhiam, pơhrôp drơi jăn ƀô̆ mơta, tơlơi suaih pral dơ̆ng đơ đa”.

Lu khua mua nao jơnum lăi lĕ, dơ̆ng mơ̆ng tơlơi rơkâo truh pơ anih pla pơjing ba glăi boh tŭ yua dŏ lu tơlơi khom ngă. Blung hlâo lĕ, tơring čar, kual plơi pla khom jŭ yap glăi, dăp hơdră, sem lăng rek link kăng kual, tơring hơmâo anŏ gêh găl, ngă bruă tong ten hăng pô wai lăng glai, ngă gêh găl pla lu mơta pơjeh djuai phun pla, čuk brơi jơlan hăng ĕp anih blơi; rĭm kơ kual kiăng hơmâo hơdră pơgang glai, krăp lăng tong ten anŏ bơbeč djơ̆ mơ̆ng lơ̆n glai adai rơhuông, lơ̆n glai pla hăng ia bruih khom pơhlom djop.

Hrŏm hăng anun, pơtong rơđah gơnam pơkra ming hăng anih anom či blơi blung hlâo ruah mă gơnam yua boh thâo ia rơgơi, pơphun pơkă anih či pla; phun pla khom dưi sem lăng tong ten pơsit anăn, anih pla, anŏ pơjing rai  ia jrao, tơhnal pơkă hơdjă rơgoh, rơnuk rơnua kơ mơnuih yua laih anun khom thâo pơčrâo ten anih pla, pơkra ming djơ̆ mrô. Ơi Đoàn Ngọc Có-Kơ-iăng khua Gơnong bruă Ngă hmua hăng Ayuh hyiăng tơring čar Gia Lai brơi thâo:

“Truh thun 2030, akŏ bruă pơđĭ kyar phun jrao akha kyâo pla gah yŭ đang glai năng ai 31.000 hektar. Rơnoh sĭ mơdrô phun jrao akha kyâo Việt Nam yom pơphăn biă mă. Khă hnun, bruă pơđĭ kyar pla phun jrao akha kyâo khom lir hơbit hăng anih blơi, pơkra ming tong ten hăng ĕp anih blơi hơđong hnun kah pơđĭ kyar hơđong”.

Dơ̆ng mơ̆ng hơdôm tơlơi pơgôp hiăp, tơlơi rơkâo đĭ amăng mông jơnum, tơlơi kiăng či ngă brơi kơ kual Dap Kơdư lĕ kiăng jŭ yap glăi abih kual glai pla djơ̆ găl, ruah mă hơdră lông ngă hlâo tŭ yua ƀơ̆i, hlâo kơ pok pơhư prong; laih dơ̆ng, pơđĭ kyar phun jrao akha kyâo amăng glai, gah yŭ tơ-ui kyâo pơprong, kiăng hơmâo tơlơi gum hrŏm mơ̆ng ƀing ngă bruă mơdrô, djru tuh pơ alin prăk kăk, ba yua măi mok ia rơgơi phrâo amăng bruă mă hăng hơmâo jơlan gah sĭ mơdrô rơđah rơđong. Mơ̆ng anun kah dưi pơjing rai gơnam sĭ mơdrô ia jrao akha kyâo hơmâo rơnoh yom, djru pơhrui glăi prăk kăk kơ mơnuih ƀôn sang ngă hmua pô wai lăng glai rưng, pơjing atur pơgang glai rưng hăng pơđĭ kyar bruă pla jrao akha kyâo sui thun.