Pơhiăp ƀơi mông ngă lơphet, Khua Ping gah, Khua mir sir ơi Tô Lâm rơkâo sang hră pơplih phrâo, pơđĭ tui dong anŏ klă bruă pơtô pơjuăt, pơtŏp rơguăt mơnuih mă bruă rơgơi laih anun djru brơi mơnuih rơgơi kơ lŏn ia. Laih dong, pơtrut kơsem min boh thâo, pơthâo brơi anŏ găl či čih pơkra giong tơlơi phiăn, pơplih hơbŏ bruă đĭ kyar laih anun pơđĭ tui boh tŭ yua mă yua mơnuih mă bruă, anŏ hơmâo mơ̆ng dêh čar.

Sang hră kiăng pơtô pơjuăt pơlir hăng bruă pơkŏn dong, mă yua boh thâo, ba yua boh thâo mrô, pơmut bruă kơsem min boh thâo hăng anŏ hơmâo sit nik, wơ̆t hăng anŏ kiăng đĭ kyar mơ̆ng rim boh tơring, sang bruă bơwih ƀong. Khua ping gah, khua mir sir lăi, kiăng kơsem min boh thâo dlăm hloh, khŏm tuh pơ alin hơđong kơ mơnuih mă bruă, hră pơ-ar, hăng grup kơsem min kơtang. Lăng yom bruă kơsem min blung a, pơlir hăng pơtô pơjuăt tơdơi kơ hrăm giong gưl prong; pơtrut kơsem min pơlir hơbit lu bruă mă pơkŏn, laih anun ngă hrŏm hăng hơdôm sang bruă boh thâo rơgơi mơbruă. Pơtrut pơsur pơčrông sai, pơkhă nao rai hơmâo phun tơhnal, pơpŭ kơ anŏ tơpă sit, laih anun djru brơi kiăng ƀing kơhnăk boh thâo gir kơsem min hơdôm bruă tơnap. Găn rơgao 50 thun akŏ pơdong hăng đĭ kyar, truh ră anai Sang hră Đại học Kinh tế ƀon prong Hồ Chí Minh hơmâo giăm 40.000 čô čơđai tui hrăm.