Tui lăi pơthâo, truh ră anai, abih tih ngăn drăp amăng 6 boh phương truh giăm 3.900 klai prăk. Amăng anun, hơdôm phương Tân Lập, Tân An hăng Ea Kao hơmâo ngă rơgao pơhrui ngăn drăp đăo lăng hlâo ha thun. Samơ̆, bruă jao prăk tuh pơ alin man pơdong ăt dŏ aset. Hăng mrô 570 klai prăk, hơdôm boh phương phrâo jao mă yua 42 klai prăk, dưm dưm 7,42%.

Khua mua hơdôm boh phương hơmâo lăi pơthâo giăm 70 boh tơhnal ngă gun kiăng pơsir hĭ, amăng anun hơmâo tơlơi tơnap tap kơ lŏn pơdong plơi pla phrâo hăng pơhrui glăi lŏn mơnai. Khua Jơnum min mơnuih ƀon sang tơring čar Dak Lak ơi Đỗ Hữu Huy rơkâo djop phương hơmâo akŏ bruă tong ten tui rĭm bruă, pơsit tong tơlơi glăm ba mơng rĭm čô mơnuih, hrơi blan ngă pơgiong hăng pơlir boh than ba glăi sit nik hrŏm hăng sem lăng bruă jao hơmâo ngă.