VOV4.Jarai - Mơguah lơ 25/1, ƀơi Sang bruă Kơnuk kơna, Khua apăn bruă Ping gah, Kơ-iăng khua dêh čar ơi Lê Minh Khái git gai mông jơnum hăng hơdôm ding jum, anom bruă, pơgôp hiăp čih pơkra pơgiong hĭ tơlơi pơtrun mơng Kơnuk kơna kơ jơlan hơdră hơkrŭ glăi, pơđĭ kyar bơwih ƀong huă - mơnuih mơnam. Pơhiăp klah čun ƀơi mông jơnum, Kơ-iăng khua dêh čar ơi Lê Minh Khái kiăng Ding jum Dăp akŏ bruă hăng tuh pơ plai pơhmư̆ tơlơi pơgôp hiăp mơng ding jum, anom bruă, ngă pơgiong hĭ tơlơi pơtrun, lăng glăi abih bang mơnuih kiăng djru, kơsem min pơhrua tui mơnuih kiăng djru lăp djơ̆. Kơ-iăng khua dêh čar pơtă hlâo, bruă pok pơhai ngă bruă khŏm djơ̆ hơdră, kiăo tui Tơlơi klah čun mơng Ding jum kơđi čar hăng Tơlơi pơtrun mơng Khua git gai pơ ala mơnuih ƀon sang dêh čar, yua dah anai lĕ jơlan hơdră prong hăng mrô prăk giăm 350 rơbâo klai prăk, lu bruă khŏm ngă hrŏm djơ̆ hăng bruă tuh pơ plai pơkă rơwang găp ƀrô. Tơlơi pơtrun khŏm lăi rơđah, bruă ngă tui khŏm djơ̆, ƀu dưi hơmâo tơlơi soh ôh.

Siu H’Mai: Pơblang