Ơi Lê Hữu Trí (grup Khánh Hòa) brơi thâo, sa, dua boh tơhnal mơng črăn tơlơi phiăn mơng tơlơi sit nik ngă tui ăt dŏ lu tơlơi gun. Ñu rơkâo pơhrua črăn pơblang brơi boh pơhiăp ƀudah tơlơi pơkă kơ bruă tong ten kiăng pơsir bruă ngă soh (gơgrong ngă ƀudah yua ƀu thâo) hăng tơlơi ngă soh kơtang kơ bruă ngă soh ƀơi Črăn 2, hrŏm hăng hơdôm boh tơhnal kiăng ngă tơdu ƀiă ƀơi Črăn 9 kiăng dưi ngă pơmut hrŏm. Kơ tơlơi pơkă bruă pơsir hĭ hăng bruă rŭ pơkra anŏ sat răm, lu khua mua rơkâo aka ƀu kiăng đĭ ha wŏt tơdah aka ƀu lăng nao tong ten anŏ bơdjơ̆ nao tui bruă ngă hăng hơdôm tơlơi bơdjơ̆ sat. Yua anun đing nao mă yua sit nik bruă pơsir hĭ blung a, ruh hĭ hơdôm ring bruă ngă soh, pơagaih hĭ anih ngă hơƀak jrăk, duh prăk prăk pơhrui ča čot; laih dong pơsit tong lơm hơpă kiăng mă glăi hră pơsit bruă bơwih ƀong ƀudah brơi pơdơi hlao.

Kơ bruă pơsir hĭ tơlơi ngă soh tơlơi pơkă djơ̆ tơlơi phiăn, yă Mai Phương Hoa (grup Ninh Bình) rơkâo hơdôm bruă hơpă kiăng sui hrơi amăng pơsir hĭ đĭ 3 thun kiăng kơsem min tong ten, lăp djơ̆ tơlơi sit nik, anăm brơi sui hơdôm bruă ƀu kiăng. Bơdjơ̆ nao bruă phak prăk, črăn tơlơi phiăn pơsir bruă ngă soh tơlơi pơkă djơ̆ tơlơi phiăn hơmâo pơkă mrô prăk lu hloh amăng pơsir hĭ tơlơi ngă soh lĕ 1,5 klai hăng ƀing mơnuih hăng 3 klai hăng hơdôm khul grup. Yua anun, mrô prăk lu hloh đĭ 1,5 klai pơhmu hăng tơlơi phiăn ră anai. Ñu brơi thâo, kiăng pơmĭn tong ten, lăng glăi rơđah djop mơta kơ mrô prăk phak, kiăng pơhlôm brơi tong ten amăng tơlơi phiăn, huăi bơdjơ̆ nao lu tơlơi hơdip mơda, tơlơi bơwih ƀong huă, sĭ mơdrô mơng mơnuih ƀôn sang, anom bruă bơwih ƀong.