VOV4.Jarai-Tơdơi kơ sa rơwư̆ pơdơi mơak thun phrâo Nhâm Dần 2022, lơ 7/2, plơi prong Ƀuôn Ma Thuôt, tơring čar Dak Lak brơi čơđai sang hră glăi hrăm pơ sang hră laih. Lơ̆m anun klin kheng ăt dŏ ƀă hyu kơtang đôč, bruă brơi glăi hrăm pơ sang hră, khom gleng nao kơ hơdră pơhlôm pơgang klin ngă tong ten biă mă. Ngă tui djơ̆ tơlơi pơtrun pơgang klin laih anun djop sang hră ăt pơtum gleng nao pơtô hrăm djơ̆ găl hăng tơlơi pơhing phrâo.

Nai pơtô hăng čơđai sang hră ƀơi plơi prong Ƀuôn Ma Thuôt glăi pơ sang hră yơh tơdơi kơ sa rơwư̆ hrăm mơ̆ng ataih

Ƀơi sang hră gưl dua Lạc Long Quân, plơi prong Ƀuôn Ma Thuôt, hơmâo 680 čô čơđai sang hră anih 7,8,9 glăi hrăm pơ sang hră soh. Tui hluai tơlơi gêh găl pơđing nao klin kheng covid 19 hiư̆m pă thơ, pơphun brơi kơ čơđai sang hră mơ̆ng anih 7-9 glăi hrăm hră pơ sang hră tơdơi kơ abih hrơi pơdơi ngă yang thun phrâo djuai ania. Tơdơi kơ sa rơwư̆ pơdơi hrăm pơ sang hră, dŏ hrăm pơ sang hăng hơdră hră lăng amăng tivi ƀudah măi telephône rơgơi yua hŭi klin kheng, truh lơ 7/2, čơđai sang hră hăng nai pơtô amăng plơi prong Ƀuôn Ma Thuôt, tơring čar Dak Lak mut hrăm bơyan tal dua juăt lăi kỳ 2 hăng tơlơi mơak phrâo.

Abih bang hok mơak, kjăp pran jua nao hrăm hră hăng pơgang klin covid 19 tong ten biă mă.

Nay Jek: Pơblang