VOV4.Jarai - Tơdơi kơ 1 wơ̆t hrơi tơjuh pơphun brơi hrăm pơ sang hră, čơđai muai mầm non, čơđai sang hră gưl sa hăng čơđai hrăm anih 6 ƀơi plơi prong Buôn Ma Thuột, tơring čar Dak Lăk khŏm brơi hrăm glăi online mơng lơ 21/2/2022 truh kơ hrơi hơmâo tơlơi pơtrun phrâo. Jơnum min mơnuih ƀon sang plơi prong Buôn Ma Thuột hơmâo tơlơi pơtrun brơi čơđai anih muai, gưl sa hăng čơđai hrăm anih 6 pơdơi nao hrăm pơ sang hră lĕ yua klin covid-19 glăk kơtang.

Truh mông anai, hơmâo laih rơbêh 40 čô nai pơtô hăng rơbêh 420 čô čơđai ƀă klin SARS-CoV-2. Ƀing čơđai yŭ 11 thun aka ƀu tlâ̆o vaccine pơgang Covid-19 ôh. Kiăng pơhlôm tơlơi suaih pral kơ ƀing čơđai hăng nai pơtô, Jơnum min mơnuih ƀon sang plơi prong Buôn Ma Thuột, tơring čar Dak Lăk git gai dơdăng anai pơdơi hĭ nao hrăm pơ sang hră hăng sang hră muai, gưl sa hăng čơđai anih 6 mơng lơ 21/2/2022 truh kơ hrơi hơmâo tơlơi pơtrun phrâo dong. Jao kơ Anom bruă pơtô hăng pơjăt čih pơphun brơi hrăm mơng ataih hăng hơdôm anih hrăm hơmâo lăi nao.

Siu H’Mai: Pơblang