Jơlan rơdêh đuăi hmar Khánh Hoà - Buôn Ma Thuột, jơlan pơtruh čư̆ hăng ia rơsĭ, jơlan mơ̆ blung a pơmin hơmâo lơ̆m pit rơpơi đôč hăng mơnuih ƀôn sang Dak Lăk, ră anai glăk pơphun man pơkra laih. Ơi Trần Hồng Tiến, Khua ping gah tơring glông Krông Pač, tơring čar Dak Lăk lăi, lơ̆m phrâo lăi pơthâo, lu mơnuih dŏ đing đăo mơn kơ tơlơi dưi ngă mơ̆ng kơčăo bruă rơngiă giăm 22.000 klai prăk, lu hloh 3 wơ̆t pơhmu hăng prăk pơhrui sa thun mơ̆ng tơring čar. Samơ̆ truh Khua mua pơ ala mơnuih ƀôn sang dêh čar ta pơsit tuh pơ alin amăng blan 6/2022, krĕp ha thun tơdơi kơ man pơkra, jơlan rơdêh đuăi hmar Khánh Hoà - Buôn Ma Thuột pơtrut đĭ kơtang biă amăng bruă bơwih ƀong huă - mơnuih mơnam mơ̆ng tơring čar.

Ơi Trần Hồng Tiến hok mơ-ak, mơ̆ng akŏ thun 2022 truh ră anai, lu anom bruă tuh pơ alin nao sem lăng, laih anun hơmâo laih rơbêh 11.000 klai prăk pioh tuh pơ a;in pơ Krông Pač. Kơnong amăng thun anai, 4 kơčăo bruă gah pơkra măi mok, ngă hmua, sang măi pơkra boh troh hăng mrô prăk năng ai ñu 1.500 klai  amra pơphun ngă ƀơi tơring glông.

“Mơ̆ng tơlơi gêh gal hơmâo jơlan rơdêh đuăi hmar găn nao Krông Pač hăng rơbêh 34km, hăng 4 anih pơtruh nao rai, gơmơi prăp rơmet man pơkra hơdôm sang măi pơkra gơnam, hơdôm anih logistics, hơdôm kual či iâu pơthưr anom bruă tuh pơ alin laih anun hơmâo tơring čar pơsit brơi laih, ba pơmut amăng hơnong pơkă pơđĭ kyar tơring čar. Yua hnun mơn, hrơi blan rơgao, lu anom bruă tuh pơ alin hơmâo lăp đing nao Krông Pač. Anai jing tơlơi klă biă mă”.

Truh mông anai, Dak Lăk jing tơring čar blung a hăng sa hơjăn ñu yơh pơ Dap Kơdư pơphun man pơkra jơlan rơdêh đuăi hmar pơtruh hăng hơdôm kual bơwih ƀong pơprong. Jơlan rơdêh đuăi hmar Khánh Hoà - Buôn Ma Thuột glông 117,5km, hơmâo 4 glông rơdêh, dưi pơđuăi 80-100km/mông, him lăng amra pơkra giong amăng rơnuč thun 2025. Ơi Võ Ngọc Tuyên, Khua Gơnong bruă man pơphô hăng tuh pơ alin tơring čar Dak Lăk brơi thâo, mơ̆ng hrơi man pơkra truh ră anai, kơčăo bruă anai brơi ƀuh lu tơlơi gêh gal bơwih ƀong; tơring čar hơmâo ngă, laih anun pre čơkă lu phun kông ti, grup bơwih ƀong nao tơña ngă hrŏm.

“Tơlơi pơmin mơ̆ng mơnuih ƀôn sang, anom bơwih ƀong, anom bruă tuh pơ alin amra nao hlâo, prăp rơmet ruah mă kơčăo bruă či tuh pơ alin. 5 blan akŏ thun anai, hơmâo lu Kông ti pơprong, grup bơwih ƀong rai pơ Dak Lăk sem lăng, hơduah ĕp hăng ruah mă, pơsit tuh pơ alin. Kah hăng tuh pơ alin pơkra tơdron taih golf, sang sĭ mơdrô prong, hơmâo lu kơčăo bruă man pơkra sang măi pơkra gơnam...Ƀing gơmơi glăk gir djru ba đah mơ̆ng tañ hơmâo hră pơsit brơi tuh pơ alin hăng tŭ ư anom bruă gơgrong tuh pơ alin”.

Hăng tơring čar Dak Nông, Jơlan rơdêh đuăi hmar Gia Nghĩa - Chơn Thành glăk hơmâo khua mua pơ ala sem lăng pơsit tuh pơ alin, djru pok jơlan pơhưč lu anom bruă tuh pơ alin amăng tơring čar. Rơnuč blan 3 phrâo rơgao, Dak Nông hơmâo brơi hră pơsit tuh pơ alin 4 kơčăo bruă hăng mrô prăk 1.700 klai. Laih dong, tơring kĭ pơkôl ngă hrŏm hăng 4 anom bruă tuh alin, hăng mrô prăk 8,4 klai dolar Mi (dưm dưm hăng rơbêh 213.000 klai prăk). Giăm ha mơkrah mrô anun mơ̆ng Grup bơwih ƀong TH hơmâo kơčăo bruă akŏ pơjing kual rông rơmô djet ia tơsâo tui rơnuk phrâo, hrŏm hăng kual ngă hmua mă yua boh thâo măi mok phrâo, pok prong gah bruă pơkra pơtâo čuah, apui lơtrik phrâo...

Mơnuih mă bruă sông kơtang Thái Hương, Khua khul pơphô hơdră đĭ kyar Grup TH brơi thâo, Dak Nông lăi hơjăn, Dap Kơdư lăi hrŏm glăk pơƀut djŏp tơlơi gêh gal či pơhưč anom bruă tuh pơ alin prong.

“Tơlơi gêh gal blung a či truh kih lơ̆m ngă bruă lĕ tơlơi rơgơi wai lăng mơ̆ng ƀing tuh pơ alin. Dua lĕ tơlơi hơmâo tơlơi gêh gal mơ̆ng bruă anun ƀơi tơring čar dưi ngă dơ̆ pă. Ta khŏm kiăo tui tơlơi gêh gal mơ̆ng kual anun ƀu djơ̆ ƀu hơmâo mơ̆ gir djă glăi. Laih anun pơđĭ kyar khŏm hơmâo kual logistics či pơkra gơnam klă hloh. Klâo lĕ gơnang kơ gong gai, biă ñu ƀing khua jing yôm biă mă. Hơmâo djŏp 3 mơta tơlơi anun amra dưi ngă kơčăo bruă truh kih mơtăm”.

Tơlơi pơtrun mrô 23 thun 2022 mơ̆ng Ding jum kơđi čar kơ hơdră pơđĭ kyar bơwih ƀong huă - mơnuih mơnam kual Dap Kơdư truh pơ thun 2030, lăng nao pơ anăp thun 2045, dưi ngă hơnong pơkă truh pơ thun 2030 pơkra giong 5 glông jơlan rơdêh đuăi hmar yôm phun glông 565km hơmâo: Qui Nhơn - Pleiku, Khánh Hoà - Buôn Ma Thuột, Gia Nghĩa - Chơn Thành, Tân Phú  - Bảo Lộc, Bảo Lộc - Liên Khương. Laih dong, sem lăng tuh pơ alin pơkra jơlan đuăi hmar Kơdư - Dơnung gah Yŭ găn nao Ngọc Hồi - Pleiku - Buôn Ma Thuột - Gia Nghĩa glông 355km. Hơdôm glông jơlan rơdêh đuăi hmar, biă ñu jơlan KƠdư - Dơnung gah Yŭ, jơlan Ngọc Hồi - Pleiku - Buôn Ma Thuột - Gia Nghĩa hơmâo tuh pơ alin amra jing “arăt drah”, jing “tơlang rŏng” mơ̆ng kual Dap Kơdư, pơtrut bơwih ƀong huă - mơnuih mơnam kơtang hloh.

Ƀơi mông jơnum pơphun ngă tui tơlơi pơtrun mrô 23, Khua dêh čar ơi Phạm Minh Chính pơsit, bruă tuh pơ alin anih anom jơlan nao rai phun ƀơi kual Dap Kơdư lĕ kiăng pơtrut kơtang pơtruh nao rai amăng lăm kual hăng kual pơkŏn. Mơ̆ng anun, hơmâo anih đĭ kyar phrâo, hăng kual sang măi, plơi prong, bơwih brơi, pơđĭ tui nua lŏn...Khă hnun, hơdôm boh tơring kual Dap Kơdư ƀu dưi tơguan kơ Kơnuk kơna ta đôč ôh mơ̆ khŏm prăp rơmet hlâo, iâu pơthưr anom bruă tuh pơ alin, tui anun kah jơlan rơdêh đuăi hmar găn nao kual lŏn anai mơ̆ng tañ hơmâo prăk man pơkra. Khua dêh čar ơi Phạm Minh Chính lăi:“Prăk kăk mă mơ̆ng pơpă, bruă blung a lĕ prăk kăk? Ră anai hơmâo hơdôm hơdră ngă bruă: Sa lĕ tuh pơ alin kơnuk kơna gơgrong, tal dua mơ̆ng ƀing tuh pơ alin, tal klâo lĕ ngă hrŏm kơnuk kơna hăng  mơnuih ƀôn sang. Ta kơnong tơguan kơ Kơnuk kơna đôč jing hơmâo mă hơdôm anun yơh, khŏm hơmâo lu anom gum ngă, mơ̆ng Kơnuk kơna (hơmâo Gơnong dlông, tơring čar). Gum tơngan ngă bruă, ƀu djơ̆ tơring čar ngă mă pô jing ƀu dưi ôh, kơnong Kơnuk kơna hai ƀu dưi lơi. Giong anun ta khŏm ngă hrŏm kơnuk kơna hăng hơjăn pô tui Tơlơi phiăn hơmâo pơtrun laih, giong anun pơhưč tuh pơ alin mơ̆ng dêh čar tač rơngiao jing ta khŏm čih pơkra tơlơi pơkă, djru bruă tuh pơ alin rơhuaih, amuñ ƀiă”.

Link tơlơi čih mrô 2: https://vov4.vov.vn/jarai/toloi-hing-ang-monuih-topul-thoi-su-xa-hoi/cran-toloi-cih-jolan-rodeh-duai-hmar-hang-toloi-cang-romang-di-kyar-hmar-hloh-ko-kual-dap-kodu-toloi-cih-mro-2-dap-kodu-kiang-bia-ma-jolan-rodeh-duai-hmar-454310.vov4