Tơlơi čih mrô 1: Gong apui lơtrik brêng abih, anom bơwih ƀong huač abih prăk

VOV4.Jarai - Amăng 2 thun, 2020-2021, jing hrơi blan hơmâo lu tơlơi phara biă hăng Dap Kơdư, amăng bruă ngă pơhưč tuh pơ plai tơdah yap tui nua kơčăo bruă hơmâo ngă. Lơ̆m anun, kơnong hơdôm kơčăo bruă pơkra apui lơtrik pơkĕ jua angin, hơmâo mă yua rơbêh 85 rơbâo klai prăk, čang rơmang ba glăi tŭ yua bơwih ƀong huă, mơnuih mơnam. Samơ̆, lơ̆m hrơi blan pioh ngă kơčăo bruă anai abih laih, Dap Kơdư jing kual hơmâo lu tơlơi pioh glăi ƀu klă ôh. Hơdôm kơčăo bruă hmao ngă giong, dưi ƀong nua FIT mơng kơnuk kơna ăt ƀu truh gah lơi; hơdôm kơčăo bruă aka ƀu ngă giong jing ngă tơnap kơ anom bơwih ƀong...hrŏm hăng lu tơlơi soh mơng bruă ngă pơgao, ngă soh, glăk tơguan pel ĕp, pơsir kơđi.

Ƀơi jơlan prang mrô 14, Jơlan Hồ Chí Minh găn nao pơ tơring glông Dak Song, tơring čar Dak Nông, hơdôm tourbin apui lơtrik pơkĕ jua angin kô̆ pôh, glông rơbêh ha rơtuh met, samơ̆ kret kruai ƀu wơ̆t dar ôh ƀơi kơnua čư̆ mơtah hiam. Amăng lu blan, mah hơmâo angin rơnang hă kơtang, samơ̆ tourbin anai ăt dŏ hnong mơn, ƀu hơmâo pơkra rai sa kilowat mông apui pơpă ôh. Ƀơi lŏn, hơdôm anih hơmâo čuk pơkra ăt pioh lui gong apui, ačang apui tơrơkuk, samơ̆ ƀu hơmâo rơdêh nao rai ôh. Ơi Chẩu Văn Sơn, Khua kông ti TNHH sa ding kơna pơkra apui Dak N’Drung 1,2 hăng 3 brơi thâo, anom bơwih ƀong ñu tuh pơ plai rơbêh 15.000 klai prak ƀơi anai, pơkă hrơi ngă giong, pơkĕ jua apui hlâo kơ lơ 31/10/2021, laih anun hơmâo sĭ apui hăng nua 1.928 prăk/kwh. Samơ̆ kông ti lăi gơñu ƀu dưi dong tah. Rơnuč blan 10 thun hlâo, kơnong hơmâo hơdôm gong apui pơđuăi hăng jua angin đôč amăng mrô 89 ƀĕ gong hơmâo pơkra giong. Mơng anun truh ră anai, anom bơwih ƀong khŏm pơplih hơdră tuh pơ plai, pơkra tañ kiăng tañ ƀong prăk, hơdai nao pơkra kaih ƀiă dong đah mơng dưi dăi ƀiă:“Tơdơi kơ lơ 31/10/2021 lơ̆m ƀu hơmâo nua FIT dong tah, bruă pơkra apui gah ƀing gơmơi kaih hloh mơtăm. Yua dah rơgao laih hrơi hơmâo ƀong nua FIT, tơdah ta ngă tañ lĕ rơngiă prăk lu hloh, pơkra kaih ƀiă đah mơng plai ƀiă huač prăk apah arăng pơkra”.

Hơdôm gong apui pơkĕ jua angin hơdôm rơtuh klai ƀơi Dap Kơdư tơnguan či brêng đôč yơh

Sang măi pơkĕ jua angin Dak Ndrung pơkra kiăng tañ đah mơng tañ ƀong prăk, hơdai pơkra kaih dong đah mơng dưi dăi ƀiă.

Ăt ƀu dưi ngă tui hrơi pơkă lơ 31/10/2021, Sang măi pơkra apui lơtrik pơkĕ jua angin Nam Bình 1 (tơring glông Dak Song, tơring čar Dak Nông), jing ƀu thâo anŏ ngă dong tah, khŏm rơngiă prăk lu yơh. Ơi Lê Văn Tiến, Kơiăng khua Sang măi apui lơtrik pơkĕ jua angin Nam Bình 1, brơi thâo:“Hơmâo pơkra giong giăm ha thun laih, samơ̆ sang măi hơmâo prăk tuh pơ plai rơbêh 1 rơbâo klai ăt dŏ hnong đôč. Yap rim blan anom bơwih ƀong ăt khŏm pioh prăk ngă bruă mơn, yap lăng mrô prăk rơngiă lĕ 10 klai prăk/blan”.

Amăng hơdôm boh tơring čar kual Dap Kơdư, Gia Lai hơmâo pơkra apui lơtrik pơkĕ jua angin prong hloh, hăng 17 kơčăo bruă, mrô apui pơđuăi năng nai 1.200MW. Laih anun bruă pơkra apui lơtrik pơkĕ jua angin ƀơi Gia Lai ăt kar kăi mơn, 5 ƀong/5 rơngiă, lơ̆m hơmâo hơdôm rơtuh gong tourbin, jua pơđuăi rơbêh 620MW ƀơi 10 kơčăo bruă ƀu dưi ƀong nua FIT, dŏ dơnong tui anun đôč yơh, ngă kơ lu anom bơwih ƀong ƀu suk dŏ dong ƀong huă yua dah prăk pioh pơkra lu biă mă, prăk pơhrui glăi lĕ ƀu hơmâo ôh. Ăt kah hăng lu sang măi pơkra apui lơtrik pơkĕ jua angin mơn, sa, dua anom bơwih ƀong pơkra apui lơtrik hăng angin ƀơi Gia Lai lăi, tơlơi tơblut anai yua mơng lu bruă mơn, kah hăng klin Covid-19 ngă pơkra kaih, tơlơi pơsit dưi mă yua, sĭ apui tơnap đơi mơn, pô tuh pơ plai jing bưp lu tơlơi ƀu klă biă. Khă hnun hai, tui hăng ơi Nguyễn Hữu Quế, Khua gơnong bruă dưm dăp kơčăo bruă hăng tuh pơ plai tơring čar Gia Lai, amom bơwih ƀong pơkra apui pơkĕ jua angin kơnong kơ jăm glăi ñu pô đôč yơh. Ƀơi hrơi mông tơring čar jak iâu tuh pơ plai thun 2020, klin Covid-19 glăk kơtang. Hơdôm tơlơi djru mơng Kơnuk kơna bơdjơ̆ nao apui lơtrik jua angin, ăt hơmâo pơtrun mơng hlâo laih kiăng pô pơkra sem lăng, ruah mă. Laih anun tơlơi rơđah rơđông hloh anun lĕ ƀơi mông anun mơn ăt hơmâo kơčăo bruă pơkra giong tañ hloh, anun jing bruă ta ngă kaih ƀu dưi jăm kơ gong gai hăng tơlơi djru mơng kơnuk kơna ôh: “Hơmâo pô gơgrong pơkra gơñu ngă bruă tañ, gir biă mă, samơ̆ hơmâo mơn pô ngă kaih yua hơmâo tơlơi ƀu djơ̆ hrŏm tơdruă gơñu, bơ anai lĕ hơdră djru hrŏm. Hơmâo mơn pô tuh pơ plai gơñu pơkra tơdơi samơ̆ truh lơ 31/10 hơmâo ngă giong laih, ăt hơmâo mơn pô ngă kaih, yua dah ƀu hơmâo mơnuih mă bruă, ƀudah hră kĭ hăng pô gơgrong pơkra ƀu pơhlôm djơ̆ hrơi pơkă jing kaih hĭ. Anai lĕ bruă mơng ƀing gơgrong tuh pơ plai ƀu djơ̆ yua Kơnuk kơna ôh”.

Bruă hơmâo rơgao kơ ha mơkrah kơčăo bruă ƀu jing, mah phun tơhnal ñu mơng lu tơlơi, samơ̆ phun ñu lĕ yua pô tuh pơ plai ngă bruă tơdu, bơwih ƀong hơmâo hă rơngiă prăk soh sel jing tơlơi juăt ƀuh laih. Samơ̆, bruă pơkra apui pơkĕ jua angin ƀơi Dap kơdư, ngă rơbêh ha mơkrah amăng mrô rơbêh 85 rơbâo klai jing rơngiă đôč đač, ƀu djơ̆ yua sa ha bruă jŭ yap prăk kăk pioh sĭ mơdrô đôč ôh. Mơng hrơi tơring čar lăi pơthâo bruă tuh pơ plai, truh kơ anom bơwih ƀong čih anăn, ngă hră pơ-ar...truh kơ abih hrơi pơkă, hrơi blan pioh ngă bruă giăm 2 thun đôč, bơ klin Covid-19 hơmâo pơhŭi hlâo hlâo kơ anun laih. Samơ̆ hơdôm boh tơring čar ăt luh nao tuh pơ plai mơn, hơdôm anom bơwih ƀong ăt tuh pơ plai mơn, ƀu pơmin kơ tơlơi truh hơget ôh. Tơlơi pơmin lông ngă lăng, plĕ ha wơ̆t kiăng ƀong hlao mơtăm jing ba truh lu tơlơi ƀu klă pơkŏn./.

Công Bắc: Čih - Siu H’Mai: Pơblang