Mơ̆ng akŏ thun 2017, jơlan bĕ gah dơnung plơi prong Bảo Lộc, tơring čar Lâm Đồng man pơkra, mơnuih ƀôn sang amăng kual mơak biă mă ƀuh tơlơi anun. Tơdah jơlan anai dưi čuk pơkra giong, sit mơ̆n ƀu kơnong ngă hluai rơdêh rô nao rai ƀơi jơlan prong 20 mut nao pơ plơi prong Bảo Lộc đôč ôh, dŏ ngă gêh găl brơi bruă pơtrut bơwih ƀong huă hăng tơlơi hơdip mơda mơnuih ƀôn sang amăng kual. Ơi Phạm Minh Thuận, dŏ ƀơi phường Lộc Sơn, plơi prong Bảo Lộc brơi thâo, mơnuih ƀôn sang pơ anai, čang rơmang biă mă jơlan anai, pơkra dưi nao rai hluai ƀiă, samơ̆ ƀu thaoa tah yua hơgĕt jơlan hlăk dŏ čuk pơkra mơ̆, lui hĭ du bla. Lơ̆m pơdơi hĭ čuk pơkra jơlan anai hlăk du bla mơ̆ ngă kơ lu črăn bruă laih pơkra klă hiam, ră anai răm tui hĭ, atur jơlan tơluč hrŏ trun, čơđang pơčah hĭ….ngă huač prăk kơnuk kơna soh sel.

“Jơlan anai hrup hăng arăt drah rô phun kơ plơi prong Bảo Lộc lah. Mơnuih ƀôn sang rai dŏ pơ anai sui laih, hơdip mơda mơ̆ng thun 1954 đưm đă truh ră anai, lơ̆m pok prong čuk pơkra jơlan glông sit mơ̆n amra pơtrut tui bruă bơwih ƀong huă kơ plơi prong. Ăt čang rơmang gong gai kơnuk kơna plơi prong khom pơtruh hiăp rơkâo kơ khua mua pơ ala mơnuih ƀôn sang dêh čar đing nao ƀiă kiăng ngă pơgiong hĭ jơlan anai, amăng krah plơi prong mơ̆ lui hĭ pơrơkă pơrơkưng gun jơlan nao rai hlăk pơkra du bla aka ƀu giong huač prăk kăk biă mă”.

Bruă pơdơi hĭ čuk pơkra jơlan du bla tui anun, ngă kơ lu ring bruă pơrơkă pơrơkưng lŏn, pơtâo, ngă gun krah jơlan ba truh lu wơ̆t hơmâo tơlơi truh rơdêh pơjrŏm nao rai djai mơnuih krah jơlan anai. Blan 3/2023, sa čô đah rơkơi54 thun mơgăt rơdêh ôtô pơgiăng tơčô ñu 4 thun, lơ̆m găn nao pơ tơdrông tua aka ƀu hơmâo anŏ pơgang dua bơnah, črăn jơlan găn nao ƀơi să Lộc Nga, plơi prong Bảo Lộc lê̆ trun hĭ amăng hnoh ia djai abih dua ơi tơčô gơ̆.

Tŏ tui kơ anun dơ̆ng, rơnuč thun 2023, sa čô tơdăm ăt djai yua đĭ rơdêh thut lê̆ trun amăng luh ƀơi jơlan hup prong, čơđang pơčah. Tui hăng ơi Hoàng Xuân Hậu, dŏ ƀơi plơi Thôn 3, să Đại Lào, plơi prong Bảo Lộc, mah gong gai kơnuk kơna hlă laih gai pơthâo anih hŭi rơhyưt, boh nik ñu pơthâo brơi kơ mơnuih mơ̆ng anih pơkŏn nao rai.

“Mơnuih ƀôn sang rô nao rai lu, jơlan răm kơtang djơh hăng anai hŭi biă. Tơdah ta đĭ mơ̆ng anai nao pơ anăp adih ƀu kơđiăng ƀu thâo ôh anih ƀlung hup, ƀuh mă jih gah adih, pơmin lĕ jơlan huăi ƀah ôh, djơ̆ biă ñu jơlan ƀah hĭ ƀlung hup dơlăm truh 3 met mơkrah hăng 4 met mơtam, adai hơjan hlim nao rai mơmŏt ƀu thâo ƀuh ôh. Ƀuh mơnuih anih pơkŏn nao, gơmơi lăi brơi gơñu thâo, rơdêh ôtô nao, khom pơčrâo brơi arăng nao kơđiăng hăng weh hĭ anih ƀlung hup hŭi rơhyưt. Čang rơmang kơnuk kơna, djop gưl sang bruă čar đing nao tong ten kơ bruă čuk pơkra jơlan anai”.

Tui hăng ơi Trần Đình Văn, Kơ-iăng khua git gai ping gah tơring čar, Khua grup pơ ala mơnuih ƀôn sang dêh čar tơring čar Lâm Đồng lĕ, bruă čuk pơkra jơlan du bla tui anun lu thun laih lui hĭ, ngă kơ črăn jơlan bĕ gah dơnung plơi prong Bảo Lộc răm kơtang, ngă huač soh sel prăk kơnuk kơna laih anun ba truh lu tơlơi sat pơkŏn, mơnuih ƀôn sang ruah khua lăi pơthâo laih. Grup khua mua pơ ala mơnuih ƀôn sang dêh čar tơring čar Lâm Đồng ăt rơkâo đĭ laih mơ̆n hăng kơnuk kơna djru brơi dơ̆ng 320 klai prăk pioh čuk pơkra pơgiong hĭ thun blan pơ anăp.

“Jơlan bĕ gah dơnung Bảo Lộc anai grup khua mua pơ ala mơnuih ƀôn sang dêh čar ăt rơkâo laih lu wơ̆t. Črăn jơlan anai tom hơmâo lu tơlơi truh rơdêh pơjrŏm răm ƀăm kơtang, laih anun rô nao rai tơnap mơ̆n, ngă hơƀak jrak anih dŏ jum dar amăng kual….Phrâo anai, Kơ-iăng khua dêh čar ơi Lê Minh Khái ăt hơmâo tơlơi pơhiăp lăi nao laih mơ̆n kơ tơlơi anai. Rơđah biă ñu, amra pơhrua nao dơ̆ng 320 klai prăk tuh pơ alin ngă pơgiong jơlan bĕ ƀơi Bảo Lộc”.

Ring bruă čuk pơkra jơlan nao rai gah dơnung plơi prong Bảo Lộc jing ring bruă pơhrua nao dơ̆ng amăng kơčăo bruă ming pơkra glăi jơlan prong 20 găn nao ƀơi 2 boh tơring čar Đồng Nai hăng Lâm Đồng tui hăng hơdră BT, čuk pơkra hăng pơjao glăi. Ring bruă anai, yau Ding jum Jơlan glông hăng Pơdŭ pơgiăng pô tuh pơ alin hăng Kông ty pơčruh ngăn BT20-Cửu Long ngă pô tuh pơ alin. Ring bruă anai, glông ataih kơnong 15 km đôč, samơ̆ rơnoh prăk tuh pơ alin truh 720 klai prăk. Rơnuč thun 2020, lơ̆m hlăk čuk pơkra giong 70% črăn bruă, tŭ tơ anŏ pơdơi hĭ, mơ̆ng anun truh ră anai aka ƀu ming pơkra glăi ôh, lăi kơƀah prăk.