Hơjan na nao hơdôm hrơi ngă lŏn tơluč dlưh kriăng čư̆ dlông 15 met amăng kual plơi pla mơnuih ƀôn sang dŏ či phường 3, plơi prong Đà Lạt, tơring čar Lâm Đồng. Gong gai kơnuk kơna plơi prong brơi pơdŭ đuăi tañ ječ ameč hơdôm boh sang anŏ dŏ giăm anih hŭi rơhyưt. Bruă pơdŭ đuăi anai dưi hơmâo Jơnum min mơnuih ƀôn sang phường 3, plơi prong Đà Lạt ngă tui mơtam mơguah lơ 5/9, hăng 5 boh sang anŏ, 13 čô mơnuih, dŏ ƀơi jơlan kơsep mrô 23 jơlan An Bình.

Hlâo kơ anun, mlam lơ 4/9, mơnuih ƀôn sang amăng kual jua pơtuh prong, lŏn čơđang hăng ƀuh kriăng čư̆ taluy dlông 15 met mơ̆ng jơlan kơčep anai lŏn tơhlŏm, lŏn tơhroh trun, kơtit dlưh pơnăng sang ơi Nguyễn Văn Phước mrô 136 jơlan Hà Huy Tập. Lơ̆m hơmâo tơlơi truh, amăng sang hơmâo 6 čô mơnuih, bưng băi mơ̆n ƀu hơmâo hlơi rơka ôh, hlong đuăi tañ nao dŏ pơ anih pơkŏn jăng jai. Ƀơi anăp kơ tơlơi či truh tơnap yua bơbeč mơ̆ng kơthel mrô 3 ngă, khua mua gong gai kơnuk kơna plơi pla brơi 5 boh sang anŏ pơkŏn dŏ giăm anun hăng 13 čô mơnuih khom tơbiă đuăi, nao dŏ pơ anih pơkŏn jăng jai kiăng rơnuk rơnua. Laih dơ̆ng, dăng hrĕ pơgăn hĭ jơlan nao pơ anih hŭi rơhyưt anun, kiăng pơgang hơđong kông ngăn dram gơnam hăng tơlơi hơdip mơda mơnuih ƀôn sang.