Amăng anih man pơdong prong 11 ektar, sang hră Hoàng Việt hơmâo djop gơnam yua pơtô hrăm phrâo hloh, rơbêh 400 čô mơnuih apăn bruă, nai pơtô hăng mơnuih mă bruă glăk dŏ pơtô hrăm brơi giăm 3.400 čô čơđai hrăm mơng gưl sa truh gưl tlâo rai mơng rơbêh 20 boh tơring čar, plơi prong amăng đơ đam dêh čar. Đĭ pơhiăp amăng mông mă bruă, kơ-iăng khua dêh čar lăng yôm tơlơi yak nao mơng tơring čar Dak Lak amăng ngă tui tơlơi črâo trun mơng Ping gah, Kơnuk kơna amăng tuh pơ alin brơi kơ bruă pơtô hrăm, čang rơmang khua mua tơring čar, gơnong bruă pơtô pơjuăt kah hăng ƀing nai pơtô, čơđai sang hră Hoàng Việt tŏ ngă tui hơdôm boh than dưi ngă, anăm pơdơi hrưn đĭ klă dong amăng bruă pơtô hrăm brơi ƀing čơđai.

Ƀrô tal anai, Kơ-iăng khua dêh čar ơi Nguyễn Hòa Bình hơmâo jao gơnam pioh hơdor hăng ƀơk anung gơnam bơyan blan bơrơmi brơi ƀing čơđai sang hră Hoàng Việt. Hlâo anun, mơmŏt lơ 14/9, Kơ-iăng khua dêh čar ơi Nguyễn Hòa Bình hơmâo nao lăng jơlan hơdră ngui bơyan blan bơrơmi “Pơtŭ ngă bơngač jơlan yak nao” ƀơi tơring čar Dak Lak, jao 1.700 anung gơnam hơmâo prăk djru hrăm hră, rơdêh dang wang hăng anung gơnam brơi kơ ƀing čơđai tơnap tap.