Jơnum anai kiăng ĕp lăng, pơtrut pơsur djop ring bruă tơdơi kơ jơnum lok 13 hăng pơčrong sai lu hơdră, pơsir tơlơi tơnap tap, gun gan, pơtrut ngă tui hmar hloh djop ring bruă, akŏ bruă. Pơhiăp ƀơi mông jơnum, Khua dêh čar ơi Phạm Minh Chính lăi rơđah, truh ră anai, anăn tơhnal pơkă bruă mă mơ̆ Khul pơčrâo bruă brơi ngă hơmâo 40 akŏ bruă prong amăng abih bang 92 akŏ bruă amăng 3 mơta bruă phun kah hăng: Jơlan rơdêh, jơlan rơdêh treng hăng tơdron rơdêh por, găn nao ƀơi 48 boh tơring čar, ƀôn prong.

Khua dêh čar lăi pơtong, mơ̆ng ră anai truh abih thun 2025, kơnong dŏ 15 blan đôč, bruă či ngă dŏ prong hăng lu biă mă. Yua kơ anun, Khua dêh čar rơkâo brơi pơčrong sai pơtrut hmar bruă mă, kiăng pơhlôm hơđong anŏ kjăp, boh tŭ yua, ngă tui tơlơi thâo thăi tom găn rơgao mơ̆ng lu kơčăo bruă kah hăng dăng hrĕ apui lơtrik 500 kV arăt tal 3.