Amăng 6 blan akŏ thun anai, Anom bruă ia jrao tơring glông Di Linh, tơring čar Lâm Đồng hơmâo tŭ mă rơbêh 250 čô čơđai hơmâo tơlơi truh rơka rơkač, amăng anun ha mơkrah lĕ tơlơi truh rơdêh pơjrŏm. Ơi ia jrao Lê Công Tuấn, Kơ-iăng Khua anom bruă ia jrao brơi thâo, yua hơmâo ngă hrŏm lu sang bruă, tơlơi pơhing ngă kơ čơđai muai rơka rơkač, ruă nuă biă mă ñu ƀlung ia hrŏ hĭ ƀiă.

“Amăng thun 2024 anai tơlơi pơhing čơđai muai hơmâo tơlơi truh ruă nuă ƀơi tơring glông Di Linh hrŏ ƀiă laih pơkă hăng hơdôm thun hlâo adih, tơlơi truh ngă kơ čơđai ruă nuă rơbêh 50%. Yua hơmâo anŏ ngă hrŏm hăng djop sang hră, pơtô pơblang kơ čơđai anăm đĭ rơdêh thut ôh tơdah aka ƀu djop thun, mơnuih ƀôn sang đing nao kơ ană bă hloh anun tơlơi truh yua rơbat hyu dŏ dong ƀong huă hăng tơlơi truh ƀlung ia ăt hrŏ trun hĭ mơ̆n pơkă hăng hơdôm thun hlâo”.

Hăng tơlơi tơnap tap phara, jơlan glông nao rai lu ia čroh noh, dơnao anet prong hăng bơnư̆ pơkong ia, pơgang hŭi ƀlung ia, djop anom bruă, djop sang bruă ƀơi tơring glông Di Linh hơmâo pok pơhai hlă gai lăi pơthâo anih hŭi rơhyưt ƀơi ia dơnao, bơnư̆ pơkong ia; phai lui pông kơsung pơgang ƀlung ia, pong gai, dăng hrĕ, pơkra rơkĭ…..ƀơi djop ia dơnao. Pơtô pơblang brơi mơnuih ƀôn sang pơgang mă, dăng hrĕ, dưm anŏ bơkơnăl kiăng thâo anih giăm hang ia dơnao, ia hnoh, bơnư̆ pơkong ia anet prong mơ̆ng sang anŏ pô. Tui hăng yă Ninh Thị Một, Khua grup plơi mrô 17, tơring kual Di Linh, tơring glông Di Linh, tơdơi kơ pơtô lăi, jak iâu mơnuih ƀôn sang brơi ngă tui djơ̆ hơdôm tơlơi pơtô brơi pơgang ƀlung ia ƀơi dơnao sang anŏ.

"Tơdơi kơ pơtô pơblang lĕ mơnuih ƀôn sang mă yua prăk kăk pô pioh blơi gơnam pơkra ming war pơga kiăng pơthâo hăng pơgăn ƀơi hang ia dơnao, đah mơ̆ng pơgăn hĭ, čơđai nao giăm hang ia hŭi kơ ƀlung ia tui tơlơi pơtô mơ̆ng Khul khua mua pơhlôm pơgang mơ̆ng tơring kual”.

Amai Lưu Thị Thủy Chung dŏ ƀơi grup mrô 17, tơring kual Di Linh, tơring glông Di Linh, tơring čar Lâm Đồng brơi thâo, sang anŏ gơñu hơmâo klơi sa boh dơnao dơlăm mơ̆n prong 10 met amăng đang pioh bruih kơ hmua đang. Kiăng pơhlôm rơnuk rơnua, ñu ngă war pơga jum dar, ngă bah amăng mut nao rai khom kăl hĭ hăng khuă, ƀu brơi mơnuih pơkŏn mut nao rai, hŭi hơmâo tơlơi truh sat.

“Dơnao anai kâo yua pruih phun pla, yua kơ anun hơmâo ƀing neh apăn bruă khul đah kơmơi pơtô brơi akă hrĕ, dưm pông kơsu hăng pông rơdêh sô, hŭi hlơi găn rơgao nao rai lê̆ trun thâo hơpai mă pông kơsu djă hrĕ anun huăi ƀlung ia. Bơ jum dar dơnao lĕ hơmâo war pơgang bư̆ hĭ jum dar laih anun ngă bah amăng pơgăn ƀu brơi mut nao rai hŭi rơhyưt. Tơdah sang anŏ kiăng kah pok brơi bah amăng mut nao”.

Bruă pơtô hrăm luai ia hăng pơtô brơi hơdră pơhlôm rơnuk rơnua sit čơđai trun amăng ia, dưi hơmâo tơring glông Di Linh đing nao pok pơhai. Bơyan pơdơi prong phrâo anai, hơmâo hơdôm hơpluh anih pơtô hrăm luai pioh kơ čơđai muai ƀơi djop să, tơring kual. Tui hăng yă Hà Thị Thùy Linh, Khua khul đah kơmơi mut phung tơring glông Di Linh, tơring čar Lâm Đồng, jing ding kơna git gai mơ̆ng khul đah kơmơi djru hyu pơtô lăi brơi mơnuih ƀôn sang thâo hluh tong ten hloh bruă pơhlôm pơgang tơlơi truh kơ čơđai muai, hŭi ƀlung ia.

“Ngă hrŏm hăng djop anom bruă, khul grup ƀơi plơi pla mut hrŏm ngă bruă hyu pơtô pơblang djop anih, pok anih pơtô hrăm luai ia kơ čơđai muai ană bă ƀing đah kơmơi mut phung amăng tơring glông. Mơ̆ng anun, kiăng pơđĭ tui tơlơi thâo hluh, tơlơi thâo kơ đah kơmơi hăng čơđai muai pơgang ƀlung ia, kiăng pơhlôm brơi tơlơi rơnuk rơnua hơđong amăng tơlơi dŏ dong ƀong huă. Ngă gêh găl kơ čơđai muai hơmâo anih kiăng pơđĭ kyar drơi jăn pô hlom bôm hloh”.

Djop anih pơtô luai ia pok brơi anun, djru pơtô kơ ƀing čơđai muai thâo sit trun amăng ia, nao mơnơi ia dơnao ƀudah ia čroh hnoh ăt kah hăng kiăng pơhrăm drơi jăn găng anrăng hloh hăng hơmâo anih ngui ngor mơak, tŭ yua amăng bơyan pơdơi prong. Adơi Nguyễn Thiên Di, 13 thun, să Liên Đầm, tơring glông Di Linh, tơring čar Lâm Đồng lăi:

“Kâo hrăm luai ia hơmâo 2 wơ̆t hrơi tơjuh, ƀing nai pơtô brơi. Bơyan pơdơi prong hrăm luai ia kiăng mơnơi ia huăi ƀlung ôh laih anun pơhrăm brơi drơi jăn găng añrăng hloh”.

Adơi Trịnh Ngọc Bảo Châu, 12 thun, dŏ amăng să Liên Đầm mơ̆n brơi thâo:

“Kâo hrăm hơdôm mơta tơlơi pơtô luai ia, kiăng pơgang hlâo tơdah ta lê̆ trun amăng ia dơnao, ia krông, ia čroh hnoh ƀudah nao mơnơi ia dơnao dơlăm thâo ta thâo luai ia, ta luai nao pơ hang huăi ƀlung ia”.

Hăng bruă gum hrŏm mơ̆ng abih bang gong gai kơnuk kơna laih anun djop khul grup mơnuih tơpuôl, anun tơlơi pơhing čơđai hơmâo tơlơi truh ƀlung ia, ruă nuă ƀơi tơring glông Di Linh hơmâo tơlơi pơblih klă tui laih, ngă gêh găl brơi kơ čơđai hơmâo anih ngui mơak, pơđĭ kyar hiam drơi jăn, pran jua.