Glăk ruah ƀañ ƀơi sang sĭ ƀañ bơyan blan bơrơmi rôk jơlan Lê Thánh Tông, plơi prong Buôn Ma Thuột, amai Phùng Thị Hạnh, phường Tân An, plơi prong Buôn Ma Thuột brơi thâo, ană bă hor ƀong ƀañ biă mă. Thun anai, ƀañ hơmâo djop mơta tui hơđăp, hơmâo anăn apăn sĭ mơdrô hmư̆ hing:

“Lơm kâo ruah ƀañ ƀong bơyan blan bơrơmi anai, kâo amra ruah hơdôm ƀañ ƀong hmư̆ hing sui laih kiăng pơhlôm brơi, laih dong hơmâo pơkra hiam hăng ƀing jơman mơn”.

Sĭ mơdrô ƀañ amăng bơyan blan bơrơmi sui rơbêh 30 thun, amai Nguyễn Thị Tuyết Mai, dŏ amăng phường Tân Lợi, plơi prong Buôn Ma Thuột brơi thâo, ƀañ sĭ amăng bơyan blan bơrơmi anai pioh yua ƀiă hrơi, yua anun ƀu mă ba sĭ ha wŏt mơ̆ sui sui mă ha wŏt. Tơlơi anai kiăng huăi pioh lui sui kah hăng pơhlôm brơi ƀañ jơman:

“Kâo mă ƀañ pioh sĭ sui sui ha wŏt, mơ̆ ƀu mă ba rai ha wŏt ôh, sui mă ha wŏt kah pơhlôm brơi ƀañ ƀong hiam hơdjă kiăng mơnuih blơi yua hơđong pran jua. Anai lĕ tơlơi đing nao blung a”.

Ƀơi sang sĭ mơdrô Go Buôn Ma Thuột, sang sĭ ƀañ ƀong bơyan blan bơrơmi hơmâo sang sĭ mơdrô dưm hrŏm kual anih sĭ boh troh kiăng ƀañ pơhlôm hyuh lăp djơ̆. Ơi Bùi Văn Quân, Khua sang sĭ mơdrô Go Buôn Ma Thuột brơi thâo:

“Ƀing gơmơi wai lăng gơnam tam mơng blơi mut truh ba pơdă prưng kiăng pơhlôm brơi hyuh lăp djơ̆ kah pioh yua sui. Ră anai ƀañ ƀong dưi djă pioh klă mơng 25-27 độ C hăng ƀing gơmơi ăt pơdă lu ƀañ ƀong yua ƀiă hrơi kiăng plai ƀiă yua gơnam djă pioh sui”.

Pơhlôm brơi tơlơi suaih pral kơ mơnuih blơi yua gơnam, bruă pel ĕp pơhlôm mơnong ƀong huă hơdjă hlâo, amăng bơyan ngui hăng tơdơi bơyan ngui blan bơrơmi hơdôm tơring čar Dak Lak đing nao. Tui anun Jơnum min mơnuih ƀôn sang tơring čar hơmâo akŏ pơjing 2 grup pel ĕp pơlir hơbit djop gơnong bruă amăng pơhlôm mơnong ƀong huă hơdjă ƀrô bơyan blan bơrơmi thun 2024 ƀơi plơi prong Buôn Ma Thuột, Buôn Hồ hăng hơdôm tơring glông Krông Pač, Ea Kar, Čư̆ Kuiñ hăng Lak. Hrŏm hăng anun anom bruă wai lăng gơnam sĭ mơdrô tơring čar Dak Lak hăng hơdôm boh tơring glông, plơi prong ăt akŏ pơjing grup pel ĕp kiăng hmao tlôn pơgang, pơgăn, pơsir hơdôm bruă ngă soh amăng pơkra, sĭ mơdrô djop mơta amăng bơyan ngui blan bơrơmi thun anai.

Amăng hơdôm tal pel ĕp mơng hơdôm grup đing nao pel ĕp kơ gơnam pioh pơkra, mă yua djop gơnam, ia ƀâo mơnâo pioh pơkra gơnam, tơlơi pơhlôm mơnong ƀong huă hơdjă amăng pơkra, djă pioh mơnong ƀong huă; pel ĕp kơ anih pơkra, bruă pơkra, hrơi blan mă yua; hră čih anăn gơnam, nua sĭ…Ơi Vương Minh Sơn, kơ-iăng khua anom wai lăng sĭ mơdrô gơnam tam tơring čar Dak Lak brơi thâo, djop grup pel ĕp ăt hơmâo pơlir hăng pơtô pơblang tơl anih anom pơkra, sĭ mơdrô hơdôm tơlơi pơkă mơng tơlơi phiăn amăng sĭ mơdrô gơnam hăng pơhlôm mơnong ƀong hơdjă, bruă ngă tui tơlơi pơkă kơ lăi pơthâo hơnong pơkă, lăi pơthâo gơnam tam hăng tơlơi pơkă kơ gơnam tam hơdjă.

“Ƀing gơmơi git gai hơdôm anom bruă đing nao ngă hră pơ-ar gơnam tam pơdah tong ten anih anom pơkra. Dua dong lĕ anăn apăn gơnam tam, amăng anun kiăng čih djop tơlơi ƀơi hruh, sit biă ñu pơsit tong gơnam hơdjă, hrơi blan mă yua, hrơi blan pơkra, hrơi blan djă pioh. Tơdơi ƀuh ngă soh amra pơsir djơ̆ tơlơi pơkă amăng tơlơi phiăn”.

Mơng pel ĕp sit nik, truh ră anai Anom wai lăng sĭ mơdrô gơnam mrô 1 ƀuh dua anih sĭ mơdrô amăng plơi prong Buôn Ma Thuột ngă soh amăng sĭ mơdrô gơnam ƀu čih tong ten anih pơkra, hơmâo 42 ƀañ ƀong bơyan blan bơrơmi (ƀañ 500g/sa boh), 50 kĭ boh tăo uă krô, rơbêh 2.300 gơnam ngui brơi ƀing čơđai djop mơta yua ƀu klă ôh (hơmâo phao, thong, đao, hrăo), hăng abih tih nua ñu rơbêh 33 klăk prăk. Djop gơnam anai lêng gơnam sĭ dŏp, ƀu hơmâo hră pơ-ar djơ̆ tơlơi phiăn. Grup hơmâo pơsir hĭ bruă ngă soh hăng 2 anom bruă sĭ mơdrô anai hăng rơkâo pơrai hĭ abih gơnam anai./.