Amăng mông jơnum, Khua dêh čar ơi Phạm Minh Chính ol kơdol pran jua mơ-ĭt tơlơi tơña bla, gum djru, rơngôt hrŏm mơ̆ng Ding jum kơđi čar, Grŭp git gai Ping gah, Khua git gai Ping gah, Khua mir sir dêh čar ta ơi Tô Lâm hăng mơ̆ng khul git gai Ping gah, Kơnuk kơna truh hăng hơdôm bôh ƀirô, plơi pla, anom bruă hăng biă ñu hơdôm sang anô̆ hmâo mơnuih djai, rơngiă, rơka ruă yua kơ kơthel tal 3 ngă.

Khua dêh čar ta brơi thâo, hăng pran jua gum djru nao rai tơdruă, hla hnil gôm hla tơ̆i, Jơnum min djop djuai ania mơnuih mơnam dêh čar Việt Nam hmâo ngă lơphet pok phun gum djru neh wa răm rai yua kơthel tal 3 ngă, hăng abih bang prăk truh ră anai lĕ rơbêh kơ 1.000 klai prăk. Gong gai dêh čar hmâo djru laih hơdôm bôh anih anom rơbêh kơ 350 klai prăk, 300 tơn braih... hăng glăk yap glăi pioh gum djru. Khua dêh čar lăi rơđah ƀing ta khom ngă tui khut khăt hơdôm bruă pơsir anô̆ răm rai kơthel tal 3 ngă yua kơ pran jua djuai ania, thâo tơngia neh wa, yua kơ tơlơi hơdip mơda mơ̆ng mơnuih ƀôn sang hăng tơhnal pơkă lĕ: Ƀu pioh mơnuih ƀôn sang hơpă kơƀah gơnam ƀong, sum ao buh, rơpa glar, rơ-ŏt, kơƀah ia hơdjă yua, ƀu hmâo anih dô̆, hơdôm gơnam kiăng yua rim hrơi./.