VOV4.Jarai - Giăm 2 wơ̆t hrơi tơjuh dong truh laih Tê̆t Nhâm dần 2022, anom bruă tuai čuă ngui Lâm Đồng glăk prăp lui gơnam tam, mơnuih mă bruă bơwih brơi klă hloh kơ ƀing tuai

Nao čuă lăng Đang Ánh Sáng Đà Lạt - anih tuai hyu ngui hơmâo arăng pơhmu kar hăng anih hiam hăng adai brơi ƀing hlăk ai phin rup amăng hrơi anai, anih ñu hơmâo apui kơđen, hơmâo tơlơi adoh, pĕ gong brô̆, hơmâo ia iŏm hiam biă mă hơmâo anom bruă prăp lui giong laih, prăp lui ƀhiao či bơwih brơi kơ ƀing tuai nao ngui. Ơi Phan Minh Trường, Khua git gai anih ngui ngor Đang Ánh Sáng Đà Lạt brơi thâo, rơngiao kơ pơđĭ tui gơnam bơwih brơi kơ tuai, bruă pơgang klin Covid-19 ăt hơmâo anom bruă ngă tui klă mơn.

“Gơmơi prăp lui djŏp gơnam yua pơgang klin kơ mơnuih mă bruă, mơng khăn gôm, mơnil pơging, bơnal čut tơngan. Ƀing tuai nao ngui pơ đang Ánh Sáng hơmâo pơkă hyuh drơi jăn, pruih tơngan hăng ia jrao hlâo či mut nao. Gơmơi prăp lui djŏp mơta wơ̆t hăng bruă pơgang klin, ƀu kơnong lăi pơthâo ƀơi anom bruă đôč ôh mơ̆ gơmơi nao čih anăn lăi pơthâo hăng Sang ia jrao phường 8 hăng Gơnong bruă ia jrao Lâm Đồng”.

Ha bơnah đang Ánh Sáng Đà Lạt hơmâo prăp lui giong laih bơwih brơi kơ tuai.

Ƀu kơnong ƀơi hơdôm kual, anih čuă ngui phrâo, hơdôm anih hyu ngui juăt hmư̆ hing mơng đưm hlâo ƀơi Đà Lạt kah hăng: Thiền viện Trúc Lâm, Thung Lũng Tình Yêu, Drai ia Prenn, Drai ia Datanla, Kơnua čư̆ Mộng Mơ, Đang bơnga plơi prong hăng lu anih čuă lăng đang hmua dong ăt hơmâo prăp lui klă djŏp mơta, mơnuih mă bruă, bơwih brơi kơ tuai čuă ngui.

Bruă pok jơlan nao rai kiăng plai ƀiă dun rơdêh ƀơi plơi prong ăt hơmâo Jơnum min mơnuih ƀon sang Đà Lạt glăk ngă pơgiong.

Tui hăng ơi Nguyễn Viết Vân, Khua gơnong bruă gru grua, bơkơjăp drơi jăn hăng tuai čuă ngui Lâm Đồng, truh mông anai, mơng hơdôm anih đih pơdơi truh kơ anih ƀong huă, anih hyu ngui ƀơi anai lêng pơhlôm djŏp mơta bơwih brơi kơ ƀing tuai. Amăng anun, tơlơi rơnuk rơnua, pơhlôm pơgang klin Covid-19 ăt hơmâo lăng ba mơn. Hrŏm hăng anun, anom bruă tuai čuă ngui hơmâo ngă hrŏm hăng hơdôm anom bruă amăng tơring čar hyu pel ĕp, pơtô brơi hơdôm anom bruă bơwih brơi tuai pơplih ming hơdôm tơlơi aka ƀu djơ̆ tơdah hơmâo, bơwih brơi djŏp tơlơi kiăng amăng hrơi ngui thun phrâo, tơlơi kiăng đih pơdơi mơng ƀing tuai lơ̆m nao ngui pơ Đà Lạt - Lâm Đồng amăng hrơi tê̆t pơ anăp.

“Abih bang anih lêng kơ pơphun pơtŏp bruă laih, prăp lui hơdôm tơlơi bơdjơ̆ nao bruă pơgang klin tui tơlơi pơtrun mơng sang ia jrao. Hrŏm hăng anun, hơdôm anih brơi tuai đih pơdơi lêng kơ pơkra ming, anih čuă ngui hơmâo tuh pơ plai, pơkra gơnam phrâo, biă ñu hơmâo tơlơi bơwih brơi phrâo hloh, ngă pơhưč ƀing tuai nao ngui pơ Đà Lạt - Lâm Đồng. Anom bruă ăt hơmâo ngă hrŏm hăng hơdôm anom bruă bơdjơ̆ nao hăng plơi prong Đà Lạt prăp lui gơnam tam, rơnuk rơnua jơlan nao rai, hyu lăng, pel ĕp, pơtô ba hơdôm anom bruă bơwih brơi ƀing tuai ngui ngor čơkă thun phrâo samơ̆ khŏm rơnuk rơnua mơn”.

Quang Sáng: Čih - Siu H’Mai: Pơblang