VOV4.Jarai - Lơ 5/7, Jơnum min mơnuih ƀôn sang plơi prong Đà Lạt (Lâm Đồng) brơi thâo plơi prong hmâo pơdŏng laih Grŭp hyu pel ĕp dlai tlô hăng hơdră phrâo măi mok rơnuk anai kiăng kơtưn bruă wai lăng pơgang dlai tlô, bŏng glăi hăng tơlơi phă dlai tlô, sua mă lŏn glăk ngă tơnap ƀơi plơi prong. Grŭp hyu mă bruă anai hmâo 7 čô mơnuih, yua kơ Kơ-iăng Khua Anom wai lăng dlai kyâu plơi prong Đà Lạt ngă Khua Grŭp, ƀing ding kơna dô̆ glăi lĕ mơnuih mă bruă, mơnuih mă gah bruă măi mok mơng hơdôm bôh anom pô dlai hăng tơhan wai lăng dlai tlô.

Bruă mă mơng Grŭp lĕ mă yua hơdôm mơta măi mok phrâo rơnuk anai kah hăng flycam, hơdôm rŭp mă mơng êgrăng ayuh Google, gru rŭp ƀơi rơhuông adai... kiăng pel ĕp dlai tlô, djru bruă pơgang hăng pơlar dlai tlô, thâo tañ hơdôm tơlơi ngă soh, hơdôm tơlơi pơplih mơng dlai tlô hăng lŏn pla kyâu. Bruă pơdŏng Grŭp pel ĕp dlai tlô hăng mă yua măi mok phrâo rơnuk anai amra djru pơplih pơkra, pơgăn hăng pơsir hmao tlôn hơdôm tơlơi phă dlai tlô, sua mă lŏn glăk jing hang tơngia biă ƀơi plơi prong anai./.

Siu H’ Prăk: Pơblang