VOV4.Jarai - Amăng hơdôm hrơi huă pơsat ơi pơtao Hùng Vương, hơmâo lu tuai nao čuă ngui pơ Đà Lạt, Lâm Đồng. Ƀơi pra yang Âu Lạc lĕ sa amăng hơdôm anih čuă ngui gưl dêh čar ƀơi anih čuă ngui drai ia Prenn hơmâo pơphun ngă yang huă pơsat ơi pơtao Hùng Vương, pơhưč lu tuai hăng mơnuih ƀon sang nao ngui hrŏm.

Lu tuai čuă ngui nao pơ Đà Lạt amăng hrơi huă pơsat ơi pơtao Hùng

Hăng anăn pơphun “Pơpŭ ang mơyang kơ ơi pơtao”, hrơi huă pơsat ơi pơtao Hùng Vương pơphun yôm phăn, hăng 3 mơta phun anun lĕ: Pơyơr đĭ gơnam kơ Ơi pơtao, ngă yang tui gru grua hăng tŭi ñang kơ ơi pơtao ƀơi hơdôm pra yang dah kơdư, tong krah hăng dơnung. Hrŏm hăng mông ngă yang, amăng hrơi huă pơsat ơi pơtao Hùng Vương thun anai, tơring čar Lâm Đồng pơphun wŏt hơdôm mông adôh suang, ngui hơdôm tơlơi ngui đưm hơmâo lu mơnuih mut hrŏm anun lĕ: đĭ tơmeh pik mơmuă, ayun suang gai, gôm mơta taih pơčah gŏ lŏn, ngui kơ tướng, sang čơ blơi gơnam mơng plơi pla… kiăng kơ lăi pơthâo gru grua sô hơđăp mơng mơnuih ƀon sang Việt Nam.

Siu Đoan: Pơblang