Hrơi blan rơgao, bruă tuai čuă ngui Đà Lạt pơphun glăi kơdok kơdor glăi yơh tơdơi kơ sa rơwư̆ tơ̆i đưn ƀudah tơ̆i dơnuai yua klin Covid 19 ngă, plơi prong bơnga anai hơmâo lu tơlơi ƀu klă pơdjơ̆ nao. Rơđah biă ñu, tơlơi pơhing arăng hyu jak, hyu apah ĕp tuai glăi jưh pơ sang jưh tuai pô ƀudah pơgô̆ tuai nao ngui pơ đang hmua, đang bơnga ƀing apah prăk brơi hyu ĕp tuai, ngă lŭk pŭk amăng bruă mă đơ đa ba hyu sĭ mơdrô gơnam ƀơi akiăng jơlan, sĭ mơdrô mơnong ƀu klă, nua pơmă hloh. Thâo yơh bruă čơkă tuai jing bruă sĭ mơdrô pơhrui prăk lu, gong gai kơnuk kơna plơi prong Đà Lạt gir run pơblih ngă hiam jơlan glông, rơhaih rô nao rai amăng plơi prong, kơtưn bruă git gai wai lăng hmao pơsir hĭ hơdôm tơlơi ƀu klă ngă gun, ngă sat.

Thiếu tá, ơi Trương Quang Vũ, Grup tơhan pơlih hyu ĕp tơlơi soh gah bơwih ƀong huă, mơ̆ng anom bruă Kông an Đà Lạt lăi, hơdôm tơlơi hyu jak, hơdui mă tuai, bơsua tuai hrơi blan rơgao tơhan pơlih grup gơñu khom nao khă hăng ƀư̆ pơkra mơtam bruă ngă djơh hăng anun.

“Djop sang bruă kơnuk kơna khom ĕp lăng re se, brơi djop sang bruă sĭ mơdrô khom ngă hră ƀuăn ƀu apah prăk ƀing ba hyu tuai, jak iâu pơgô̆ tuai ôh, yua ngă hnun ba truh tơlơi bơsua, ngă gong jơlan, pơčrâo brơi tuai hyu dŏ tui anŏ pô sĭ mơdrô kiăng, ngă tui anun ƀu hiam ôh, rơngiă tơlơi rơnuk rơnua hơđong ană plơi pla”.

Đà Lạt anih nao ngui pơhưč biă mă tuai nao ngui

Tui hăng ơi Nguyễn Viết Vân, Khua Gơnong bruă gru grua, Pơrơguăt drơi jăn hăng Tuai čuă ngui tơring čar Lâm Đồng, hrom hăng bruă ngă pơđĭ tui boh tŭ yua, pơđĭ kyar gơnam mă bruă bơwih brơi kơ tuai hyu ngui hiam klă hơđong kjăp tui anŏ gêh găl phara hơjăn, tơring čar hơmâo jak iâu pơtô lăi mơnuih ƀôn sang pơđĭ tui tơlơi thâo hluh, gơgrong phun bruă pơgang anŏ hiam ayuh hyiăng anih dŏ jum dar, laih dơ̆ng djă pioh hăng pơđĭ tui tơlơi dŏ dong ƀong huă hiam mơnuih Đà Lạt mơ̆ng đưm, rơ-un muih hiam klă, thâo jum tuai.

“Hrơi blan pơ anăp adih, ƀing gơmơi ăt ngă klă bruă mă pơtô lăi, kơtưn pel ĕp tơlơi pơhing pơđĭ trun nua, hơdui ba, jak iâu, pơgô̆ tuai thơ khom pơsir tơpă djơ̆ tơlơi phiăn. Ngă hiư̆m pă akŏ pơjing rup rap hiam klă mơ̆ng đưm mơnuih Đà Lạt-Lâm Đồng klă, rơgơi, rơ-un rơnang, tơpă, thâo jum tuai; kiăng kơ ƀing tuai amăng dêh čar hăng jar kmar nao pơ Đà Lạt, Lâm Đồng amra mơak hlak, djă glăi amăng pran jua gơñu sa tơlơi hơdor pioh hiam klă hloh”.

8 blan akŏ thun anai, Đà Lạt, Lâm Đồng hơmâo čơkă 5 klăk 70 rơbâo wơ̆t tuai nao ngui, hyu ĕp lăng hăng pơdơi pơdă, đĭ tui 153% pơkă hăng tal anai thun hlâo. Tui hănh amai Đào Thị Huyền Trang, tuai mơ̆ng tơring čar Bình Thuận lăi, Đà Lạt pơblih lu biă mă, ƀu kơnong kơ boh tŭ yua hiam djop mơta hơdră bơwih bơwăng brơi kơ tuai hyu ngui, gơnam sĭ mơdrô tuai hyu ngui lu tui mơ̆n, dŏ hơmâo wơ̆t tơlơi sat ƀu klă amăng bruă sĭ mơdrô, pơgô̆ tuai, hyu jak, hơdui ba tuai laih anun pơđĭ rơnoh kah hăng sĭ mơdrô tŭ kơ hơmâo, ră anai hrŏ ƀiă laih mơ̆n.

“Kâo ƀuhayuh hyiăng adai tơ-ot biă mă, anih hyu ĕp lăng hiam. Lŏn glai plơi pla pơ anao hơmâo lu anŏ hiam pioh kơ ta čơphil rup. Lu mơnuih ăt jĕ giăm jum tuai klă hăng mơak biă mă”.

Tơlơi mơak, hiam klă, jĕ giăm jum tuai dưi pơsit tơlơi dŏ dong hiam mơ̆ng mơnuih Đà Lạt. Hăng hơdră dŏ dong ƀong huă anun, mơnuih Đà Lạt amra gum pơgôp hiam, dưi yơh pơgăn tơlơi soh sat hyu hơdui pơgô̆ tuai, đah mơ̆ng pơhưč lu tuai hyu ngui nao lăng plơi prong bơnga hiam Đà Lạt.

Quang Sáng pô čih-Nay Jek: pơblang