VOV4.Jarai - Čơtlăm lơ 5/5, Jơnum min mơnuih ƀôn sang ƀôn prong Đà Nẵng pơphun jơnum pel ĕp glăi bruă prăp lui kơ Bơkơtuai pơđĭ kyar jơlan por kual ASIA thun 2022 amăng blan 6 pơ̆ anăp. Anai lĕ tơlơi bơkơtuai yôm phăn hăng ƀôn prong Đà Nẵng amăng bruă hơkrŭ glăi tơlơi tuai čuă ngui, djru pok dong hơdôm jơlan por phrâo, pơtrut gum hrom tuh pơplai hăng hơdôm bôh anom bơwih ƀong gah pơgiăng nao rai hăng rơdêh por ƀơi rŏng lŏn tơnah. Bruă bơkơtuai anai hmâo 19 bruă mă phun hăng tơdŭ. Tui tơlơi lăi pơthâo glăi mơng Gơnong bruă wai lăng tuai čuă ngui ƀôn prong, yap truh lơ 5/5, hmâo rơbêh kơ 400 čô khua pơ ala mơng 155 khul grŭp, anom bruă rơkâo gum hrom bơkơtuai. Amăng mông bơkơtuai ăt hmâo mơn lu jơlan hơdră pơkon yua kơ hơdôm gơnong bruă, grŭp anom bruă pơphun kah hăng: Bơkơtuai “Đà Nẵng: Anih nao gal mơng ASIA”; Tŭ jum hăng mă bruă hăng ƀing tuh pơplai gah rơdêh por – Tuai čuă ngui; Pơdă prưng gơnam OCOP... Djop bruă prăp lui glăk dưi hmâo Đà Nẵng prăp lui hăng ngă giong hlâo kơ lơ 25/5 pơ̆ anăp./.

Siu H’ Prăk: Pơblang