Khul pơlir hơbit Đah kơmơi hơdôm bôh să, tơring kual gum hrŏm pel ĕp hơdôm bôh sang anô̆ lĕ djuai ania ƀiă hmâo tơlơi kiăng čan prăk, djru lŏn dô̆, sang dô̆, lŏn ngă đang hmua, pơplih bruă mă hăng pơđĭ kyar bruă ngă đang hmua tui jơlan pơlir hơbit nua ñu pioh djru ngăn rơnoh tui tơlơi pơkă.

Truh ră anai, Khul pơlir hơbit Đah kơmơi tơring glông ngă tui dong bruă gơgrong hăng Sang prăk gah hơdră bruă mơnuih mơnam kơ mơnuih amăng khul čan pioh pơđĭ kyar bơwih ƀong hăng mrô prăk brơi čan rơbêh kơ 195 klai prăk. Hrŏm hăng anun, Khul gơgrong brơi hăng Sang prăk gah đang hmua hăng pơđĭ kyar ƀôn lan tơring glông Di Linh rơbêh kơ 10 klai prăk brơi rơbêh kơ 150 bôh sang anô̆ čan. Yă Ka Hương – Kơ-iăng Khua Khul pơlir hơbit đah kơmơi tơring glông Di Linh, tơring čar Lâm Đồng brơi thâo:

“Di Linh lĕ anih anom hmâo lu djuai ania ƀiă dô̆ hơdip mơda, amăng anun, sang anô̆ ƀun rin ăt dô̆ lu mơn, amăng anun hmâo sang anô̆ adơi amai djuai ania ƀiă. Khul pơlir hơbit Đah kơmơi tơring glông hmâo laih lu jơlan gah pioh hrŏ trun ƀun rin pioh kơ mơnuih amăng khul djuai ania ƀiă ƀun rin. Kah hăng, hmâo mă bruă laih hăng Sang prăk gah hơdră bruă tơring glông ngă gal brơi kơ mơnuih amăng khul ƀun rin dưi čan pioh pơđĭ kyar bơwih ƀong sang anô̆, hăng Khul Đah kơmơi tơring glông ăt pơjing mơn Keh prăk yua kơ đah kơmơi ƀun rin, yua kơ adơi amai gum pơčruh rim mơnuih 10 rơbâo prăk, hăng ră anai keh prăk hmâo đĭ truh laih 1 klai prăk. Hluai tui keh prăk anai, adơi amai dưi djru prăk pơđĭ kyar bơwih ƀong sang anô̆, hrŏ trun rin rơpa”./.