Hrơi ngui pơdă prưng, lăi pơthâo gơnam pơphun bơwih ƀong, pơƀuh nao rai gơnam OCOP pơphun ƀơi să Phú Thiện, tơring čar Gia Lai hơmâo 17 anih pơdă gơnam mơng 10 boh să, lăi pơthâo lu gơnam đang hmua, mơnong ƀong huă hăng gơnam gru grua yôm phara. Abih bang lêng pơđŏm glăi bruă mă mơng đah kơmơi hăng gru grua yôm phara mơng kual lŏn Gia Lai.

Mut hrŏm hrơi ngui, grup mơñam mrai plơi Amil, să Phú Thiện hơmâo 6 čô mơnuih kơhnâo; kiăng lăi pơthâo gơnam tam rah hăng buh pơƀuh brơi eng ao djuai ania pô. Yă Kpă H’Uyên, Pô ngă akŏ grup mơñam mrai plơi Amil, să Phú Thiện brơi thâo: “Hơmâo ơi yă, amĭ ama pơtô bruă mơñam mrai mơng dŏ anet, anun ƀơƀrư̆ kâo jai hor bruă anai. Kâo čang rơmang dưi djă pioh bruă mơñam abăn ao brơi rơnuk tơdơi dong, yua anun hrŏm hăng adơi amai mơñam rah, pơtô glăi adơi đet dong. Abăn ao mơñam rai, ƀing gơmơi phĭn rup, dưm pơƀuh amăng plang mơnuih mơnam kiăng kơ sĭ. Rĭm blan, pơhrui ăt hơmâo giăm 10 klăk prăk.”

Ƀu djơ̆ kơnong mơñam mrai, tơnă hơbai gơnam ƀong mơng djuai ania pô đôč ôh ăt glăk jing jơlan pơđĭ kyar bơwih ƀong brơi ƀing đah kơmơi ƀơi tơring čar Gia Lai. Amai Rčom H’Liên, dŏ amăng Plơi Knông, să Phú Thiện juăt pơƀuh brơi amăng plang Facebook bruă tơnă hơbai hơdôm añăm ƀong mơng djuai ania Jarai anun lĕ añăm pla plum, akan trích tul hăng eč, mơnŭ om tut hrŏm pơhăng eč. Yua plang mơnuih mơnam, hơdôm gơnam juăt ƀong amăng tơlơi hơdip rĭm hrơi hơmâo lu tuai rơnguai mơng ataih giăm thâo. Amai Rčom H’Liên lăi pơthâo gơnam gơñu pơkra amăng hrơi ngui anai: “Sang anŏ gơmơi hơmâo sĭ hơdôm gơnam ƀong anun lĕ akan trích tul hăng eč, añăm pla plum, mơnŭ om. Mơng hrơi mă yua plang mơnuih mơnam, ƀing gơmơi hơmâo gơyut gơyâo hăng tuai rơnguai ataih giăm thâo. Yua anun, sang anŏ hơmâo dong prăk pơhrui, laih dong lăi pơthâo hơdôm gơnam ƀong jơman mơng djuai ania pô.”

Mơng hơdôm gơnam tui gru grua yôm phara truh pơ hơbô̆ bruă djru brơi tơlơi hơdip ƀơi ƀon lan, đah kơmơi djuai ania ƀiă Gia Lai glăk ƀơƀrư̆ hrưn đĭ, pơplih tơlơi hơdip hăng bruă mă hăng tơlơi pơčeh mơng ƀing gơñu. Samơ̆ tơlơi gir run anun pơgôp pơsit tong tơlơi gơgrong mơng đah kơmơi amăng pơđĭ kyar bơwih ƀong huă amăng sang anŏ, djă pioh gru grua hăng pơjing plơi pla jai hrơi pơđĭ kyar./.