Ƀơi tong wĭng Xuân Đài, lu song nan rơkĭ măi čơčruai tŏ tui akŏ klôn, anăp nao pơ anih dưm gruh, čơnăng rông hơdang amăng ia rơsĭ, pơgiăng ba gơnam pioh čem hơdang grông ƀong. Ayong Đỗ Xuân Thạnh, ƀut plơi amăng ƀôn prong Phú Mỹ, phường Sông Cầu, sa amăng hơdôm čô mơnuih mơgăt song măi, ƀattô anet nao pơ anih rông hơdang mơ̆ng mơguah tañ hloh. Ayong Thạnh brơi thâo, tơdơi kơ tơlơi truh ia ling dăo thun hlâo, sang anŏ ñu dưi čan glăi 1 klai prăk pioh blơi gơnam ming pơkra glăi gruh, čơnăng rông hơdang, plĕ trun 13.000 drơi ană hơdang grông pơjeh djuai phrâo. Rơbêh 7 blan rông, pơčem, hnưr hơdang blung a mơ̆ng čơnăng ñu rông dưi pơhrui mă ba sĭ mơdrô, lu tuai čih hră pơkôl blơi. Ayong Thạnh hơ̆k mơak lăi:

“Pơkă lơ̆m sa drơi hơdang grông ră anai hnơ̆ng kơtrâ̆o ñu 2 gram, dua lạng juăt lăi, rơnoh sĭ sa drơi 200 rơbâo prăk, pơ alin sa kg mơ̆ng 800 rơbâo truh 900 rơbâo prăk arăng blơi hơdang grông hơdip. Prăk pơhrui glăi năng ai 2 klai. Kâo him lăng tla prăk čan sa črăn dŏ glăi tuh pơ alin rông dơ̆ng lu hloh hnưr anai. Tơdah huăi hơmâo tơlơi hơgĕt ôh năng ai 2 thun pơ anăp dơ̆ng rŭ glăi bruă rông hơdang ăt kah hăng hlâo kơ bơyan ia ling dăo thun hlâo mơ̆n”.

Ăt ƀơi ƀut plơi Phú Mỹ mơ̆n, phường Sông Cầu, ayong Đỗ Ngọc Quang hlăk rŭ glăi bruă rông hơdang grông ƀơi tong wĭng ia rơsĭ Xuân Đài. Tal tơlơi truh ia lip thun hlâo ngă kơ sang anŏ gơñu rơngiă soh sel 2 klai 500 klăk prăk, lơ̆m anun prăk čan ăt đôm sang bruă prăk kơnuk kơna. Yua hơmâo jơlan hơdră djru ba mơ̆ng kơnuk kơna, pơhrơ̆i brơi hnưh anun jăng jai, pơtrun hĭ prăk kơmlai laih anun čang dơ̆ng 800 klăk rpăk pioh tuh pơ alin rông hơdang. Amăng dua hnưr rông tơdơi kơ anun, 1 hnưr hlăk đĭ prong hiam, hnưr adih truh hrơi mă pơhrui, ba sĭ yơh.

“Kâo plĕ trun čơnăng rông hơdang grông sa hnưr amăng blan 4 năng ai 7000 drơi ană hơdang; hnưr tal dua plĕ trun rông amăng blan 5 hăng blan 8, abih bang truh 10.000 drơi. Ră anai, hơmâo mă ba sĭ hnưr blung a laih, mă ba sĭ mơdrô raih daih na nao đôč”.

Tơlơi truh lơ̆n adai ngă thun 2025 laih rơgao, ngă răm ƀăm amăng kual rông hơdang grông phun ƀơi ia rơsĭ tong wĭng  Xuân Đài, ngă kơ 1.500 boh sang anŏ mơnuih ƀôn sang ƀơi phường Sông Cầu hăng Xuân Đài bơbeč yua, giăm 100.000 boh gruh čơnăng rông hơdang răm ƀăm yua, rơnoh prăk rơngiă soh sel truh 1.900 klai prăk, amăng anun phường Sông Cầu giăm 2/3. Ơi Huỳnh Đình Quang, Kơ-iăng khua Jơnum min mơnuih ƀôn sang phường Sông Cầu brơi thâo, phường anai hơmâo ngă bruă laih hăng djop sang bruă prăk brơi čan, pioh djru ba mơnuih ƀôn sang, pơhrơ̆i hnưh jăng jai, ngă gêh găl brơi čan pơhrua phrâo dơ̆ng kiăng tuh pơ alin kơ bruă rông hơdang. Yua kơ anun, kual rông hơdang grông hơmâo rŭ glăi truh 80%. Hrơi blan pơ anăp, phường ăt lăi pơthâo mơnuih ƀôn sang pơblih anăp ngă bruă, hơdră čem rông hơdang tui boh thâo ia rơgơi phrâo, pioh pơhlom hĭ tơlơi truh răm ƀăm či hơmâo, pơđĭ tui hơdră bong glăi hăng anŏ pơblih ayuh hyiăng, ia ling dăo, pơgang kman klin ngă kơ hơdang rông, đah mơ̆ng ngă bruă čem rông hơdang amăng ia rơsĭ dưi hơđong na nao.

“Phường ăt pơtă pơtăn mơnuih ƀôn sang rông hơdang djơ̆ đơ đam ngă gruh čơnăng či rông, rơnoh hơdang dưi rông hăng tui anŏ pơkă hnơ̆ng brơi kơ abih bang; laih dơ̆ng ba yua boh thâo ia rơgơi phrâo, pơblih mơ̆ng čơnăng gruh ngă hăng kyâo hlâo adih hăng čơnăng pơkra mơ̆ng kơsu HDPE kơjăp hloh, plai ƀiă răm ƀăm tơdah hơmâo tơlơi truh rơbŭ kơthel ia ling dăo. Sit truh bơyan hơjan, mơnuih ƀôn sang pơhrui mă yơh hơdang ba sĭ, ngă kơjăp glăi gruh rông. Hăng hơdang grông rông tơdah ƀu bưng ôh hơmâo hĭ kman ngă, kiăng lăi pơthâo tañ hăng gong gai kơnuk kơna thâo hăng anom bruă wai lăng ngă hmua, rông mơnong trun nao ĕp lăng djru ba mơnuih ƀôn sang”.

Bruă rông mơnong amăng ia rơsĭ lĕ sa bruă mă bơwih ƀong huă kah hăng sa tơlơi gêh găl pơ kual gah ngŏ tơring čar Dak Lak samơ̆ ăt bưp na nao tơlơi lông lăng, răm ƀăm truh sit djơ̆ thun hơmâo rơbŭ kơthel ia ling dăo prong, yua anun kiăng hơmâo hơdră djru ba prăk kăk pioh čan lu pơsir hĭ tơlơi răm ƀăm hăng rŭ glăi bruă mă. Kơnong ƀing čan prăk rông akan hơdang yua sang bruă prăk Agribank ƀơi Phú Yên brơi čan, tal hơmâo tơlơi truh thun hlâo ngă kơ gơñu dong hnưh truh 6000 klai prăk. Ngă hrŏm djru ba pơsir tơlơi tơnap tap kơ mơnuih ƀôn sang, sang bruă prăk pơhrơ̆i hnưh, pơtrun rơnoh prăk kơmlai hăng ĕp prăk brơi čan phrâo dơ̆ng. Ƀơi kual rông hơdang grông tong wĭng ia rơsĭ Xuân Đài, hơmâo rơbêh 300 čô mơnuih jing pô rông hơdang čan prăk, dưi pơhrŏ trun rơnoh prăk kơmlai hăng brơi čan phrâo dơ̆ng 240 klai. Ơi Phan Thông Thái, Khua sang bruă prăk gah bruă hmua Agribank ƀơi Phú Yên, brơi thâo:

“Ƀing gơmơi ƀuăn rơ̆ng amra pơhlom djop rơnoh prăk brơi mơnuih ƀôn sang čan tuh pơ alin, djru sang anŏ mơnuih ƀôn sang rông hơdang grông ăt kah hăng pơkra ming gơnam sĭ mơdrô čan prăk tuh pơ alin kơ bruă mă. Bruă ba yua rơnoh prăk mơnuih ƀôn sang čan ăt ƀing gơmơi krăp lăng tong ten, pioh mă yua djơ̆ lăp, tŭ yua. Hăng anŏ hlăk ngă tui ră anai, bruă rông hơdang grông amra tañ rŭ glăi mơ̆n mơ̆ng thun anai truh abih thun pơ anăp”.

Bơyan pơhrui mă hơdang tơdơi kơ tal ia ling dăo hlăk ngă bruă laih anun hơmâo ba glăi boh tŭ yua klă mơ̆n hăng mơnuih ƀôn sang rông hơdang grông ƀơi tong wĭng ia rơsĭ Xuân Đài. Mơ̆ng bruă ba yua anŏ gêh găl klă ia rơsĭ rŭ glăi bruă rông mơnong hăng hơdră pơtô ba mơ̆ng gong gai kơnuk kơna ƀơi plơi pla laih anun tơlơi gir run mơ̆ng mơnuih ƀôn sang brơi ƀuh, abih bang bruă ngă rông hơdang grông ƀơi plơi pla ter hang ia rơsĭ prăp lui pơhrui mă hơdang pioh ba sĭ mơdrô, ƀu kơnong hơjăn bruă rông hơdang đôč ôh rŭ glăi, lu bruă mă rông mơnong amăng ia rơsĭ amra pok jơlan phrâo nao pơ anăp adih hơđong hăng pơđĭ kyar tui.