Dak lak ră anai hơmâo 667 boh dơnao ia anet prong, ia pơkong hăng ia dơnao hơmâo baih hlâo, amăng anun tơring gah yŭ tơring čar lĕ hơmâo 253 boh dơnao, tơring gah ngŏ 414 boh dơnao. Tơring gah yŭ, kơnong dŏ glăi 130 dơnao jơlah ia dŏ tui tơđar, jing 51% đôč, ƀiă hloh tui tơđar thun truh 64%. Tơring gah ngŏ, jơlah ia dơnao đĭ trun 70% truh 100% rơnoh pơkă. Ia amăng hnoh  ia krông Srêpôk, ia krông Apa, ia krông kỳ Lô hăng lu hnoh ia ania, ia krông pơkŏn lêng kơ ƀiă hloh pơkă hăng tơđar thun.

Yă Đặng Thị Thủy, Kơ-iăng khua Gơnong bruă Ngă hmua hăng Pơgang ayuh hyiăng tơring čar Dak Lak, brơi thâo, El Nino amra ngă không kơtang phang khôt, kơƀah ia lu biă mă amăng bơyan phang thun 2026-2027. Yua ia hơjan amăng thun anai, pơkă lăng hlâo aset hloh tui tơdar thun mơ̆ng 20-40%. Tơring gah ngŏ, mra kơƀah ia bruih brơi 2.500 ha pơdai bơyan puih phang hăng 40.000 ha bơyan mơyan; tơring gah yŭ sit năng ai amra hơmâo mơ̆ng 68.000 truh 100.00 ha hmua đang phun pla kơƀah ia bruih, 42.000 boh sang anŏ mơnuih ƀôn sang kơƀah ia yua, ia  mơñum mơtam. Anom bruă ngă hmua pơtă lui hlâo, khom pơblih sem lăng hrơi blan rah pơtem hmua pơdai hăng pơblih pơjeh phun pla brơi djơ̆ găl pơhlom hlâo, kiăo tui kơ bơyan adai. Yă Đặng Thị Thủy lăi pơthâo hơdôm hơdră či ngă:

“Tui hăng akŏ bruă rĭm thun, mơ̆ng kơnôl 20/10/2026 truh kơnôl 10/01/2027 lĕ jing hrơi blan rah pơtem pơdai bơyah puih phang. Tơdah hơmâo tơlơi truh adai không kơtang lĕ mơnuih ngă hmua kơdŭn glăi sui ƀiă hloh či rah pơtem pơdai bơyan phang, kiăng plai ƀiă răm ƀăm soh sel. Hơdôm anih huăi kơƀah ia, yua hơmâo hnoh ƀôp hăng bruih kơ hmua ia anun prăp lui rah pơtem tañ hloh hăng akŏ bruă juăt pơkă. Rơngiao kơ anun, Gơnong bruă jao kơ anom bruă wai lăng phun pla ƀơi tơring čar ngă hrŏm djop să, brơi kơsem min ĕp pơjeh pơdai djơ̆ găl pioh rah pơtem, pơhrua pơjeh pơdai juăt ngă mơ̆ng anai pơ klôn, kiăng dưi hmao hăng bơyan phang khôt kơƀah ia bruih”.

Ơi Nguyễn Thiên Văn, Kơ-iăng khua Jơnum min mơnuih ƀôn sang tơring čar Dak lak, pơtrun hiăp djop gơnong bruă tơring čar, să, phường gir ngă pơgiong bruă mă, mă bruă wơ̆t amăng hrơi pơdơi; prăp lui pơkong ia ƀơi djop dơnao, kiăng pơgnă huăi ia bruač, hyuh đuăi hrŏ hĭ soh sel. Djop să, plơi pla jŭ yap glăi đơ đam hmua ia, đơ đam đang pla brơi tong ten, sem lăng hrơi mông či rah pơtem, ruah pơjeh pơdai djơ̆ lăp; pơtô brơi mơnuih ƀôn sang kah pơpha ia yua thâo pơkrem, djru ming pơkra bơnư̆ pơkong ia hăng ĕp hơdră găl hloh pơhlom pơgang hŭi apui ƀong glai dơ̆ng. Ơi Nguyễn Thiên Văn lăi:

“Ƀing ta khom prăp lui pơhlom hlâo, hmao kru bong glăi hăng adai không kơtang phang khôt. Đing nao hlâo hloh ba ia yua brơi djop, ia mơñum amăng sang anŏ, biă mă ñu kual ataih, kual plơi pla djuai ƀiă. Gơnong bruă Ngă hmua hăng pơgang ayuh hyiăng ngă hrŏm djop să, plơi pla, djop sang bruă hơmâo tơlơi thâo ten, brơi krăp lăng tong ten ia yua, hnoh ia, ia amăng ring bruă pơkong, bơnư̆ ia; kiăng thâo tong ten tơlơi hơmâo, ngă pơgiong tañ hơdră či pơhlom hlâo tơlơi răm ƀăm, laih dơ̆ng dăp hơdră tum teč, pơhlom, pơgang apui ƀong glai pioh bong lăi amăng mông ječ ameč tơdah hơmâo”.