Amai Đinh Thị Trang (25 thun), dŏ amăng plơi Nước Vuông, să Sơn Tây Thượng hlâo anun ngă đang hmua amăng sang anŏ. Mơng hrơi nao mă bruă ƀơi anom bơwih ƀong hrŏm gah ngă hmua, đang glai hăng sĭ mơdrô bơwih bơwang Sơn Bua (anom bơwih ƀong hrŏm Sơn Bua), să Sơn Tây Thượng, tơring čar Quảng Ngãi, ñu kah hrăm tui bruă yua măi mok, juăt tui bruă pơkra gơnam đang hmua. Mut mă bruă ƀơi anom bơwih ƀong hrŏm, amai Trang hơmâo dong prăk pơhrui hơđong, hăng dưi hrăm bruă, hrưn đĭ thâo rơguăt ƀiă dong amăng bruă mă: “Kâo rai pơ anai lĕ kiăng mă bruă, hrăm bruă, hrăm tui hơdôm bruă hơget mơ̆ kâo aka ƀu thâo, kiăng pơkra rai hơdôm gơnam klă ƀiă.”

Jơlan yak nao mơng anom bơwih ƀong hrŏm să Sơn Bua lĕ pơphun ngă hmua, pơkra gơnam đang hmua ƀơi anih, ĕp bruă mă brơi mơnuih ƀôn sang hăng ƀơƀrư̆ pơjing kual ngă hmua hơđong ƀơi kual čư̆ siăng. Mơnuih ba jơlan hlâo akŏ pơjing anom bơwih ƀong hrŏm anai lĕ amai Lê Thị Ánh (45 thun), mơnuih djuai ania Ca Dong, dŏ amăng să Sơn Tây Thượng. Thun 2020, amai Ánh pơdơi bruă Kơnuk kơna, glăi pơ plơi pla akŏ pơjing anom bơwih ƀong hrŏm gah ngă hmua, pla đang glai hăng sĭ mơdrô bơwih bơwang Sơn Bua hăng tơlơi čang rơmang ba gơnam đang hmua ƀon lan ba hyu sĭ. Mơng ngăn rơnoh amăng Jơlan hơdră hơnong pơkă dêh čar pơđĭ kyar bơwih ƀong-mơnuih mơnam kual mơnuih djuai ania ƀiă hăng čư̆ siăng rơwang thun 2021-2030, anom bơwih ƀong hrŏm Sơn Bua hơmâo djru brơi măi mok pơkra gơnam, măi mok ngă đang hmua.

Amai Lê Thị Ánh brơi thâo, blung a, anom bơwih ƀong hrŏm pơkra hơdôm gơnam mơng pơtơi anun lĕ: pơtơi uă krô, tơpai pơtơi, ia mơmih mơng pơtơi; tơdơi anun hơdai nao pơkra bơnga boh trol glai, rơbung, kâu hăng sa, dua phun kyâo jrao. Truh ră anai, anom bơwih ƀong hrŏm hơmâo 7 gơnam OCOP: “Ră anai, djru brơi mơnuih ƀôn sang kiăng pok sang măi pơkra gơnam tam. Pok anih pơkra kiăng blơi pơhrui gơnam đang hmua, anun neh met wa kah khĭn pla, khĭn ngă. Mơ̆ lơm ƀing ta lăi mơ̆ ƀing ta ƀu ngă sit nik, arăng ăt ƀu khĭn ngă lơi. Tơlơi anai amra ƀu ngă djơ̆ găl hăng ƀu gưt pơplih tơlơi pơmĭn amăng ngă hmua.”

Hlâo adih, lu sang anŏ juăt brơi mơng sa phun pơtơi bluh pơhrua dong mơng 5-6 anah jum dar. Anun ngă phun pơtơi rông rah anah anet jum dar, rông rah pơtơi yua ngă boh anet, ƀu hiam đơi ôh. Mơnuih Ping gah Lê Văn Hiền (37 thun), mơnuih djuai ania Ca Dong, črâo ba mơnuih ƀôn sang pioh glăi mơng 1-2 phun đôč, kiăng pơtơi ñu dưi rông boh prong hiam. Ayong Lê Văn Hiền brơi thâo, hlâo adih, sa dông pơtơi sĭ kơnong mơng 20.000-30.000 prăk, ră anai hơmâo anom bơwih ƀong hrŏm blơi nua đĭ 3 wŏt: “Lơm pơsit glăi pơ anai ngă, kâo lêng kơ prap rơmet lui hlâo djop mơta hăng pơmĭn kiăng ba jơlan hlâo, ngă hiưm pă kiăng neh met w dưi hrăm tui hơdôm bruă mơ̆ kâo hơmâo hrăm tui arăng. Hăng hơdôm gơnam đang hmua amăng ƀon lan, ngă hiưm pă kiăng djơ̆ hơnong pơkă, anun ƀing gơmơi kiăng sem lăng, tuh pơ alin hăng kiăo tui lăng hơdôm bruă neh met wa hơmâo ngă hiưm pă ñu.”

Ơi Nguyễn Xuân Thọ, Khua anom bruă bơwih ƀong să Sơn Tây Thượng, tơring čar Quảng Ngãi brơi thâo, hơdôm hơbô̆ bruă bơwih ƀong hrŏm pơphun pơlir hơbit bơwih ƀong huă, pơkra gơnam hăng blơi pơhrui gơnam tam, pơgôp ĕp brơi bruă mă, lu tui prăk pơhrui brơi mơnuih ƀôn sang. Sa, dua anom bơwih ƀong hơmâo mơnuih Ping gah ba gru, ba jơlan hlâo amăng ngă hmua hơmâo pơgôp pơplih tơlơi pơmĭn, bruă mă brơi neh met wa: “Ră anai, amăng ƀon lan ăt hơmâo lu anom bơwih ƀong hrŏm. Rĭm anom bơwih ƀong hrŏm hơmâo sa, dua hơbô̆ bruă bơwih ƀong phara. Kơnong anom bơwih ƀong hrŏm Sơn Bua hơmâo hơbô̆ bruă pơlir glông rơnoh, hăng hơdôm gơnam anun lĕ če hla phun trol, pơtơi ĭn, rơbung hăng lu gơnam pơkŏn dong. Tơdơi anai, lơm pơlir hăng hơdôm anom bơwih ƀong amăng ƀon lan, ƀing gơmơi amra pơkra rai lu gơnam tam brơi kơ ƀon lan, laih dong pơlir hăng hơdôm boh tơring pơkŏn kiăng pơkra rai gơnam sĭ brơi arăng blơi yua.”

Mơng hơdôm gơnam tam juăt mă mơng glai rưng, ƀing mơnuih Ping gah djuai ania Ca Dong glăk pơgôp pok rai jơlan bơwih ƀong phrâo ƀơi Sơn Tây Thượng, tơring čar Quảng Ngãi./.