Mrô prăk čan đĭ tui mơng sang bruă prăk djru mơnuih mơnam tơring glông rĭm thun dưm dưm 12%. Đơ đam tơring glông hơmâo 4 khul grup djru čan prăk (amăng anun hơmâo Khul đah kơmơi). Truh ră anai hơmâo rơbêh 11 rơbâo čô mơnuih čan prăk, hăng abih tih hnưh đôm giăm 550 klai prăk. Anai lĕ tơring glông hơmâo mrô mơnuih djuai ania ƀiă dưm dưm 70%, tơring glông Krông Pa đing nao biă mă hơdôm boh sang anŏ djuai ania ƀiă lơm brơi čan prăk mă kmlai ƀiă mơng sang bruă prăk djru mơnuih mơnam kiăng pơđĭ kyar bơwih ƀong huă.

Amai Ksor H’Druin-Khua khul pơlir hơbit đah kơmơi să Chư Đrăng, tơring glông Krông Pa brơi thâo, tơring glông ăt phrâo pok hơbô̆ bruă “Plơi pla đah kơmơi ba gru” kiăng ngă gêh gal brơi adơi amai dưi pơlăi nao rai tơlơi găn rơgao amăng bơwih ƀong huă, mă yua klă prăk čan.

“Kiăng adơi amai thâo mă yua klă prăk čan mơng sang bruă prăk djru mơnuih mơnam, ƀing gơmơi ăt pơphun hyu pơtô pơblang, črâo ba adơi amai hluh rơđah. Tơdơi kơ čan prăk kiăng kơ tuh pơ alin bơwih ƀong huă kah dưi pơplih tơlơi hơdip mơda. Phrâo rơgao, kâo ăt djru brơi ƀing adơi amai nao čan prăk, mơng rơnoh prăk čan anai lu sang anŏ yua tuh pơ alin ngă hmua, rông hlô mơnong. Truh ră anai lu sang anŏ hơmâo mă yua klă prăk čan mơng sang bruă prăk djru mơnuih mơnam kiăng pơđĭ kyar bơwih ƀong huă amăng sang anŏ”.