VOV4.Jarai - Tlam mơmnŏt lơ 24/5, ƀơi Ƀirô Khua pơ ala mơnuih ƀon sang dêh čar hơmâo pơphun bưp ƀô̆ mơta hăng pok pơhai bruă mă mơng Grup đah kơmơi ngă Khua pơ ala mơnuih ƀon sang rơwang thun mă bruă mơng Khua pơ ala mơnuih ƀon sang dêh čar tal XV. Đĭ pơhiăp amăng mông bưp, Khua git gai pơ ala mơnuih ƀon sang dêh čar ơi Vương Đình Huệ brơi thâo, Khua pơ ala mơnuih ƀon sang dêh čar tal XV, hăng 151 čô khua mua lĕ đah kơmơi, glăk dong ƀơi anăp kơ tơlơi rơkâo pơplih phrâo kiăng kơ djơ̆ hăng pran gơgrong lĕ anom bruă pơ ala prong hloh kơ mơnuih ƀon sang, anom bruă prong hloh amăng dêh čar Cộng hoà xã hội chủ nghĩa Việt Nam.

Khua git gai pơ ala mơnuih ƀon sang dêh čar ơi Vương Đình Huệ phĭn rup hăng ƀing đah kơmơi ngă Khua pơ ala mơnuih ƀon sang

Kiăng kơ grup đah kơmơi ngă Khua pơ ala mơnuih ƀon sang dêh čar Việt Nam tal 15 pơgiong hơdôm hơnong pơkă hơmâo ba tơbiă pơ anăp anai, ơi Vương Đình Huệ rơkâo: grup anai kiăng pơsit tong bruă hrŏm amăng ha rơwang thun mă bruă, amăng rĭm thun kiăng kơ sit nik, djơ̆ hăng jơlan hơdră, boh tơhnal mơng hơdôm lok jơnum Khua pơ ala mơnuih ƀon sang dêh čar; bruă mă mơng grup kiăng djop mơta, gơgrong, thâo pơčeh phrâo mơng rĭm čô mơnuih; pơtrut abih bang ding kơna amăng grup mut hrŏm.

Siu Đoan: Pơblang