VOV4.Jarai - Anom bruă wai lăng mơnuih mă bruă dêh čar tač rơngiao (Ding jum Mơnuih mă bruă Tơhan rơka hăng Mơnuih mơnam) brơi thâo: Tơdơi kơ hrơi blan tơ̆i đưn yua klin Covid-19 hơđuh đĭ, mơng lơ 15/2, Đài Loan (Khač) pok bah amăng, čơkă mơnuih mă bruă mơng dêh čar Việt Nam, Indonesia, Thái Lan hăng Philippines nao mă bruă. Anai lĕ tơlơi klă hiam laih kơ mơnuih mă bruă či nao pơ Đài Loan (Khač) mă bruă, prăk blan năng ai 20 klăk prăk/blan. Hlâo či nao pơ Đài Loan (Khač) ngă bruă, mơnuih mă bruă khŏm tlâ̆o djŏp arăt vaccine pơgang Covid-19, hăng pơčrang PRC 48 mông. Tơdơi kơ mut nao pơ bul pơtâo ia rơsĭ anai, mơnuih mă bruă khŏm pơčlah 14 hrơi ƀơi sang jưh tuai, tơdơi kơ anun dong dŏ krăp lăng amăng 7 hrơi dong hlâo či nao pơ anih mă bruă. Prăk kăk nao pơčlah pơ sang jưh tuai yua pơgang klin Covid-19 amra yua pô apah mơnuih mă bruă tla brơi. Rơngiao kơ mơnuih mă bruă amăng hơdôm sang măi hăng djru ngă bruă amăng sang anŏ, Việt Nam hăng Đài Loan (Khač) ăt kĭ pơkôl laih kiăng gah dêh čar Khač brơi mơnuih mă bruă ngă hmua mơng Việt Nam nao ngă bruă.

Siu H’Mai: Pơblang