Tuč rơnuč ñu, ơi Tô Lâm - Ding kơna Ding jum kơđi čar, Khua ding jum Kông an, ding kơna pơ ala mơnuih ƀôn sang dêh čar tal 15 gah Grup khua pơ ala mơ̆ng tơring čar Hưng Yên hơmâo Khua mua pơ ala mơnuih ƀôn sang dêh čar ruah ngă Khua mir sir dêh čar Việt Nam, rơwang thun 2021-2026. Tơlơi pơtrun kơ bruă ruah ơi Tô Lâm ngă khua ăt hơmâo khua mua pơ ala mơnuih ƀôn sang dong yua hăng 472/473 čô khua tŭ ư (jing hơmâo 96,92% amăng abih bang mrô khua pơ ala mơnuih ƀôn sang). Khua mir sir phrâo đĭ ƀuăn bruă, abih pran jua hăng Lŏn ia, Mơnuih ƀôn sang hăng Phiah phiăn dêh čar ƀơi anăp Khua mua pơ ala mơnuih ƀôn sang dêh čar lơ̆m đĭ apăn bruă.

Khua tơhan krên dên Đại tướng ơi Tô Lâm tơkeng thun 1957, plơi ñu pơ să Nghĩa Trụ, tơring glông Văn Giang, tơring čar Hưng Yên; jing nai tha prin Giáo sư Khoa học An ninh, nai prin tha Tơlơi phiăn. Ñu jing Ding kơna gum git gai Ping gah tal 11, 12, 13; Ding kơna Ding jum kơđi čar tal 12, 13 laih anun jing ding kơna pơ ala mơnuih ƀôn sang dêh čar tal 14, 15. Mơ̆ng thun 1988-1993, ơi Tô Lâm ngă Kơ-iăng khua, giong anun ngă Khua anom bruă pơgang ba bruă kơđi čar mrô 1, Ding jum kông an. Amăng 13 thun tŏ tui, ñu ngă Kơ-iăng khua Anom bruă pơgang ba bruă kơđi čar 1, giong anun ngă Khua anom bruă pơgang kơđi čar mrô 3, Ding jum kông an. Mơ̆ng thun 2006-2009, ơi Tô Lâm ngă Kơ-iăng khua Anom phun wai lăng rơnuk rơnua, Ding jum kông an. Amăng 2 thun tŏ tui dơ̆ng, ñu gơgrong bruă giong anun ngă Khua phun Anom bruă wai lăng rơnuk rơnua mrô 1, Ding jum Kông an. Ơi Tô Lâm ngă Kơ-iăng khua ding jum kông an mơ̆ng blan 8/2010 truh blan 4/2016. Tơdơi kơ anun, ñu ngă Khua ding jum Kông an truh ră anai hlao./.