VOV4.Jarai - Mơguah lơ 28/3, Đại tướng Phan Văn Giang, Khua Ding jum Khul ling tơhan dêh čar ta hmâo git gai Jơnum khua mua Ding jum khul ling tơhan blan 3 thun 2022. Jơnum pơsit blan 3/2022, Ping gah Khul ling tơhan, Ding jum Khul ling tơhan hmâo git gai, črâo ba, pok pơhai abih bang, ha amăng plĕ, khut khăt hăng ngă giong klă bruă mă, kơčăo bruă ba tơbiă.

Jơnum khua mua Ding jum Khul ling tơhan blan 3 thun 2022

Pơhiăp amăng mông jơnum, Đại tướng Phan Văn Giang rơkâo amăng blan 4, abih bang khul ling tơhan djă pioh tơpă hơdră dô̆ gak blah, thâo rơđah, pơkă lăng hlâo djơ̆ tơlơi; hmao tlôn pơphô brơi, pơsir ba glăi bôh tơhnal hơdôm tơlơi amra truh, ƀu pioh hmâo tơlơi kah mơng pơsir, ƀu hmao thâo hlâo. Gum hrom pơhlôm rơnuk rơnua hơđong amăng đơ đam dêh čar, phun ñu lĕ tal huă pơsat Pơtao Hùng, pơdơi lơphet lơ 30/4 hăng lơ 1/5; djă pioh tơpă bruă djru pơtlaih, gum djru ƀơi hơdôm gưl; pơđĭ tui bruă pơhrăm kơ hơdôm mơnuih hăng grŭp pơplông bơkơjăp drơi jăn Army Games 2022. Hrom hăng anun prăp lui tŏng ten, pơphun truh kih bơkơtuai jiăng mah pơgang lŏn ia guai dêh čar Việt Nam hăng Khač tal 7./.

Siu H’ Prăk: Pơblang