VOV4.Jarai - Ƀrô tal hơdor glăi 75 thun hrơi tơhan rơka-tơhan djai pơsăn drơi (27/7), Grup hyu mă bruă mơng Ping gah ling tơhan, Ding jum ling tơhan yua Đại tướng Phan Văn Giang, Ding kơna Ding jum kơđi čar, Kơ-iăng Khua git gai Ping gah ling tơhan ba jơlan hlâo hơmâo nao čuă, ƀơk gơnam Khul tơhan hơđăp Việt Nam. Pơ ala Ping gah ling tơhan, Ding jum ling tơhan, Đại tướng Phan Văn Giang pơdah pran jua pơpŭ bơni pran gum pơgôp, tuh rơyuh pran jua prong prin mơng djop rơnuk tơhan amăng bruă ngă hơkrŭ pơklaih rơngai lŏn ia hăng pơjing, wai pơgang lŏn ia Việt Nam xã hội chủ nghĩa. Đại tướng Phan Văn Giang čang rơmang pơ anăp anai, Khul tơhan hơđăp Việt Nam hăng Ding jum ling tơhan amra tŏ tui djă pioh, ngă tui pran mut hrŏm, pơlir hơbit. Djop rơnuk tơhan hơđăp Việt Nam tŏ tui đing nao, hơmâo lu tơlơi gum pơgôp yôm phăn dong amăng bruă pơđĭ kyar khul ling tơhan hăng lŏn ia ta.

Siu Đoan: Pơblang