VOV4.Jarai - Đại tướng Võ Nguyên Giáp – “Pô ayong tha” mơng Khul ling tơhan mơnuih ƀôn sang dêh čar Việt Nam, Khua ling tơhan, Khua apăn bruă kơđi čar, Khua pơtom hiăp prong dưi hmâo mơnuih ƀôn sang đơ đam dêh čar hăng rŏng lŏn tơnah đăp biă. Bruă mă, pran jua tuh rơyuh hăng gru ba jơlan hlâo kơ kơnuih, pran jua mơng Đại tướng hmâo jing laih sa gŏng kut hơdip na nao amăng rim mơnuih ƀôn sang Việt Nam. Hăng mơnuih ƀôn sang djop djuai ania ATK Bắc Sơn (Lạng Sơn), hơdor glăi kơ tal Đại tướng nao čuă; hơdôm tơlơi pơtă pơtăn hăng tơlơi jê̆ giăm, ƀu glêh tơnap amăng tơlơi hơdip mơng Đại tướng lĕ tơlơi ư-ang hăng pran pơtrut prong kiăng rim mơnuih ƀôn sang amăng plơi pla ngă hơkrŭ Bắc Sơn gir run na nao, hrưn đĭ.

Khă 27 thun rơgao laih samơ̆ amăng tơlơi hơdor pioh mơng ơi Dương Minh Thuận (Kơ-iăng Khua hơđăp Grŭp pơtô ba mơnuih ƀôn sang Ping gah tơring car Lạng Sơn) ăt hơdor glăi rơđah mơn gru rŭp Đại tướng Võ Nguyên Giáp ƀơi tơdron đă bôh lông Bắc Sơn čơtlăm hrơi anun. Ơi Thuận lĕ pô ư-ang nao pơhmư̆ ƀơi anăp mông čơkă jum Đại tướng Võ Nguyên Giáp ƀơi tơkai rơñan rơdêh bek čơtlăm lơ 26/9/1995 lom Đại tướng glăi čuă plơi pla Bắc Sơn – kual Pơhlôm kual mơng Ping gah amăng rơnuk blah kơdŏng glăi ayăt Prang. Mơguah hrơi tơdơi, Đại tướng hmâo laih mông ră ruai hăng neh wa djop djuai ania hăng ling tơhan:

“Đại tướng pơtă pơtăn Bắc Sơn lĕ tơring glông hmâo phiăn juăt ngă Hơkrŭ laih, samơ̆ khom hrưn đĭ kiăng hrŏ trun rin rơpa, ngă pơdrong. Hăng laih anun Đại tướng tơña kơ Ping gah mơnuih ƀôn sang Bắc Sơn tŭ ư mơn, đơ đam tơdron đă bôh lông khă ƀu hmâo hlơi dưi lăi pơthâo ôh samơ̆ ha amăng plĕ tañ mơtăm tŭ ư, ƀuăn hăng Đại tướng. Lom pơđut tơlơi pơhiăp amăng mông ngă lơphet, Đại tướng vơ̆t tơngan pơhiăp hăng tơlơi djuai ania Tày Bắc Sơn”.

Hơdôm pok rŭp Đại tướng Võ Nguyên Giáp khă ƀu dô̆ rơđah hai samơ̆ ăt lăi đĭ mơn anô̆ kơdrưh, pran jua kơtang mơng Khua tơhan krên dên mơng djuai ania

Ƀơi Sang djă pioh gru grua ngă hơkrŭ Bắc Sơn ră anai ăt dô̆ djă pioh mơn lu gru tơlơi djă pioh, gru rŭp lom Đại tướng Võ Nguyên Giáp čuă Bắc Sơn thun 1995 hrom hăng hơdôm tơlơi pơtă pơtăn ling tơhan hăng mơnuih ƀôn sang Bắc Sơn khom “ngă tui gru grua phiăn juăt plơi pla sông kơtang, pơdŏng tơring glông jing sa tơring glông ngă gru hlâo mơng tơring čar”; Phun “Sung Túc” phun bôh hra dưi hmâo Đại tướng pla hrơi anun, ră anai ăt glui hiam mơn amăng đang Sang djă pioh gru grua đưm. Amai Phạm Thị Thanh Hà, mơnuih mă bruă amăng Sang djă pioh gru grua đưm hơkrŭ Bắc Sơn, ol pran jua lăi:

“Sang djă pioh gru grua đưm ăt lĕ sa anih anom yôm mơng tuai čuă ngui lom nao pơ̆ Bắc Sơn. Anai lĕ hơdôm hră pơ-ar phun mơ̆ mơnuih mă bruă ƀơi sang djă pioh gru grua đưm hyu hơduah ĕp hăng djă pioh, djru bruă pơtô juăt gru grua kơ hơdôm gưl mơnuih ƀôn sang, biă ñu hăng hlăk ai djă hơdor pioh na nao hăng djă pioh dơlăm pran jua tuh rơyuh mơng ƀing sông kơtang nao hlâo. Anai lĕ ăt jing tơlơi ư-ang mơng Ping gah, gong gai hăng mơnuih ƀôn sang djop djuai ania tơring glông Bắc Sơn lom dưi hmâo Đại tướng nao čuă. Tuai hyu čuă lăng rai pơ̆ anai juăt hmâo lu tơlơi tơña kơ Đại tướng Võ Nguyên Giáp”.

Mơnuih mă bruă ƀơi Sang djă pioh gru grua đưm hơkrŭ Bắc Sơn lăi pơthâo kơ tuai hyu čuă ngui phun hra dưi hmâo Đại tướng Võ Nguyên Giáp pla lơ 27/9/1995

Giăm hmâo 10 thun Đại tướng nao čuă hăng ƀing gŏp ñu, neh wa djop djuai ania hăng mơnuih apăn bruă tơhan, ling tơhan Bắc Sơn hmâo gum hrom hơbit, gir run pơđĭ kyar bơwih ƀong mơnuih mơnam, djă kơjăp tơlơi rơnuk rơnua pơgang lŏn ia ƀơi kual plơi pla ngă hơkrŭ đưm anai./.

            VOV Đông Bắc: Čih – Siu H’ Prăk: Pơblang