Thun anai, tơring čar Dak Lak hmâo pơkă tơhnal pơhrui ngăn drăp hmâo 10.100 klai prăk. Khă hnun hai, amăng 5 blan akô̆ thun, pơhrui ngăn drăp kơnuk kơna mơng dưi ngă tui rơbêh kơ 3.400 klai prăk, hrŏ trun 13% bơhmu hăng thun hlâo. Pơkă lăng hlâo pơ̆ anăp anai, pơhrui ngăn drăp kơnuk kơna ƀơi tơring čar bŏng glăi hăng lu tơlơi tơnap, tơlơi lông dong.

Samơ̆ hăng pran pơsit hrưn đĭ ngă giong bruă pơhrui ngăn drăp kơnuk kơna thun 2023, Gơnong bruă prăk kak tơring čar Dak Lak amra kơtưn wai lăng pơhrui ngăn drăp kơnuk kơna, mă yua ba glăi bôh tơhnal hơdôm prăk pơhrui mơng lŏn drŏn, lŏn čuah. Kơtưn hơdôm bruă pel ĕp, lăng tui amăng bruă mă yua ngăn drăp. Gum hrom hăng Anom mă jia tơring čar hmao pơphô brơi Jơnum min mơnuih ƀôn sang tơring čar hơdôm jơlan gah kơtưn pơhrui ngăn drăp kơnuk kơna ƀơi tơring čar, kiăng pơhlôm pơhrui djơ̆, pơhrui hmao tlôn hơdôm mơta mă jia tui tơlơi pơkă mut amăng ngăn drăp kơnuk kơna./.