Tui hăng tơlơi lăi pơthâo, 6 blan akŏ thun, tơring čar Dak Lăk pơthâo rơđah hăng pok pơhai ngă djơ̆ tui djŏp tơlơi pơtrun mơ̆ng Ping gah, tơlơi phiăn mơ̆ng Kơnuk kơna kơ bruă tơhan, pơgang lŏn ia, bruă pơgang guai; pơsit brơi hơdôm jơlan hơdră akŏ bruă lăp djơ̆ hăng tơlơi hơmâo mơ̆ng tơring.

Đại tá Lê Văn Hùng, Kơ-iăng khua git gai tơhan, Khua djru bruă, Sang bruă khua git gai tơhan tơring čar Dak Lăk, tơring čar hơmâo ngă kjăp bruă đĭ kyar bơwih ƀong huă - mơnuih mơnam hrŏm hăng hơkrŭ kjăp bruă pơgang lŏn ia, rơnuk rơnua. Hơdôm anom bruă bơdjơ̆ nao hơmâo ngă hrŏm amăng bruă pơsit rơđah djŏp bruă dưm dăp, kơčăo bruă đah mơ̆ng dưi ngă tui tơlơi kiăng đĭ kyar, ƀrô pơhlom bruă pơgang lŏn ia. Tơring čar ăt ngă tŭ yua hơdră pơgang mă akan soh tơlơi phiăn (IUU), wai lăng kjăp mơnuih mă bruă, ƀat tô nao rai, amra iâu pơthưr gum pơgang bul pơtâo plao ia rơsĭ; pơđĭ tui bruă wai lăng, pơgang ba guai dêh čar, ngă hrŏm tŭ yua bruă pơkă, hlă gong guai hăng dêh čar Kur.

Tơhan mơnuih ƀôn sang pơgang mă pô hăng tơhan aka ƀu sit nik ăt hơmâo hơkrŭ tui mơn. Bruă ruah tơhan hơmâo ngă klă, rơđah rơđông, dưi ngă 100% mrô jao hăng giăm 5.500 čô mơnuih nao ngă tơhan. Tơhan ƀô̆ đô̆i, kông an hăng tơhan pơgang guai ngă hrŏm na nao pơhlom pơgang rơnuk rơnua kơđi čar, hơđong mơnuih tơpuôl, pơgang ba bruă jơnum prong mơ̆ng lŏn ia, laih dong pơtrut tơlơi gơgrong yom amăng bruă pơgang tơlơi truh lŏn adai ngă, djru ba mơnuih bưp tơlơi truh. Đại tá Lê Văn Hùng brơi thâo, hơdôm anom bruă, tơhan blah ngă tơring čar Dak Lăk hơmâo djŏp laih hơdră blah ngă, pơkơdong glăi: “Hơdôm anom bruă tơhan ƀơi tơring čar čih pơkra djŏp laih hơdră ngă bruă, blah ngă; pơplih glăi tañ hăng pơhrua lăp djơ̆ tui tơlơi glăk hơmao, bruă mă hăng ruah mơnuih mă bruă sit nik lơ̆m ngă tui gong gai 2 gưl; pơphun pơtŏp hrăm, ngă rơguăt djŏp bruă, pơsir hmao kru, tŭ yua djŏp tơlơi truh tơdah hơmâo. Pok pơhai bruă blah ngă “Anŏ pơging hăng rơngit adai kjăp phik” đah mơ̆ng akŏ pơdong kjăp bruă pơgang rơngit adai đơr hơr, djŏp anih, lu gưl, kjăp phik; ƀơ ƀrư̆ pơplih glăi lăp djơ̆ hơdră blah prai rơdêh por ƀu hơmâo mơnuih mơgăt”.

Ơi Đào Mỹ, Kơ-iăng khua jơnum min mơnuih ƀôn sang tơring čar Dak Lăk brơi thâo, 6 blan rơnuč thun 2026, bruă tơhan, pơgang lŏn ia hăng bruă pơgang guai dŏ hơmâo lu bruă akŏ phun. Ơi Đào Lỹ kiăng hơdôm anom bruă,khul tơhan blah ngă pôr pơthâo, pok pơhai tŭ yua tơlơi pơtrun mơ̆ng Ping gah, tơlơi phiăn mơ̆ng Kơnuk kơna; pơtrut wai lăng, pơgang guai dêh čar; wai lăng kjăp mơnuih mă bruă, ƀat tô, rơdêh nao rai, lơ̆m kiăng pơgang lŏn ia, bul pơtâo plao ia rơsĭ lĕ nao mơtăm; pok pơhai khut khăt bruă pơgăn mă akan hơdang soh tơlơi phiăn (IUU); laih dong hơđong pran jua kjăp bruă blah ngă, pơđĭ tui anŏ rơgơi mơ̆ng hrơi pơtŏp tơhan, djơ̆ tui hăng tơlơi kiăng amăng rơnuk phrâo: “Lăng ba bruă akŏ pơdong khul tơhan blah ngă hăng anom bruă tơhan ƀơi tơring čar kjăp kơtang amăng abih bang bruă, djơ̆ hăng tơlơi kiăng amăng rơnuk anai. bong kjăp bruă blah ngă, pơhlom anŏ klă mơ̆ng hơdôm tal pơtŏp tơhan, ngă hrŏm plah wah 3 khul tơhan, tui hăng tơlơi Pơtrun 03 thun 2019 mơ̆ng Kơnuk kơna”.

Ƀrô tal anai, tui tơlơi jao bruă mơ̆ng Ding jum ling tơhan, tơhan kual 5, ơi Đào Mỹ - Kơ-iăng khua jơnum min mơnuih ƀôn sang tơring čar Dak Lăk brơi Hră bơni mơ̆ng Khua ding jum ling tơhan brơi kơ 1 čô; brơi Hră bơni mơ̆ng Tơhan kual 5 brơi kơ 2 grup, 7 čô mơnuih rơgơi mơbruă gah bruă tơhan, pơgang lŏn ia amăng 6 blan akŏ thun 2026./.