Tui hăng tơlơi lăi pơthâo, abih bang gơnam tam pơkra rai ƀơi tơring čar (GRDP) amăng 6 blan akŏ thun mơng Lâm Đồng kơnong giăm 7,9% đôč, aset ƀiă mrô ba tơbiă. Ƀơi anăp kơ tơlơi sit nik anai, lu khua mua Jơnum min pơ ala mơnuih ƀôn sang rơkâo Jơnum min mơnuih ƀôn sang tơring čar lăi pơthâo rơđah hơdôm tơlơi gal kiăng pơđĭ kyar dong amăng ha mơkrah thun. Lăi pơthâo amăng sang jơnum, khua mua djop gơnong bruă, sang bruă brơi thâo tơring čar glăk pel ĕp glăi, ngă kiăo tui jơlan gah pơđĭ kyar tui rĭm gơnong bruă, rĭm bruă mă. Amăng anun, ngă hmua tŏ tui gơgrong phun hăng rơnoh pơđĭ kyar rơbêh 5%, bơ tuh tia pơkra ming, man pơdong hăng bơwih bơwang hơmâo pơsit lĕ hơdôm bruă amra pơtrut kiăo tui tlôn kiăng pơhrua amăng rơnoh pơđĭ kyar dŏ kơƀah.

Sa amăng hơdôm tơlơi kơđŏm glăi hơmâo čang rơmang lu hloh lĕ gơnong bruă pơkra ñôm. Tui ơi Nguyễn Bá Út, Khua gơnong bruă sĭ mơdrô hăng tuh tia pơkra ming tơring čar Lâm Đồng, hrŏm hăng bruă pơtrut tañ jao prăk tuh pơ alin man pơdong hăng pơsir hĭ tơnap tap brơi hơdôm akŏ bruă, lu ring bruă tuh tia pơkra ming akŏ phun amra pok ngă bruă amăng rơwang tal III hăng tal IV, ngă pơtrut pơđĭ kyar brơi tơring čar. “Kơnôl 9/7 ƀing gơmơi amra hơmâo ñôm tuk pơ-iă, kơnôl 19/7 amra hơmâo ñôm gal hăng kơnôl 26/7 dưi ba sĭ mơdrô ñôm blung a. Bruă tuh tia pơkra ming dŏ glăi, ră anai đing nao 14 boh sang măi bơdjơ̆ nao kơ bruă tuh tia pơkra ming amăng hơdôm kual, sang măi, sit biă ñu lĕ amăng Bình Thuận hơđăp amra pok ngă bruă amăng rơwang tal III, tal IV. Anai lĕ hơdôm tơlơi gal yôm phăn kiăng pơgôp pơđĭ kyar”.

Samơ̆, lu khua mua brơi thâo, bruă ta pơsit ngă djơ̆ hăng tơlơi dưi glăk kơnong ngă djơ̆ tơlơi kiăng đôč. Tơlơi yôm hloh lĕ kiăng jŭ yap tong ten tơlơi pơgôp mơng rĭm akŏ bruă, rĭm gơnong bruă hăng hơdôm hơnong pơkă pơđĭ kyar hrŏm, mơng anun djru brơi bruă wai lăng hơdeč hmar ƀiă hăng ngă atur kiăng anom bruă pơ ala mơnuih ƀôn sang krăo lăng hrơi blan ngă tui.

Pơđut mông jơnum bơkơtuai, kơ-iăng Khua git gai Ping gah, Khua jơnum min pơ ala mơnuih ƀôn sang tơring čar Lâm Đồng Lưu Văn Trung lăi pơtong, hrơi blan dŏ glăi amăng thun anai ƀu lu ôh, yua anun kơnong hơdôm akŏ bruă tañ pơkra rai gơnam tal hăng rơnoh pơđĭ kyar phrâo kah dưi pơgôp amăng hơnong pơkă pơđĭ kyar. “Hơdôm akŏ bruă dưi pơkra rai gơnam tam kiăng pơgôp brơi pơđĭ kyar lĕ hơdôm akŏ bruă apui yua, akŏ bruă drai ia apui lơtrik dŏ kơƀah glông hrĕ, lơm tuh pơ alin pơkra amra pok mă yua apui lơtrik, sang măi ñôm mơng anai truh rơnuč thun amra pơkra rai hơdôm tơ̆n ñôm amra pơtrut pơđĭ kyar. Kâo rơkâo kiăng hơdôm jơlan gah rơđah rơđông, brơi tong ten hăng rĭm boh sang măi, rĭm akŏ bruă.”

Tơlơi pơsit mơng mông jơnum ƀơi Lâm Đồng ăt lăi nao tơlơi rơkâo hrŏm hơmâo ba tơbiă brơi hơdôm boh ƀon lan kual Dap kơdư ră anai: kiăng dưi ngă tui hơnong pơkă pơđĭ kyar lu hloh, rĭm akŏ bruă kiăng pơlir hăng hrơi mông ngă tong ten, rĭm ring bruă kiăng tañ pơkra pơjing rai gơnam tam, rĭm gơnong bruă kiăng pơsit tong ten tơlơi pơgôp mơng ƀing gơñu. Lơm hơdôm anŏ pơtrut pơđĭ kyar dưi pơkra rai gơnam tam hăng ngăn rơnoh sit nik, hơnong pơkă pơđĭ kyar dua mrô kah mơng dưi ngă tui amăng thun 2026. /.