Giăm 30 tơlơi ba nao bơkơtuai amăng mông jơnum đing nao sem lăng tơlơi dưi hăng ba tơbiă hơdră kiăng ba tơring čar jing bơnah pơđĭ kyar phrâo, tơkuh nao rai kual Dap kơdư, Dơnung tong krah hăng dêh čar Kur tơdơi kơ pok prong anih pơđĭ kyar lơm pơmut hrŏm.

Đĭ pơhiăp amăng mông jơnum, Khua git gai Ping gah tơring čar Dak Lak ơi Lương Nguyễn Minh Triết lăi pơtong, tơring čar amra tŭ mă hăng ba hơdôm tơlơi pơgôp hiăp mơng ƀing kơhnâo jing bruă mă sit nik, hơmâo anom bruă glăm ba tong ten. Hơnong pơkă pơjing gong gai črâo ba, djru brơi, lăng mơnuih ƀôn sang hăng anom bơwih ƀong sĭ mơdrô ngă akŏ phun, lăng bruă pơđĭ kyar anom bơwih ƀong sĭ mơdrô hăng bruă tuh pơ alin jing tơlơi pơkă tŭ yua amăng wai lăng ƀơi ƀon lan. Tơring čar amra git gai hơdôm mông mă bruă hăng hơdôm anom bruă brơi rơđah rơđông, tong ten ƀiă tơdơi kơ mông jơnum anai kiăng ngă tui hơdôm tơlơi pơčeh.