Khua dêh čar ơi Lê Minh Hưng lăi rơđah, tơlơi đĭ pơhiăp yom, abih pran jua, dơlăm tong ten hăng hlom bom mơ̆ng khua ping gah, khua mir sir jing pran kơtang pơtrut pran jua prong biă mă hăng tơlơi pơmin, anăp ngă bruă hluh gah brơi kơnuk kơna mă bruă hruaih, djop gưl anom bruă, djop gơnong bruă ƀơi dêh čar, djop tơring čar hai ăt kơtưn gir run hloh, khut khăt kiăng ngă klă hloh bruă jao, pơgiong tơhnal pơkă djop rơnoh pơtrun, mrô pơđĭ kyar bơwih ƀong huă mơnuih mơnam thun 2026 hăng abih rơwang thun 2026-2030.

Lăi pơtong khut khăt hăng ngă djơ̆ tơhnal pơtrun rơnoh pơđĭ kyar thun 2026 hăng mơ̆ng črăn 2026-2030 dưi ngă djop 2 mrô, hrŏm hăng tơlơi kiăng pơgang hơđong tơlơi bơwih ƀong huă amăng dêh čar, sem glăi pơgăn prăk trun nua hăng ngă bơkơnar atur tơlơi bơwih ƀong huă, Khua dêh čar ơi Lê Minh Hưng rơkâo:

“Anom bruă pơpă, tơring čar hlơi dưi ngă djop laih tơhnal pơkă pơđĭ kyar amăng 6 blan akŏ thun ăt khom gir run dơ̆ng mơ̆n kiăng dưi tŭ mă đĭ lu hloh. Djop anom bruă, djop tơring čar aka ƀu ngă djop tơhnal pơkă lĕ khom gir run ngă giong rơnoh jao, biă mă ñu plơi prong jưh jom Hà Nội hăng ƀông prong Hồ Chí Minh hrŏm hăng lu tơring čarpơđĭ kyar laih.

Ră anai, 25/34 boh tơring čar khom gir run hloh dơ̆ng. Amăng hră dăp hlâo mơ̆ng kơnuk kơna jao rơnoh pơkă, bruă mă rơđah rơđong tum teč kơ djop bruă, djop khul bruă, rim tơring čar, rơkâo djop ding jum, anom bruă, biă mă ñu hơdôm tơring čar, ƀôn prong khom đing nao hăng pok pơhai ngă tui jơlan hơdră dăp hlâo, tui tơlơi git gai mơ̆ng kơnuk kơna”.

Hơdôm tơlơi git gai mơ̆ng sa čô khua apăn akŏ kơnuk kơna brơi ƀuh, kơnuk kơna ƀu ah ĭn ôh hăng hơdôm boh tơhnal hơmâo ngă hnang blung. Biă mă ñu plơi prong jưh jom Hà Nội hăng ƀôn prong Hồ Chí Minh, dua boh ƀôn prong hơmâo rơnoh pơhrui mă prong hloh GDP amăng dêh čar ta. Tơdah akŏ rơdêh treng prong hơdui ba lu čơgăn rơdêh treng đuăi hmar, khul rơdêh treng pơhmu kơ tơlơi bơwih ƀong huă ruăi rơdêh anun tơnap biă mă dưi glăi truh pơ anih jưh. Djop sang bruă, gơnong bruă, tơring čar aka ƀu ngă djop tơhnal pơkă pơđĭ kyar 2 mrô khom gir run ngă giong tơhnal pơkă, anai lĕ tơlơi pơtrun hiăp hmư̆ rơđah laih, kiăng hơmâo bruă ngă beč bal djơ̆ hơdră hloh, ƀu dưi bĕ ôh tơlơi glăm ba mơ̆ng djop sang bruă ngă kaih. Ră anai 25/34 boh tơring čar khom gir hloh, mrô anai sa tơlơi tơnap či ngă giong bruă jao amăng sa thun, ƀuh rơđah rup kač pơƀuh kơ hơbô̆ bruă bơwih ƀong huă mah hơmâo tơlơi bơngač samơ̆ aka ƀu bơkơnar ôh, kiăng ngă hrŏm abih bang pơtum hăng abih bang bruă mă kiăng ngă djơ̆ tơhnal pơkă pơđĭ kyar 2 rơnoh amăng thun 2026 hăng abih amăng sa rơwang bruă thun 2026-2031.