Tui lăi pơthâo, 6 blan akŏ thun, abih tih gơnam pơkra rai amăng tơring čar Khánh Hòa (GRDP) đĭ 9,03%, dong 14 amăng 34 boh tơring čar, ƀôn prong hăng dong tal 2 amăng kual Dơnung tong krah hăng Dap kơdư. Pơhrui ngăn drăp kơnuk kơna giăm 28.000 klai prăk, pơgiong rơbêh 80% tui tơlơi pơkă amăng thun. Bruă tuh tia pơkra ming tŏ tui pơplih, hơdôm bruă gru grua, mơnuih mơnam, djru ba hơmâo đing nao, bruă pơgang rơnuk rơnua pơhlôm hơđong. Samơ̆, lu khua mua brơi thâo, gah tlôn kơ hơdôm tơlơi dưi anun ăt hơmâo lu bruă kiăng lăng nao tơpă kah mơng dưi pơđĭ kyar hơđong kjăp amăng hơdôm thun pơ anăp. Ơi Phan Gia Ngọc, kơ-iăng Khua khul krăo lăng bruă phiah phiăn, Jơnum min pơ ala mơnuih ƀôn sang tơring čar Khánh Hòa brơi thâo: “Pơhrui ngăn drăp thun anai giăm 27.930 klai prăk samơ̆ rơbêh 14.000 klai prăk, dưm dưm rơbêh 53%, mơng prăk yua lŏn mơnai hăng brơi arăng yua apah. Anai lĕ prăk pơhrui ha wŏt. Lơm anun, mrô pơhrui mơng anom bơwih ƀong sĭ mơdrô kơnuk kơna hăng anom bơwih ƀong sĭ mơdrô mơnuih ƀôn sang ngă pô hrŏ trun. Ăt dưi lăi tui anai, tơlơi bơwih ƀong huă ƀơi Khánh Hòa glăk gơnang nao yua lŏn mơnai hơđăp đôč, aka ƀu pơplih hơdai nao ba glăi rơnoh yôm hơđong kjăp mơng bruă bơwih ƀong, sĭ mơdrô”.

Tui hăng lu khua mua, anai lĕ tơlơi pơhŭi kiăng đing nao yua pơhrui mơng lŏn mơnai amra ƀu sui ôh. Tơdah kiăng pơđĭ kyar kơtang, tơring čar kiăng tŏ tui pơsir hĭ hơdôm akŏ bruă dŏ gun, pơhưč hơdôm akŏ bruă tuh pơ alin dưi ngă bruă tŭ yua, pơđĭ kyar kơtang amăng kual bơwih ƀong sĭ mơdrô, tuh pơ alin, bơwih bơwang hăng tuai čuă ngui kiăng pơhlôm pơhrui hơđong, sui thun amăng ngăn drăp. Ƀu djơ̆ kơnong đing nao hơbô̆ bruă hơmâo prăk pơhrui, lu khua mua ăt ba tơbiă tơlơi rơkâo kơ bruă pơhrua ngăn rơnoh kiăng mơnuih ƀôn sang, sit biă ñu mơnuih ƀôn sang bơdjơ̆ nao hơdôm akŏ bruă dưi tŭ mă tơlơi dưi tong ten ƀiă mơng boh than pơđĭ kyar. Ơi Võ Nam Thắng, Khua git gai Ping gah phương Đông Ninh Hòa, tơring čar Khánh Hòa brơi thâo: “Kiăng hrưn đĭ tŭ yua mơng pơhrui, mă yua ngăn drăp, pơhlôm bruă djru mơnuih mơnam, sit biă ñu djru pơplih bruă mă, tuh pơ alin hrưn đĭ klă amăng bruă ia jrao, pơtô pơjuăt ƀơi ƀon lan. Mơnuih ƀôn sang ruah khua čang rơmang hơdôm boh than ba glăi amăng bơwih ƀong huă amra kah pơpha, pioh yua tong ten ƀiă amăng hơdôm hơdră djru mơnuih mơnam, djru ƀơi anăp kơ mơnuih ƀôn sang, sit biă ñu lĕ ƀing mơnuih bơdjơ̆ nao yua pơhrui glăi lŏn mơnai kiăng pơđĭ kyar tuh tia pơkra ming, plơi prong”.

Hrŏm hăng tơlơi čang rơmang kơ anih anom hăng tơlơi dưi pơđĭ kyar, mơnuih ƀôn sang čang rơmang prăk pơhrui mơng lŏn mơnai amra yua tuh pơ alin man pơdong sang hră, sang ia jrao, jơlan glông, dơnao pơkŏng ia, pơtô bruă mă, ĕp brơi bruă mă hăng hơdôm hơdră djru bơwih ƀong huă tơdơi kơ pơhrui glăi lŏn mơnai, kiăng boh than ba glăi mơng pơđĭ kyar amra ngă lar hyu amăng mơnuih mơnam.

Jơnum min mơnuih ƀon sang tơring čar Khánh Hòa brơi thâo, amăng 6 blan rơnuč thun, tơring čar gir run pơđĭ kyar GRDP ƀiă biă mă ñu 11,2%, mơng anun pơgiong hơnong pơkă pơđĭ kyar ha thun mơng 10-11%. Kiăng dưi ngă tui hơnong pơkă anai, tơring čar amra đing nao pơtrut tañ jao prăk tuh pơ alin man pơdong; pơsir hĭ hơdôm anŏ aka ƀu klă; tŏ tui boh tŭ yua pă tơlơi pơtrut pơđĭ kyar; hrưn đĭ klă amăng pok pơhai gong gai ƀon lan dua gưl; laih dong đing nao ngăn rơnoh brơi hơdôm hơdră djru mơnuih mơnam hăng hơdôm ring bruă akŏ phun. Ơi Châu Ngô Anh Nhân, Khua gơnong bruă prăk kak tơring čar Khánh Hòa brơi thâo, tơring čar prap lui kah pơpha ngăn drăp amăng thun 2025 hăng abih tih rơbêh 10.000 klai prăk. Anai lĕ tơlơi pơtrut phun kiăng pơđĭ kyar amăng hơdôm blan rơnuč thun. “Ngăn rơnoh anai amra kah pơpha brơi abih bang să, phương kiăng lăp djơ̆ tơlơi rơkâo tuh pơ alin amăng hơdôm bruă akŏ phun. Tơring čar đing nao tuh pơ alin brơi pơtô pơjuăt, ia jrao djru brơi mơnuih ƀôn sang; laih dong đing nao ngăn rơnoh brơi hơdôm ring bruă phun, sit biă ñu lĕ hơdôm akŏ bruă pơtrut pơđĭ kyar amăng kual Dơnung tơring čar Khánh Hòa”.

Hơdôm boh than ba glăi mơng pơđĭ kyar hơđong amăng 6 blan akŏ thun jing atur yôm phăn kiăng Khánh Hòa hrưn đĭ tañ. Samơ̆, kiăng pơđĭ kyar hơđong kjăp, tơring čar kiăng pơplih mơng pơhrui mơng yua lŏn mơnai hơdai nao ngă pơtrut sui pơ anăp amăng bơwih ƀong, sĭ mơdrô hăng pơhlôm boh than pơđĭ kyar dưi lar hyu sit nik tơl tơlơi hơdip mơnuih ƀôn sang./.