Tơlơi hơmâo ruă pran jua ngă kơ 5 čô čơđai sang hră đah kơmơi hlăk či đĭ anih 6, hơmâo tơlơi truh lơ̆m gơñu bơjak nao mơnơi ƀơi ia dơnao bơnư̆ pơkong Đak Pot hăng ƀu bưng ôh abih bang gơñu tơbleñ tơkai lê̆ trun amăng ia dơnao djơ̆ ƀơi anih dơlăm hloh. Tơlơi truh hơmâo amang bơyan pơdơi prong, adai h’uh pơ-iă pơ-iong mah amăng bơyan hơjan ia amăng dơnao, amăng ia krông, čroh hnoh hlăk đĭ, ia rô kơtang. Tơlơi anai hơmâo ƀuh dŏ lu mơta tơlơi kơƀah, wai lăng ƀing čơđai muai mơ̆ng sang anŏ, plơi pla amăng blan pơdơi prong.

Ƀơi anăp kơ tơlơi pơhing djơh hăng anai, kơnôl 9/7/2026, Jơnum min mơnuih ƀôn sang tơring čar Lâm Đồng hơmâo ngă hră pơtrun git gai ječ ameč, djop sang bruă kơnuk kơna kơtưn ngă hrŏm pơhlom hlâo, pơgang tơlơi truh răm ƀăm kah hăng anun. Tui hăng anun, anom bruă Pơtô hrăm kiăng ngă hrŏm sang anŏ wai lăng čơđai sang hră amăng bơyan pơdơi prong, khom hơmâo anih pơtô hrăm luai ia rơnuk rơnua. Anom bruă gru grua, pơrơguăt drơi jăn kơtưn hyu sem lăng djop anih dơnao pơkong ia, anih hrăm luai brơi pơgang rơnuk rơnua hơđong; anom bruă gah ia jrao ăt kơtưn hơdră pơtô ba tơlơi thâo pơjrao ječ ameč blung a sit hơmâo tơlơi truh, hlâo kơ ba nao pơ sang ia jrao prong. Hrŏm hăng anun, ƀing tơhan amăng kơnuk kơna khom hơmâo bruă jŭ yap glăi abih bang ia dơnao, dơnao pơkong ia hnoh, ia krông kiăng hơmâo hơdră wai lăng ba ƀing čơđai amăng bơyan pơdơi prong, kiăng bĕ hĭ ƀơi anih hơmâo tơlơi hŭi rơhyưt sit hyu mơnơi ƀudah hyu ngui giăm hang ia.

Biă mă ñu, Jơnum min mơnuih ƀôn sang tơring čar Lâm Đồng lăi pơtong, khua mua djop sang să, phường khom glăm ba tơlơi soh glăi tơdah tơlơi truh răm ƀăm prong, djai brŭ yua ƀlung ia ƀơi anih ñu wai lăng.

Git gai khut khăt djop sang bruă, kiăng huăi hơmâo tơlơi čok hia, ƀlĕ ia mơta rơgao mông mơ̆ng lu sang anŏ, plơi pla yua anun khom răng kơđiăng tong ten hloh. Khom đing nao lu hloh kơ ƀing čơđai muai amăng bơyan pơdơi prong, pơtô hrăm brơi čơđai thâo luai ia, pơgang mă pô laih anun anăm lui čơđai hyu mă hơjăn tơdruă čơđai nao mơnơi ia krông, ia ania, ia dơnao pơprong mơ̆ ƀu hơmâo mơnuih prong nao hrŏm. Pơgang tong ten kơ čơđai ƀơi anăp tơlơi či truh hơmâo kah hăng ƀlung ia amăng bơyan pơdơi, ƀu kơnong hơjăn bruă pô hlơi ôh, abih bang khom gum hrŏm djru ba.