Tơdơi kơ dăp glăi hơdôm anom bruă gưl tơring čar, Khánh Hòa pok prong anih đĭ kyar hăng rơbêh 8.700km2 lŏn hăng kơdư, 65 boh sang să hrŏm hăng kual ia rơsĭ prong. Dăp rơmet man pơdong kjăp, kiăo tui Tơlơi phiăn Pơkă hơnong man pơdong thun 2025 laih anun pơhmư̆ tui tơlơi pơgôp hiăp mơ̆ng ding jum, anom bruă gơnong dlông hrŏm hăng mơnuih ƀôn sang.

Tui hăng akŏ bruă, Khánh Hòa anăp ngă anih pơtruh kual ia rơsĭ Dơnung Tong Krah hăng Dap Kơdư, mă glông Nha Trang - Đà Lạt ngă akŏ phun či akŏ pơjing anih pơtruh “Ia rơsĭ - Dap Kơdư”. Hơbô̆ bruă đĭ kyar mơ̆ng Khánh Hòa hơmâo pơsit rơđah tui tơlơi pơkă: “1 bruă anăp nao hrŏm - 2 glông pơtruh - 3 kual đĭ kyar - 4 gong tơmeh akŏ phun”. Amăng anun 4 gong tơmeh akŏ phun đĭ kyar mơ̆ng Khánh Hoà hơmâo: bơwih brơi tuai hyu ngui klă hloh; pơčeh phrâo ia rơgơi hăng boh thâo mrô; pơkra boh thâo gah ia rơsĭ; măi mok pơkra pơjing gơnam yom...Pơblang rơđah hloh kơ bruă anai, ơi Châu Ngô Anh Nhân, Khua gơnong bruă prăk tơring čar Khánh Hòa brơi thâo: “Gah bruă apui lơtrik, pơƀut pơkra apui lơtrik phrâo, amăng anun hơmâo put ayuh ƀơi Dơnung Khánh Hòa. Kơ jơlan đĭ kyar plơi prong, plơi pla, hlâo kơ thun 2030, tơring čar Khánh Hòa jing ƀon prong, hơmâo 21 kual plơi prong, amăng anun hơmâo 5 plơi prong pơkă mrô 2 hăng gir ngă tui hơnong pơkă hơmâo plơi prong pơkă mrô 2 hăng 16 plơi prong mrô 3”.

Lăng nao truh pơ thun 2050, Khánh Hòa gir jing anih bơwih ƀong mơ̆ng ia rơsĭ prong mơ̆ng dêh čar, đĭ kyar mơtah mơda hăng kơdrưh bơkơnar hăng kual ASIA. Pơhiăp ƀơi mông jơnum, Khua jơnum min mơnuih ƀôn sang tơring čar Khánh Hòa ơi Nguyễn Việt Hùng lăi dlăm, bruă lăi pơthâo pơkă hơnong man pơdong ƀu djơ̆ tơlơi tuč rơnuč ôh, jing tơlơi akŏ phun kơ sa rơwang phrâo.

Tơlơi truh kih khŏm pơkă hăng hơdôm kơčăo bruă tŭ yua hăng tơlơi pơplih klă hiam amăng tơlơi hơdip mơnuih ƀôn sang. Tơring čar Khánh Hòa ƀuăn đĭ kyar tañ samơ̆ hơđong, khut ƀu ngă răm rai anih hơdip, ayuh hyiăng glai rưng, hăng gơnam yơyom mơ̆ng đưm hlâo či plih mă anŏ đĭ kyar ƀơi anăp. Kiăng anom bruă tuh pơ alin hơ-in pran jua, Khua jơnum min mơnuih ƀôn sang tơring čar Khánh Hòa ơi Nguyễn Việt Hùng pơsit: “Ăt pơƀut pơklaih anŏ dŏ kơđông pơgăn hĭ bruă či đĭ kyar, biă ñu bruă pơkră hơnong man pơdong, lŏn tơnah, tuh pơ alin, čuk pơkra, pơklaih ala lŏn wơ̆t hăng bruă ngă hră. Pơkă hơnong man pơdong pok rai anih đĭ kyar. Bruă mơ̆ng ƀing ta lĕ khŏm ngă tơlơi anun, laih dong hăng sang bruă mơdrô, pô tuh pơ alin kâo čang rơmang ƀing gih sem lăng hră pơkă hơnong, prăp rơmet anai jing phun tơhnal či tuh pơ alin sui pơ Khánh Hòa”./.