Ƀơi să Tây Khánh Sơn, kual čư̆ siăng kriang pơtâo hơmâo lu mơnuih djuai ania ƀiă dŏ hơdip, ră anai hơmâo kơnong 135 čô nai pơtô, dŏ kơƀah 30 čô. Hơdôm tơlơi hrăm anun lĕ Ngoại Ngữ, Âm Nhạc, Tin Học…ƀu hơmâo nai pơtâo, anun khŏm ĕp ƀing nai mơng ƀon lan pơkŏn nao pơtô brơi. Ơi Phạm Ngọc Hải, Khua git gai Ping gah să Tây Khánh Sơn brơi thâo, să hơmâo pơphun bruă ĕp pơmut nai pơtô samơ̆ ƀu hơmâo hlơi ôh rai nô̆p hră pơ-ar. “Amăng să Tây Khánh Sơn hơmâo 5 boh sang hră glăk kơƀah 30 čô nai pơtô. Ƀing gơmơi hơmâo pơblang brơi, lăi pơthâo kơ bruă ĕp pơmut amăng djop plang kiăng dưi kĭ hră pơkôl mă bruă. Bruă ĕp pơmut ƀing nai nao pơtô pơ kual čư̆ siăng anai tơnap tap biă mă, mah lăi pơthâo lu yơh samơ̆ ƀu hơmâo hlơi ôh kiăng glăi pơtô pơ anai. Să gơmơi čang rơmang tơring čar djru brơi hăng bruă kah pơpha nai pơtô mơng kual dơnung rai pơ anai”.

Bruă anai ƀu djơ̆ ƀuh ƀơi Tây Khánh Sơn đôč ôh ăt wŏt ƀơi lu ƀon lan kual čư̆ siăng kriang pơtâo amăng Khánh Hòa anun lĕ Khánh Vĩnh, Bác Ái…Hlâo adih, bruă kơƀah nai pơtâo kual čư̆ siăng hơmâo hơdôm boh tơring glông amăng tơring čar pơsir hĭ hăng hơdră kah pơpha nai pơtô. Samơ̆, mơng hrơi pok pơhai gong gai ƀon lan 2 gưl, tơhnal pơkă kơ bruă kah pơpha nai pơtô aka ƀu tô glăi. Tui ơi Lê Đình Thuần, kơ-iăng Khua gơnong bruă pơtô pơjuăt tơring čar Khánh Hòa, anai lĕ bruă tơnap kiăng pơsir hĭ mơtăm ră anai: “Ƀing gơmơi amra tŏ tui kơsem min dong kiăng hơmâo hơdră phara, jak iâu ƀing nai glăi pơtô pơ kual tơnap tap. Tơdah mơ-it nao sa tơlơi pơsit kiăng hơmâo hrơi mông, rơkâo tơlơi pơtrâo trun, tŭ ư ngă tui tơlơi pơtrâo trun, pơjing tơlơi pơsit, bruă apah prăk hiưm pă, anai lĕ bruă tơnap tap biă mă”.

Ƀơi anăp kơ bruă lu sang hră kual čư̆ siăng kơƀah nai pơtô mơ̆ gơnong bruă pơtô pơjuăt tơring čar Khánh Hòa kiăng hơmâo hrơi mông kơsem min, Khua git gai Ping gah tơring čar Khánh Hòa Trần Phong rơkâo ječ ameč ĕp lăng bruă mă mơng hơdôm boh ƀon lan đơ đam dêh čar, hlâo čih pơkra-mơ-it nao hơdră bruă. “Tơdah amăng đơ đam dêh čar ƀu hơmâo dong tah, lơm anun kah ĕp hơdră djru phara hajan pô. Ră anai, hơdôm boh ƀon lan hơmâo laih hơdră bruă anai ta kiăng lăng tui, hrăm tui. Yua hơdră bruă anai bơdjơ̆ nao ngăn drăp ƀon lan, tui tơlơi glăm ba mơng Jơnum min pơ ala mơnuih ƀôn sang tơring čar pơsit brơi. Tơring čar hơmâo anŏ gal arăng djru brơi samơ̆ tơlơi đing nao djru ba mơng tơring čar hăng ƀing nai nao pơtô pơ kual čư̆ siăng amra hiưm pă ñu?”

Pơsir hĭ bruă kơƀah nai pơtô kual čư̆ siăng ƀơi Khánh Hòa ƀu djơ̆ kơnong lĕ bruă ĕp pơmut đôč ôh mơ̆ ăt lĕ tơlơi đing nao, tơlơi glăm ba mơng anih anom kơđi čar hăng bruă pơtô pơjuăt kual čư̆ siăng. Bruă hơdôm boh sang hră kual čư̆ siăng kiăng ră anai lĕ tơlơi gơgrong, ngă bruă hơdeč hmar mơng hơdôm anom pơphô bruă amăng pơhưč nai pơtô. Kiăng truh thun hrăm phrâo, hơdôm boh sang hră kual čư̆ siăng huăi hyu ĕp ƀing nai pơ pơkŏn rai pơtô dong tah.