VOV4.Jarai-Truh ră anai, anih anom sĭ mơdrô ƀañ Trung thu amăng tơring čar Dak Lak hlăk dik dăk tui laih. Hơdôm anih pơdă sĭ mơdrô ƀañ Trung thu blan bơrơmi ria hơmâo lu mơta ia iom pha ra pha ra anun amra hơmâo mơta ƀañ sĭ kơ anih anom sĭ mơdrô bơyan blan bơrơmi ria hăng tơlơi mơak dik dăk yua kơ klin Covid 19 ngă gun hĭ dua thun rơgao.

Rơbêh sa wơ̆t hrơi tơjuh hăng anai, djop jơlan phun amăng plơi prong Ƀuôn Ma Thuôt, kah hăng jơlan Lê Thánh Tông, Lê Hồng Phong, Phan Bội Châu, Phan Chu Trinh…lu čơgăn ngă anih pơdă sĭ mơdrô ƀañ Trung thu arăng pơhrôp hiam hyơ hyơr. Hlăk ruah mă ƀañ Trung thu či blơi ngă gơnam brơi kơ sang anŏ, ơi Bùi Minh Chánh, dŏ pơ phường Tân Lợi, plơi prong Ƀuôn Ma Thuôt, tơring čar Dak Lak brơi thâo, hơdôm mơta djuai ƀañ hơmâo anăn hmư̆ hing laih, sang anŏ ruah blơi mă yơh:

“Rĭm thun kâo ruah mă blơi ƀañ trung thu hmư̆ hing arăng sĭ mơdrô amăng anih anom sĭ mơdrô ră anai, hơdjă rơgoh, jơman hăng tŭ yua, yua hơmâo anăn  anih pơkra tong ten. Kâo ƀuh thun anai gơnam sĭ mơdrô đĭ tui laih pơkă hăng tơđar thun, hruh hiam, lu djuai, lua mơta”.

Thun anai, djop čơgăn pơdă gơnam sĭ mơdrô sĭ lu djuai ƀañ trung thu juăt ƀuh kah hăng Kinh Đô, Yến Sào Khánh Hòa, BiBica….laih anun ƀañ anăn plơi pla kah hăng Hà Nội, Thành Phát lu arăng pơdă amăng anih anom sĭ mơdrô tal anai. Lu mơta ƀañ pơkra ming ngă tui lu hơbô̆ phara. Hrom hăng dua mơta ƀañ rơ-un ƀlit hăng ƀañ om lĕ hơmâo ƀañ pioh kơ ƀing kom ƀong añăm mơnong ƀing ƀong huă kom drơi, kah hăng djuai ƀañ pơkra ƀâo mơnâo bơnga črih bơnga sup, rơtă mơtah, hơbơi rơbua, rơnga jŭ asar plui, asar amăng lăm rơ-un, ƀañ pơkra ming hăng lu mơta mơnong ƀong, hơmâo ia ik, añăm un pơhang, mơnong rơmă akan, mơnong tul jambon (Yam Ƀông), añăm mơnong mơnŭ om ngă čơđeh añĕ jambon hăng boh mơnŭ, boh wăt ƀăt hra…

Tơhan wai pơgang anih anom sĭ mơdrô hyu sem lăng ƀañ trung thu amăng sang sĭ mơdrô lơ̆m plơi prong Ƀuôn Ma Thuôt

Ƀu kơnong pơkă anŏ hơdjă ƀong jơman đôč ôh, mơnuih blơi ƀong jai hrơi thâo ruah mă lăng hruh rơgoh hơdjă, hiam pioh blơi pơyơr tơdruă, pơpŭ hrơi mơak blan bơrơmi ria. Amai Nguyễn Thị Bích Phương, pô sang sĭ mơdrô Ngọc Khánh 2, jơlan Phan Bội Châu, phường Tân Tiến, plơi prong Ƀuôn Ma Thuôt brơi thâo:

“Dua thun hlâo yua klin ngă anun yơh gơmơi hơmâo gơnam sĭ mơdrô kơnong ƀiă, samơ̆ thun hơmâo klin ăt abih mơ̆n anun gơmơi blơi tơpung pơkra ƀañ mơ̆ng lu sang bruă hmư̆ hing pioh ba glăi bơwih brơi sĭ mơdrô kơ mơnuih ƀôn sang blơi ƀong kah hăng blơi mơ̆ng sang bruă Kinh Đô, Bibica hăng Đồng Khánh dơ̆ng đa”.

Lu pô gơnam sĭ mơdrô brơi thâo, ƀañ trung thu thun anai rơnoh sĭ đĭ  hloh mơ̆ng 3000-5000 prăk sa tơlô̆ ƀañ pơkă hăng tơđar thun. Tui hăng tơlơi pơhing mơ̆ng gơñu tŭ mă mơ̆ng sang bruă pơkra ming, yua kơ rơnoh blơi tơpung pơkra ƀañ đĭ anun yơh rơnoh sĭ mơdrô ƀañ ăt đĭ tui mơ̆n. Amai Phạm Thị  Chúc Giang, pô sang sĭ mơdrô ƀañ kĕo Phương Hoa ƀơi jơlan Y Jut, plơi prong Ƀuôn Ma Thuôt brơi thâo, lơ̆m sa tơlô̆ ƀañ trung thu rơnoh mơ̆ng 60 rơbâo truh 75 rơbâo prăk. Hăng lu djuai ƀañ yôm lĕ rơnoh mơ̆ng 3 klăk prăk sa hruh, amăng lăm 4 tơlô̆ ƀañ. Ăt tui hăng amai Giang mơ̆n, ră anai, mơnuih blơi aka ƀu blơi lu ôh:

“Sang sĭ mơdrô gơmơi sĭ mơdrô rơbêh 10 thun laih, pơkă hăng thun hlâo lĕ, thun anai lu gơnam sĭ mơdrô đĭ tui ƀiă, ră anai mơnuih ƀôn sang blơi aka lu ôh, dŏ hơdôm hrơi dơ̆ng năng ñu amra lu tui”.

Sa boh anih si mơdrô ƀañ trung thu ƀơi jơlan Lê Thánh Tông-plơi prong Ƀuôn Ma Thuôt

Pioh wai pơgang mơnuih blơi yua pơgang ba mơnuih blơi yua lĕ djop sang bruă, pô sĭ mơdrô, anih pơkra ming, sĭ mơdrô djơ̆ lĕ, Anom bruă wai lăng anih anom sĭ mơdrô tơring čar Dak Lak hlăk pok tal sem lăng hlâo, amăng bơyan truh kơ tơdơi bơyan blan bơrơmi ria thun 2022. Hrom hăng anun, akŏ blan 9, tơring čar Dak Lak amra pơphun brơi dua grup lu anom bruă hyu sem lăng ƀơi 6 boh tơring glông, plơi prong hăng plơi prong phun dlăng lăng ngă tui djơ̆ tơlơi pơkă mơ̆ng tơlơi phiăn kơnuk kơna pơtrun kơ pơgang hơdjă mơnong ƀong huă mơ̆n hă. Ơi Trần Văn Tiết, Kơ-iăng Khua anom bruă pơgang hơdjă mơnong ƀong huă tơring čar Dak Lak, brơi thâo:

“Ƀing gơmơi amra pơtum ĕp lăng hơdôm mơta gơnam sĭ mơdrô sĭ yua amăng bơyan ngui ngor mơak Blan bơrơmi ria juăt tết trung thu kah hăng ƀañ, mưt, kĕo, tơpai, ƀiêr, ia mih. Tui hluai anŏ kiăng ĕp lăng hlơi ngă soh glăi amra đŭ prăk, bơtơhmal tui tơlơi phiăn pơtrun. Hăng anih pơkra ming ƀañ ƀu djơ̆ tơlơi pơkă, ƀu djop anŏ gêh găl yua ƀu hơmâo hră brơi ngă bruă, laih anun hơmâo sang bruă djop laih anŏ gêh găl samơ̆ ƀu pôr pơthâo ôh anăm gơnam sĭ mơdrô gơñu pơkra ming ăt ngă soh tơlơi pơkă mơ̆n.

Lơ̆m pơkra ming tơdah mă yua tơpung, ia rơmă hơgĕt thơ, ia ƀâo bơngưi, ngă jơman mơ̆ ƀu lăp hăng anŏ pơkă tŭ yua amra plĕ nao tơlơi soh gơñu lu mơta laih anun bơtơhmal tơlơi ngă soh anun”.

Nay Jek: Pơblang