Khul mơnuih ngă hmua tơring čar Dak Lak phrâo pơphun hơdôm bruă pơlir sĭ mơdrô gơnam tam, lăi pơthâo hăng blơi pơhrui gơnam đang hmua, pơhưč lu ding kơna, mơnuih ngă hmua hăng hơdôm anom bơwih ƀong hrŏm nao mut hrŏm. 650 gơnam tam yôm phara, hiam hơdjă hăng gơnam OCOP hơmâo lăi pơthâo ƀơi 34 anih pơdă gơnam, pơhlôm pơƀuh ƀơi anăp brơi anom bruă sĭ mơdrô hăng mơnuih blơi yua. Tơlơi yôm hloh lĕ hrŏm hăng lăi pơthâo gơnam tam ƀơi anăp, mơnuih ngă hmua hơmâo črâo brơi bruă lăi pơthâo, sĭ gơnam amăng internet. Anai arăng lăng lĕ jơlan yak nao kiăng ngă jê̆ giăm tui kơplah wah mơnuih ngă hmua hăng anih anom blơi pơhrui, sit biă ñu amăng hrơi mông mơnuih blơi yua jai ruah bruă blơi gơnam tam amăng internet lua tui.

Ơi Lê Xuân Cường, Khul mơnuih ngă hmua să Ea Sup brơi thâo, gơnam đang hmua jai hrơi hiam hơdjă, samơ̆ bruă ba sĭ mơdrô, lăi pơthâo hăng pơjing anăn apăn sĭ mơdrô mơng mơnuih ngă hmua aka ƀu pơhlôm klă. Yua anun, pơplih mrô kiăng črâo brơi tong ten kiăng mơnuih ƀôn sang dưi ngă tui mơtăm amăng hơdôm bruă mơng plơi pla, lăi pơthâo truh ba sĭ gơnam tam. “Mơnuih ngă hmua gơmơi pla pơjing gơnam đang hmua jai hrơi hiam tui. Samơ̆, bruă ba gơnam tam hyu sĭ ăt bưp lu tơlơi tơnap tap. Ră anai, ngă tui tơlơi pơtrun mrô 57 mơng Ding jum kơđi čar amăng pơtrut pơplih mrô, ƀing ta pok pơhai hơdôm boh tơhnal “djă tơngan črâo bruă” brơi mơnuih ngă hmua ngă tui bruă pơplih mrô amăng hơdôm rĭm mơta mơng pla pơjing, lăi pơthâo truh pơ blơi yua gơnam tam amăng plang mơnuih mơnam, ba gơnam đang hmua tơl anih anom blơi pơhrui.”

Khul mơnuih ngă hmua tơring čar Dak Lak brơi thâo, pơ anăp anai, djop gưl amăng Khul amra tŏ tui djru brơi ding kơna pok prong anih sĭ gơnam amăng plang internet, mă yua boh thâo măi mok amăng pơkra gơnam hăng hrưn đĭ klă amăng bruă pơkra, sĭ mơdrô. Hrŏm hăng anun lĕ djru brơi prăk čan hluai tui Keh prăk djru mơnuih ngă hmua, pơtop hrăm bruă mă tui tơlơi črâo ba mơng sang bruă prăk hăng pơtô hrăm brơi mơnuih ngă hmua kiăng thâo plơi pla, sĭ mơdrô gơnam.

Yă H’Giang Niê, Khua khul mơnuih ngă hmua tơring čar Dak Lak pơsit tong, plih hĭ tơlơi pơmĭn ngă hmua, pơlir bruă ngă hmua hăng tơlơi kiăng blơi yua lĕ tơlơi rơkâo yôm hloh. Lơm mơnuih ngă hmua thâo mă yua boh thâo phrâo, gơgrong lăi pơthâo hăng ĕp mơnuih blơi gơnam, nua gơnam amra ƀu kơnong dŏ glăi amăng bruă ngă hmua đôč ôh mơ̆ ăt hơmâo hrưn đĭ klă amăng pơkra hăng sĭ mơdrô. “Khul amra pok pơhai na nao kiăng neh met wa ngă hmua dưi ngă tui bruă pơplih mrô, ba gơnam sĭ mơdrô hăng hơdôm boh thâo măi mok amăng pơkra gơnam. Mơng anun, ngă gơnam tam mơng mơnuih ƀôn sang amra jing gơnam yua amăng ha thun, hơđong amăng rĭm thun. Ƀing gơmơi čang rơmang amra pơjing rai ƀing mơnuih thâo yua boh thâo phrâo hăng anom bơwih ƀong hrŏm mrô kiăng gum hrŏm amăng bruă pơplih mrô.”/.