Gơgrong ngă klă bruă pel ĕp, krăo lăng kơ bruă blơi hăng sĭ apui lơtrik, amăng 9 blan thun 2024, anom bruă apui lơtrik Dak Lak hơmâo pơsir hĭ giăm 920 bruă ngă soh bơdjơ̆ nao mă yua apui lơtrik hăng abih tih prăk pơhrui lĕ 1,7 klai prăk. Thun hlâo, Dak Lak ăt ba jơlan hlâo hơdôm anom bruă gah Kông ti apui lơtrik kual Tong krah (EVNCPC) kơ mrô prăk pơhrui mơng bruă ngă soh amăng mă yua apui lơtrik hăng rơbêh 2,1 klai prăk. Kiăng bruă pel ĕp, krăo lăng ba glăi tŭ yua, hơdôm anom bruă apui lơtrik amăng tơring čar hơmâo ngă tui lu hơdră bruă lăp djơ̆ tơlơi sit nik amăng rĭm boh ƀon lan.

Hơdôm boh ƀon lan prong, mă yua pơđuăi măi ƀô̆p ia lu hloh hơmâo Ea Kar, Buôn Hồ, Čư̆ Mgar… juăt ƀuh hơmâo bruă ngă soh lơm mă yua amăng apui lơtrik pơhmu hăng kual pơkŏn. Yua anun, amăng bơyan không phang, anai lĕ bơyan ƀô̆p ia lu hloh kiăng kơ pruih brơi phun pla, hơdôm anom bruă apui lơtrik lêng kơtưn amăng bruă pel ĕp tơhrơi kah hăng mlăm, kiăo tui lăng kjăp bruă mă yua apui lơtrik, mă yua boh thâo phrâo kơ tañ ĕp ƀuh hơdôm bruă ngă soh…laih dong, anom bruă apui lơtrik Dak Lak ăt pok pơhai pel ĕp tô̆ tơnô̆ kơ bruă bơwih bơwang sĭ mơdrô, mông jŭ yap, hmao tlôn ĕp ƀuh, pơsir hĭ hơdôm anih amuñ ngă huač apui yua, hăng kiăng mă yua apui lơtrik rơnuk rơnua.